استانا قالاسىنداعى «Park Inn» قوناقۇيىنىڭ ءماجىلىس زالىندا تۇرعىن ءۇي قۇرىلىس جيناق بانكى جانىنداعى قوعامدىق كەڭەستىڭ كوشپەلى ءماجىلىسى بولىپ ءوتتى. وندا استانا قالاسىنداعى ساۋران جانە №24 كوشەلەرىنىڭ قيىلىسىندا ورنالاسقان كوپپاتەرلى تۇرعىن ءۇي كەشەنى «ساقالدى» قۇرىلىسىنىڭ ماسەلەلەرى قارالدى.
كوشپەلى ءماجىلىس وتىرىسىن تۇرعىن ءۇي قۇرىلىس جيناق بانكى (تقجب) جانىنداعى قوعامدىق كەڭەستىڭ توراعاسى, قازاقستان جۋرناليستەر وداعىنىڭ توراعاسى, بەلگىلى جۋرناليست سەيىتقازى ماتاەۆ اشىپ, بۇگىنگى وتىرىستىڭ كۇن ءتارتىبىن جانە وعان قاتىسۋشىلاردى تانىستىردى. كوشپەلى ماجىلىسكە قوعامدىق كەڭەستىڭ مۇشەلەرى, پارلامەنت ءماجىلىسىنىڭ دەپۋتاتى تۇرسىنبەك ومىرزاقوۆ, «قازاقستان تۇرعىن ءۇي قۇرىلىس جيناق بانكى» اق باسقارما توراعاسىنىڭ ورىنباسارى ەربول قاراشۇكەەۆ, بانكتىڭ ورتالىق فيليالىنىڭ ديرەكتورى ەلميرا قابىلانباەۆا, «استانا قالاسىنىڭ قۇرىلىس باسقارماسى» مەملەكەتتىك مەكەمەسىنىڭ باسشىسى تالعات رىسپەكوۆ, ونىڭ ورىنباسارى ەرجاس ايتۋعانوۆ, تۇرعىن ءۇي باسقارماسى باسشىسىنىڭ ورىنباسارى ميرا بايسۇگىروۆا جانە اتالمىش تۇرعىن ءۇي كەشەنى ۇلەسكەرلەرىنىڭ وكىلدەرى قاتىستى.
«باقسام, باقا ەكەن» دەمەكشى, بۇگىنگى وتىرىستا تىلگە تيەك ەتىلگەن ماسەلە ەلورداداعى ساۋران جانە №24 كوشەلەرىنىڭ قيىلىسىندا ورنالاسقان «ساقالدى» تۇرعىن ءۇي قۇرىلىسى جايىندا بولىپ وتىر. بۇل كوپپاتەرلى كەشەن قۇرىلىسى مەملەكەتتىڭ وڭىرلەردى دامىتۋدىڭ 2020 جىلعا دەيىنگى باعدارلاماسى اياسىندا باستالىپ, استانا قالاسى اكىمدىگى قول قويعان كەلىسىمگە سايكەس وسىدان ەكى جىل بۇرىن, ياعني 2013 جىلدىڭ جەلتوقسان ايىندا پايدالانۋعا بەرىلۋگە ءتيىس بولاتىن. بىراق, الاياق مەردىگەرلەردىڭ كەسىرىنەن قۇرىلىس ءالى كۇنگە دەيىن بىتەتىن ەمەس. سونىڭ سالدارىنان تۇرعىن ءۇي قۇرىلىس جيناق بانكىنىڭ 242 سالىمشىسى 2 جىل بويى اۋرە-سارساڭعا ءتۇسىپ, كۇنى بۇگىنگە دەيىن «تاباناقى, ماڭداي تەرلەرىمەن» جينالعان قارجىلارىنا الاتىن پاتەرلەرىنە قول جەتكىزە الماي ءجۇر.
قوعامدىق كەڭەس توراعاسىنىڭ ايتۋىنشا, بۇل ماسەلەگە بايلانىستى تقجب سالىمشىلارى تاراپىنان ءتۇسىپ جاتقان ارىز-شاعىمدار تاسقىنى توقتار ەمەس. ۇستىمىزدەگى جىلدىڭ 9 ماۋسىمىندا قوعامدىق كەڭەستىڭ كوشپەلى وتىرىسى ءدال وسى «ساقالدى» قۇرىلىس الاڭىندا وتكىزىلگەن بولاتىن. سول جيىندا استانا قالاسى اكىمدىگى اتىنان «استانا قالاسىنىڭ قۇرىلىس باسقارماسى» مەملەكەتتىك مەكەمەسى باسشىسىنىڭ ورىنباسارى ەرجاس ايتۋعانوۆ ءسوز الىپ, 2015 جىلدىڭ 1 شىلدەسىنە دەيىن تۇرعىن ءۇي كەشەنىندەگى قۇرىلىس-مونتاج جۇمىستارى تولىق اياقتالىپ, 31 شىلدەگە دەيىن مەملەكەتتىك كوميسسيانىڭ اكتىسىنە قول قويىلاتىنى تۋرالى ۋادە بەرگەن بولاتىن. ءتىپتى, ول وسى ۋادەسى ورىندالماسا, «قىزمەتىمنەن ءوز ەركىممەن كەتەمىن», دەپ مالىمدەمە جاساعان ەدى. وعان سول وتىرىسقا قاتىسقان بىرنەشە باق وكىلدەرى دە كۋا بولعان. الايدا, سودان بەرى ءۇش اي مەرزىم وتسە دە, «باياعى جارتاس, ءبىر جارتاس» كۇيىندە قالىپ, قۇرىلىس باسقارماسى باسشىسىنىڭ ورىنباسارى ەرجاس ايتۋعانوۆ تا جىلى ورنىن سۋىتقان جوق.
سەيىتقازى ماتاەۆتىڭ ايتۋىنشا, بۇكىل رەسپۋبليكامىزدا وسىعان دەيىن تۇرعىن ءۇي قۇرىلىس جيناق بانكى سالىمشىلارى تاراپىنان قارجىلاندىرىلعان 7 «ساقالدى» تۇرعىن ءۇي كەشەنى بولعان ەكەن. بۇگىنگى كۇنگە دەيىن ونىڭ التاۋى بويىنشا ماسەلە تولىق شەشىلىپ, ۇلەسكەرلەر وزدەرىنە تيەسىلى پاتەرلەرىن العان. تەك وسى ەلورداداعى اتالمىش تۇرعىن ءۇي كەشەنىنىڭ «جىرى» بىتەر ەمەس. جاقىندا بۇل تۇرعىن ءۇي كەشەنى سالىمشىلارىنىڭ ءبىر توپ وكىلدەرى الماتىعا بارىپ, قوعامدىق كەڭەسكە تاعى دا شاعىمدانىپتى. بۇل كوپپاتەرلى تۇرعىن ءۇي ۇلەسكەرلەردىڭ قارجىسىمەن سالىنىپ جاتقان قۇرىلىس بولىپ تابىلادى. سوندىقتان, بانك سالىمشىلارىنىڭ مۇددەسى قوعامدىق كەڭەستى سىرت قالدىرا المايدى. قىسقاسى, «ساقالدى» تۇرعىن ءۇي كەشەنىنىڭ قۇرىلىسى قاشان اياقتالادى؟
كوپشىلىكتى تولعاندىرىپ وتىرعان بۇل كوكەيكەستى سۇراققا «استانا قالاسىنىڭ قۇرىلىس باسقارماسى» مەملەكەتتىك مەكەمەسىنىڭ باسشىسى تالعات رىسپەكوۆ جاۋاپ بەردى. ونىڭ ايتۋىنشا, بۇگىندە بۇل قۇرىلىس نىسانىندا 100-دەن استام قۇرىلىسشى ۋاقىتپەن ساناسپاي ەڭبەك ەتىپ جاتىر. قازىر تۇرعىن ءۇي كەشەنىنە جىلۋ تارتۋ ماسەلەسى شەشىلۋدە. باس مەردىگەر تاراپىنان جىبەرىلگەن ولقىلىقتارعا بايلانىستى بۇل تۇرعىن ءۇي كەشەنىنىڭ قۇرىلىسى سوزىلىپ كەتتى. ەندى بۇل ماسەلە تولىق شەشىمىن تابۋدا. قازىر تۇرعىن ءۇي كەشەنىنىڭ اينالاسىن اباتتاندىرۋ, اسفالت توسەۋ جۇمىستارى دا قولعا الىنعان. قىسقاسى, قازان ايىنىڭ سوڭىنا دەيىن تۇرعىن ءۇي كەشەنى پايدالانۋعا بەرىلەدى.
ءسوز كەزەگىن تقجب جانىنداعى قوعامدىق كەڭەستىڭ مۇشەسى, بەلگىلى تەلەديدار جۇرگىزۋشىسى سەرگەي پونامارەۆ الدى. «سىزدەر وسىدان ءۇش اي بۇرىن بۇل تۇرعىن ءۇي كەشەنى پايدالانۋعا بەرىلەدى دەگەن ەدىڭىزدەر. ءتىپتى, ءسىزدىڭ ورىنباسارىڭىز ەرجاس ايتۋعانوۆ قوعامدىق كەڭەس مۇشەلەرىنىڭ الدىندا, بۇكىل باق وكىلدەرى الدىندا, ءتورت كامەراعا تىكەلەي قاراپ تۇرىپ, «تۇرعىن ءۇي كەشەنى 31 شىلدەدە پايدالانۋعا بەرىلمەسە, ءوز ەركىممەن قىزمەتىمنەن كەتەمىن» دەپ مالىمدەگەن ەدى. مىنە, بۇگىن سول ورىنباسارىڭىز, ەرجاس ايتۋعانوۆ تۇك بولماعانداي تاعى ورتامىزدا وتىر. مۇمكىن ەرجاس ايتۋعانوۆ جۇمىستان كەتۋگە بۇگىن ءوتىنىش بەرەتىن شىعار», دەدى ول ءوز سوزىندە. كەلەسى كەزەكتە ءسوز العان قوعامدىق كەڭەس مۇشەسى جانە وسى تۇرعىن كەشەنىنىڭ ۇلەسكەرى اينۇر بايساقالوۆ س.پونامارەۆتىڭ ءسوزىن جانداندىرىپ, كوپشىلىك الدىندا بەرگەن ۋادەسىن ورىنداماعان ە.ايتۋعانوۆقا شۇيلىكتى: «مەن ءسىزدىڭ ورنىڭىزدا بولسام, ۋادەمنەن شىعۋ ءۇشىن وسى تۇرعىن ءۇي قۇرىلىسىنىڭ سوڭعى ۇلەسكەرى پاتەر كىلتىن العانشا, پاتەر جالداپ تۇرار ەدىم», دەدى.
قوعامدىق كەڭەس مۇشەلەرىنىڭ تىكەلەي ايىپتاۋلارىنا ەرجاس ايتۋعانوۆ بىردەن جاۋاپ بەردى: «بۇل تۇرعىن ءۇي كەشەنىنىڭ پايدالانۋعا بەرىلۋى مەنىڭ قىزمەتتەن كەتۋىمە بايلانىستى بولسا, مەن قازىر ءوتىنىش جازۋعا دايىنمىن. بىراق, مەن جاۋاپكەرشىلىگىن جەتە سەزىنەتىن شەنەۋنىك رەتىندە بۇل قۇرىلىس كەشەنى تولىق پايدالانۋعا بەرىلگەنشە, مىندەتىمدى اتقاراتىن بولامىن. ءبىز بۇرىنعى باس مەردىگەردىڭ قىلمىستىق كەمشىلىكتەرىن سوتقا بەردىك. العاشقى سوت وتىرىسى ءبىزدىڭ پايدامىزعا شەشىلدى. ءبىز ءادىلەتتىلىككە قول جەتكىزەمىز. ال تۇرعىن ءۇي كەشەنىنىڭ قۇرىلىسى 31 قازاندا تولىق اياقتالاتىن بولادى», دەدى «استانا قالاسىنىڭ قۇرىلىس باسقارماسى» مەملەكەتتىك مەكەمەسى باسشىسىنىڭ ورىنباسارى.
بانك سالىمشىلارى اتىنان ءسوز العان ۇلەسكەر قايرات سۇلتانوۆ تۇرعىن ءۇي كەشەنىنىڭ قۇرىلىسى اياقتالعاننان كەيىن تۇرعىن ءۇي باسقارماسى ۇلەسكەرلەردىڭ بۇل پاتەرلەرگە دەگەن قۇجاتتارىن دايىنداۋدى سوزىپ, اۋرە-سارساڭعا سالماي ما, بانك سالىمشىلارى قاتتى سۋىق تۇسكەنشە پاتەرلەرىنە كىرە الا ما, دەگەن كۇدىگىن ورتاعا سالدى. «ءبىز ەشكىمنىڭ دە قىزمەتىنەن كەتىپ, جازاعا تارتىلۋىن قالامايمىز. بىزگە پاتەرلەرىمىزدىڭ كىلتىن الساق بولعانى. مىنە, ەكى جىلدان بەرى مەن زاڭدى باسپانامدى كۇتىپ, پاتەر جالداپ شىعىنعا باتىپ ءجۇرمىن. ۇلەسكەرلەردىڭ بارلىعى دەرلىك وسىنداي قيىندىقتاردى باستان كەشىرۋدە. سوندىقتان, ءبىز ءۇشىن پاتەر كىلتىن الۋدان باسقا ارمان جوق», دەدى ول ءسوزىنىڭ سوڭىندا.
«استانا قالاسىنىڭ تۇرعىن ءۇي باسقارماسى» مەملەكەتتىك مەكەمەسى باسشىسىنىڭ ورىنباسارى ميرا بايسۇگىروۆا ۇلەسكەرلەردىڭ سۇراعىنا جاۋاپ بەرە كەلىپ, باسقارما تاراپىنان قۇجاتتار دايىنداۋدا ەشقانداي كەدەرگى بولمايتىندىعىنا سەندىردى. ونىڭ ايتۋىنشا, تۇرعىن ءۇي قۇرىلىسى پايدالانۋعا بەرىلگەندىگى ءجونىندەگى مەملەكەتتىك اكتىگە قول قويىلعاننان كەيىن ونشاقتى كۇننىڭ ىشىندە قۇجاتتار دايىن بولماق.
وتىرىستى قورىتىندىلاي كەلىپ, قوعامدىق كەڭەس توراعاسى سەيىتقازى ماتاەۆ بۇل «ساقالدى» قۇرىلىس قاشان اياقتالىپ, تۇرعىن ءۇي كەشەنى قاشان پايدالانۋعا بەرىلەتىندىگىن تاعى ءبىر پىسىقتاپ ءوتتى. وعان «استانا قالاسىنىڭ قۇرىلىس باسقارماسى» مەملەكەتتىك مەكەمەسىنىڭ باسشىسى تالعات رىسپەكوۆ «تۇرعىن ءۇي كەشەنىنىڭ بارلىق قۇرىلىس جۇمىستارى 31 قازاندا تولىق اياقتالادى», دەپ ناقتى جاۋاپ بەردى.
جىلقىباي جاعىپار ۇلى,
«ەگەمەن قازاقستان».
استانا.