ءماجىلىس سپيكەرى قابيبوللا جاقىپوۆ قحر بۇكىلقىتايلىق حالىقتىق-ساياسي كونسۋلتاتيۆتىك كەڭەسى توراعاسىنىڭ ورىنباسارى ۆان چجەنۆەيمەن كەزدەستى. ق.جاقىپوۆ پەن ۆان چجەنۆەي قوس مەملەكەت باسشىلارىنىڭ دوستىق قارىم-قاتىناسى ارقاسىندا ەكىجاقتى ءوزارا ءىس-قيمىلدىڭ قارقىندى دامىپ كەلە جاتقانىن ءسوز ەتتى, دەپ حابارلادى ءماجىلىستىڭ ءباسپاسوز قىزمەتى.
كەزدەسۋ يەلەرىنىڭ پىكىرىنشە, قازاقستان پرەزيدەنتىنىڭ «نۇرلى جول» باعدارلاماسى مەن قحر توراعاسىنىڭ «ءبىر بەلدەۋ – ءبىر جول» باستاماسى ۇزاق مەرزىمدى ءوزارا ءىس-قيمىلدىڭ جارقىن بولاشاعىنىڭ ورتاق كورىنىسى. ۆان چجەنۆەي, سونداي-اق, جىبەك جولىنىڭ ەكونوميكالىق بەلدەۋىن قۇرۋ تۋرالى قحر توراعاسى باستاماسىنا ءبىزدىڭ ەلىمىزدىڭ كورسەتكەن قولداۋىن اتاپ ءوتتى.
قابيبوللا جاقىپوۆ مارتەبەلى مەيمانعا قازاقستان پرەزيدەنتىنىڭ 5 ينستيتۋتتىق رەفورماسى مەن ونى ورىنداۋدىڭ «100 ناقتى قادام» ۇلتتىق جوسپارى تۋرالى جانە وسى ماڭىزدى باستامالاردى زاڭنامالىق تۇرعىدان قولداۋ تۋرالى بايانداپ بەردى.
جۇزدەسۋ كەزىندە ەكى ەلدىڭ ترانسشەكارالىق سۋ رەسۋرستارى سالاسىنداعى ىنتىماقتاستىق ماسەلەلەرى دە نازاردان تىس قالمادى. قابيبوللا جاقىپوۆ ازىرلەنىپ جاتقان سۋ ءبولۋ تۋرالى ۇكىمەتارالىق كەلىسىمنىڭ ەكى ەلدىڭ مۇددەسىنە قىزمەت ەتەتىنىنە سەنىم ءبىلدىردى. ءماجىلىس توراعاسى ەلىمىزدىڭ قحا جانە قحر مەملەكەتتىك ۇلتتار ءىسى جونىندەگى كوميتەتى اراسىندا بايلانىس ورناتۋعا دەگەن قىزىعۋشىلىعىن دا اتاپ ءوتتى.
ۆان چجەنۆەي قىتاي ەلىنىڭ ىنتىماقتاستىقتى ودان ءارى كۇشەيتۋگە دايىن ەكەنىن جەتكىزدى.
سۋرەت: http://munara.kz/