«قازاتومونەركاسىپ» ۇلتتىق اتوم كومپانياسى» اق ترانسفورماتسيالاۋ باعدارلاماسىن سالتاناتتى تۇردە باستادى. وعان «سامۇرىق-قازىنا» ۇاق» اق باسقارما توراعاسى ومىرزاق شوكەەۆ پەن ءال-اۋقات قورىنىڭ بيزنەس ترانفورماتسياسى جونىندەگى باس ديرەكتورى ادامس يلكياۆيچۋس قاتىستى.
«سامۇرىق-قازىنا» جەتەكشىسى مەملەكەت باسشىسىنىڭ تاپسىرماسىنا وراي ەلىمىزدەگى بىرقاتار ۇلتتىق كومپانيالار بىرەر جىلدىڭ كولەمىندە ترانسفورماتسيالاۋ باعدارلاماسىن جۇزەگە اسىرىپ جاتقانىنا توقتالىپ, بۇل باعىتتاعى جۇمىستاردىڭ العاشقى ناتيجەلەرى كورىنە باستاعانىن ايتتى. ءسويتىپ, ەندىگى ترانسفورماتسيالاۋ كەزەگى قازاتومونەركاسىپكە كەلگەنىن جەتكىزدى. بۇگىنگى كۇننىڭ ماڭىزدى تاقىرىبى تۋرالى بايانداپ, ترانسفورماتسيالاۋ ءىسى ءبىر-ەكى جىلدىڭ عانا جۇمىسى ەمەس, ۇزاق مەرزىمدى قامتيتىن كۇردەلى ۇدەرىس ەكەنىن ۇقتىردى. «بۇل كەشەندى شارا بىرنەشە جىلدى كەرەك ەتەتىن, وتە قىزىقتى ءارى تەرەڭ ءۇردىس. بۇلاي دەۋىمنىڭ سەبەبى, كومپانيا قىزمەتكەرلەرى مەن جۇمىسشىلارى وسى باعدارلاما نەگىزىندە كاسىپورىنعا دەگەن كوزقاراستارىن بىرتىندەپ وزگەرتىپ, ورتاق ءىستىڭ ءتيىمدى بولۋىنا ءبارى دە قىزمەت ەتۋى ءتيىس. ادامداردىڭ وي-ساناسىن جاڭعىرتاتىن بۇل شارا ۇلتتىق كومپانيانىڭ جىلدام ىلگەرىلەپ, الەمدىك ارىپتەستەرىمەن يىق تىرەستىرۋىنە مۇمكىندىك تۋدىرادى دەپ سەنەمىز», دەدى ءو.شوكەەۆ.
ەلىمىزدىڭ ۇلتتىق كومپانيالارى زامان تالابىنا ساي ترانسفورماتسيالانباسا ەلىمىزدىڭ الەمدەگى وزىق ەلدەردىڭ كوشىنە ىلەسۋى قيىن بولاتىنىن ايتقان باسقارما توراعاسى, «قازاتومونەركاسىپ» كومپانياسىن ترانسفورماتسيالاۋ باعدارلاماسىن دايىنداۋعا كوپ كۇش جۇمسالعانىن جەتكىزدى. «ءبىز «قازاتومونەركاسىپ» كومپانياسىندا بۇل ۇدەرىستى دەر كەزىندە جانە دۇرىس ىسكە قوسۋ ءۇشىن كوپ كۇش سالدىق. ءسويتىپ, «قازاتومونەركاسىپ» اق ترانسفورماتسيالاۋ باعدارلاماسىنىڭ ۇزاق مەرزىمدى ماقساتتارى مەن باستامالارىن انىقتاپ الدىق, ونىڭ ءبارى ديرەكتورلار كەڭەسى بەكىتكەن كومپانيانىڭ جاڭا ستراتەگياسىندا كورىنىس تاپقان. ناقتى ايتقاندا, ول قازاتومونەركاسىپتىڭ جاڭا ستراتەگياسىندا 2025 جىلعا قاراي كومپانيانىڭ قۇنىن 3 ەسەگە ۇلعايتۋ سياقتى دامۋدىڭ شەشۋشى ماقساتتارى انىق بەلگىلەنگەنىن, مۇنداي زور ماقساتتارعا 1-2 جىلدا قول جەتكىزۋ مۇمكىن ەمەس ەكەندىگى تۇسىنىكتى. ترانسفورماتسيا – ۇزاق مەرزىمدى ۇدەرىس. سوندىقتان, ونىڭ ناتيجەسىن ءبىز 2018 جىلدان باستاپ كورۋدى جوسپارلاپ وتىرمىز», دەدى ول.
«قازاتومونەركاسىپ» اق ترانسفورماتسيالاۋ باعدارلاماسىنىڭ ارقاسىندا الەمدىك نارىقتا ۋران ءوندىرىسى بويىنشا عانا ەمەس, سونىمەن قاتار, ۋران جەتكىزۋدە دە كوشباسشى پوزيتسيالارعا كوشۋدى كوزدەپ وتىر. ول جونىندە ۇلتتىق اتوم كومپانياسىنىڭ باسشىسى اسقار جۇماعاليەۆ ايتتى. «ءوندىرىستى ءارتاراپتاندىرۋ الەمنىڭ اتوم ەلەكتر ستانسالارى ءۇشىن دايىن ءونىم ساتۋ ارقىلى كومپانيانىڭ قوسىمشا تابىس تابۋىنا مۇمكىندىكتەر اشادى. ترانسفورماتسيا اياسىندا ماركەتينگ قىزمەتىن نىعايتۋعا دا جەتە ءمان بەرىلۋى ءتيىس. اتالمىش بلوكتى كۇشەيتۋمەن قاتار xالىقارالىق ءىرى ۋران ءوندىرۋشى كومپانيالار ءتارىزدى ءبىز دە ونىمدەرىن ساۋدالايتىن ترەيدينگ كومپانياسىن قۇرۋدى جوسپارلاپ وتىرمىز. سونداي-اق, وزگەرىستەر جوسپارىندا بارلىق كۇشتى نەگىزگى قىزمەتكە جۇمىلدىرۋ ماقساتىندا كومپانيانىڭ ۇيىمدىق قۇرىلىمىن وزگەرتۋ جانە بەيىندى ەمەس اكتيۆتەردى شىعارۋ دا قاراستىرىلعان. 2019 جىلعا قاراي نەگىزگى قىزمەتكە قاتىسى جوق قىزمەتتەر كورسەتەتىن 27 بەيىندى ەمەس كاسىپورىن, اتاپ ايتقاندا, ءتۇرلى xيميالىق ءوندىرىس ورىندارى مەن سەرۆيستىك كومپانيالار «قازاتومونەركاسىپ» اق قۇرامىنان شىعارىلادى», دەدى كومپانيا باسشىسى.
بۇلارمەن بىرگە, ا.جۇماعاليەۆ كومپانيادا قىزمەتكەرلەردىڭ بىلىكتىلىگىن ارتتىرۋ باعدارلاماسى كۇشەيتىلەتىنىن دە باسا ايتتى. ونىڭ سوزىنە قاراعاندا, مامانداردىڭ بىلىكتىلىگىن كوتەرۋ ءۇشىن ولاردى ءوز ەلىمىزبەن قاتار, شەتەلدەردە دە وقىتىپ الۋ ماقساتى بار ەكەن. وسىنى جەتكىزگەن كومپانيا جەتەكشىسى پايدالى قىزمەت كورسەتكىشىنىڭ ورىندالۋىنا قاراي ەڭبەككە اقى تولەۋدىڭ ۇزدىك جۇيەسى ەنگىزىلەتىنىن, قىزمەتكەرلەردىڭ جەكە ءوسۋى مەن كوشباسشىلىق ساپاسىن دامىتۋ ءۇشىن بارلىق جاعداي جاسالاتىنىن اتاپ كورسەتتى.
نۇرباي ەلمۇراتوۆ,
«ەگەمەن قازاقستان».