الماتىداعى «عىلىم ورداسىندا» قازاقستان رەسپۋبليكاسى كونستيتۋتسياسىنىڭ 20 جىلدىعىنا ارنالعان «قازاقستان رەسپۋبليكاسىنىڭ كونستيتۋتسياسىنىڭ مادەني-تاريحي ولشەمى: ماسەلەلەرى مەن بولاشاعى» اتتى دوڭگەلەك ۇستەل ءوتتى.
وسىدان 20 جىل بۇرىن 30-شى تامىزدا قازاقستان حالقى رەسپۋبليكالىق رەفەرەندۋمدا تاريحي شەشىم قابىلداپ, قازاقستاننىڭ جاڭا كونستيتۋتسياسىن بەكىتتى. بۇل ماڭىزدى قۇجات – ەل كونستيتۋتسياسى سول كۇننەن باستاپ مەملەكەتتىك قۇرىلىستىڭ نەگىزىن قالىپتاستىرۋشى كۇش بولىپ سانالادى.
وتكىزىلگەن ءىس-شارانىڭ ماقساتى – كونستيتۋتسيا كۇنىنىڭ قوعامدىق ساناداعى ماڭىزدىلىعىن ارتتىرۋ, مەملەكەت قولدانىسىنداعى باستى قۇقىقتىق قۇجات رەتىندە نەگىزگى زاڭعا قوعامنىڭ نازارىن اۋدارۋ, ونى دارىپتەۋ ءداستۇرىن نىعايتىپ, وسكەلەڭ ۇرپاقتى كونستيتۋتسيالىق قۇرىلىمدى قۇرمەتتەۋ رۋحىندا تاربيەلەۋ دەر بولساق, دوڭگەلەك ۇستەل بارىسىندا ول مىندەت ويداعىداي ورىندالدى.
القالى جيىندى «عىلىم ورداسى» رمك باس ديرەكتورى روزا كارىبجانوۆا جۇرگىزدى. اكادەميك ابدىمالىك نىسانباەۆ «قازاقستان رەسپۋبليكاسىنىڭ كونستيتۋتسياسى جانە ۇلتتىق بىرلىك پەن بىرەگەيلىك», قر بعم عك فيلوسوفيا, ساياساتتانۋ جانە ءدىنتانۋ ينستيتۋتى ديرەكتورىنىڭ ورىنباسارى سەرىك نۇرمۇراتوۆ «قازاقستان كونستيتۋتسياسىنىڭ نەگىزگى قۇندىلىقتارى», ينستيتۋتتىڭ ءبولىم مەڭگەرۋشىسى باقىتجان ساتەرشينوۆ «قازاق قوعامىنداعى ءداستۇرلى بي ينستيتۋتى», اعا عىلىمي قىزمەتكەر گۇلنۇر وسكەمباەۆا «قازاقستان كونستيتۋتسياسىنىڭ تاريحى», عىلىمي قىزمەتكەر نۇركەن ايتىمبەتوۆ «كونستيتۋتسيا – ەل تۇراقتىلىعىنىڭ مىزعىماس كەپىلى» تاقىرىبىندا مازمۇندى بايانداما جاسادى.
جارىسسوزگە شىققاندار بۇگىنگى قاۋزاپ وتىرعان تاقىرىپتان اۋىتقىماي پىكىرتالاس جەلىسىن «قازاقستان-2050» ستراتەگياسى جانە بەس ينستيتۋتتىق رەفورمانى جۇزەگە اسىرۋ ماقساتىنداعى ۇلت جوسپارىنىڭ «100 ناقتى قادام» باعدارلاماسىن جۇزەگە اسىرۋ جولدارىمەن ۇيلەستىرىپ, تۇجىرىمدى دا تانىمدى اڭگىمە قوزعادى.
شاراعا پارلامەنت ءماجىلىسىنىڭ دەپۋتاتى سەرىك سەيدۋمانوۆ, بەلگىلى عالىم-تەولوگ ءابساتتار دەربىسالى قاجى جانە باسقا دا ەلىمىزدىڭ ماڭدايالدى عالىمدارى قاتىسىپ, ويلارىن ورتاعا سالدى.
اتا زاڭىمىزدىڭ عۇمىر جولىن باياندايتىن ناسيحاتتىق كورمەنى قىزىقتاۋشىلار لەگى كوپ بولدى.
تالعات ءسۇيىنباي,
«ەگەمەن قازاقستان».
الماتى.