ادەبيەتتى قورعاۋ قاجەت - قازاقستان جازۋشىلار وداعىندا وتكەن جىل قورىتىندىسى جيىنىندا قالامگەرلەر وسىنداي تۇجىرىمعا كەلدى.
وتكەن ادەبي جىلدا قول جەتكەن جەتىستىكتەر مەن تابىستاردى, كەمشىلىكتەر مەن پروبلەمالاردى ەكشەپ سارالاعان باسقوسۋ قاشان دا پايدالى بولماق. مۇنداي جيىن تالانتتى جازۋشىلارعا شىعارما جازىپ بەرمەيدى. بىراق ول باردى باعالاۋعا, جاقسىدان ۇلگى الۋعا, الداعى تاقىرىپتاردى ايقىنداۋعا, داۋىرگە ءجىتى كوزبەن قاراپ ءۇن قوسۋعا سەپتىگىن تيگىزەرى انىق. قازاق قالامگەرلەرىنىڭ ءداستۇرلى جىل قورىتىندىسى جينالىسىن اشا كەلە, جازۋشىلار وداعى باسقارماسىنىڭ توراعاسى, سەناتور نۇرلان ورازالين وسى جايلاردى تاراتىڭقىراپ ايتتى.
پروزا جانرى بويىنشا باياندامانى فيلولوگيا عىلىمدارىنىڭ دوكتورى, پروفەسسور ادەبيەتشى ايگۇل ىسىماقوۆا جاسادى, پوەزيا جونىندە ۇعا كوررەسپوندەنت-مۇشەسى, اقىن باۋىرجان جاقىپ تولعامدى ءسوز ايتتى. قازاقستانداعى ورىس ادەبيەتى تۋرالى بەلگىلى اقىن ليۋبوۆ شاشكوۆا, ۇيعىر ادەبيەتى حاقىندا جازۋشى راحمەتجان يۋسۋپوۆ اڭگىمەلەدى. ودان ءارى جانرلار بويىنشا سارالاعاندا فانتاستيكانى – شامشيدەن ءابدىرامان, دراماتۋرگيانى – سۇلتانالى بالعاباەۆ, بالالار ادەبيەتىن – ءدىلدار مامىرباەۆا, سىن-سىقاق پەن ساتيرانى – مۇحتار شەرىم, ادەبي سىندى – گۇلزيا پىراليەۆا, جاستار ادەبيەتىن – ەرمەك قانىكەي, دەرەكتى پروزانى – سارا لاتيەۆا, اۋدارمانى – عازيزبەك ءتاشىمباي سىندى جازۋشىلار, ادەبيەتشى عالىمدار ءادىل سىن تارازىسىنان وتكىزىپ, اسا ءبىر بايىپتىلىقپەن تالدادى. وتكەن جىلى ولجا سالعان جاقسى شىعارمالار اتالىپ ايتىلدى. كەمشىلىكتەرگە دە توقتالدى. قازاق ادەبيەتىنىڭ وتكەن جىلعى قورجىنى توق ەكەندىگى قۋانتارلىقتاي. كورشىلەس ەلدەرمەن ادەبي بايلانىستاردىڭ نىعايا تۇسكەندىگى دە قۇپتارلىق. وسىنىڭ ءبىر كورىنىسىندەي, الداعى ۋاقىتتا رەسەي-قازاقستان جازۋشىلارىنىڭ بىرىككەن الماناعى شىعارىلماق. سونىمەن بىرگە, وسى جيىندا ايتىلعان ۇسىنىستارعا وراي, ءوز ۇلىلارىمىزدىڭ, ايتالىق, اباي, ماحامبەت, مۇقاعالي سىندى زاڭعارلاردىڭ اتىنداعى مەدالدار بەلگىلەۋ جايى شەشىمىن تاپپاق. جازۋشىلار وداعىنىڭ الداعى پلەنۋمدارىنىڭ وزەكتى تاقىرىپتارى دا پىكىرتالاس كەزىندە ايقىندالىپ قالدى. الدا بولاتىن بۇل ساليقالى جيىنداردا قازاق حاندىعىنىڭ 550 جىلدىعى جانە قازاق ادەبيەتى, بالالار ادەبيەتىنىڭ جايى, دراماتۋرگيا جانە تەاتر ماسەلەلەرى كەڭىنەن ءسوز بولاتىن بولىپ كەلىسىلدى. قازىر كىتاپ وقۋعا ق ۇلىق از, كوركەم ادەبيەتكە دەگەن ىقىلاس-ىنتا كەمشىن. اۋەزوۆتى ارەڭ بىلەتىندەر سانى كوبەيىپ بارادى. وسى ق ۇلىقسىزدىقتان قازاقتىڭ ادەبيەتىن, مادەنيەتىن, كۇللى رۋحانياتىن قورعاۋ قاجەتتىگىنە جىل قورىتىندىسىنا ارنالعان جازۋشىلار جينالىسى باسا نازار اۋداردى.
قورعانبەك امانجول, «ەگەمەن قازاقستان».
الماتى.