استانا. 5 شىلدە. قىزىلوردا وبلىسى جاڭاقورعان اۋدانىنىڭ «كوبەلدەس», «اقسەڭگىر» جانە «ىنتىماق» شارۋا قوجالىقتارىنا تيەسىلى 250 باس اسىل تۇقىمدى قوي مەن قوزى شىعىنىن انىقتاۋ ماقساتىندا ماماندار ساراپتامالىق زەرتتەۋگە كىرىستى. بۇل تۋرالى قىزىلوردا وبلىسى اكىمدىگىنىڭ ءباسپاسوز قىزمەتى حابارلادى.
ولگەن مالداردىڭ 90 پايىزى 4-5 ايلىق تولدەر. قازىرگى تاڭدا مال شىعىنى توقتاعان.
وسىعان سايكەس اتالعان ماسەلەنىڭ ءمان-جايىن انىقتاۋ ماقساتىندا ارنايى كوميسسيا قۇرىلىپ, تەكسەرۋ جۇمىستارىن جۇرگىزۋدە.
وبلىستىق ۆەتەريناريالىق زەرتحانانىڭ ماماندارى اۋىرعان مالدان جۇقپالى اۋرۋلارعا قارسى پاتولوگيالىق ۇلگى جانە وشاقتاعى شوپتەن, توپىراقتان, سۋدان ۇلگىلەر الدى. ساراپتاما ناتيجەسى 10-15 كۇندە انىقتالادى. بۇدان بولەك جاعدايى ناشارلاعان تاعى 250 باس مال وقشاۋلانىپ, باقىلاۋعا الىنعان. كورشىلەس ورنالاسقان وتارلاردىڭ مالدارى امان. ال اۋىرىپ تۇرعان مالداردى انتيبيوتيكتەرمەن جانە قان سارىسۋلارىمەن ەمدەۋ جۇمىستارى جۇرگىزىلۋدە.
اۋىرىپ تۇرعان مالداردىڭ كلينيكالىق بەلگىلەرى اۋىز, تاناۋ قۋىستارىنىڭ شىرىشتى قاباتى قابىنعان, ەنتىگۋ, كوبىكتى سىلەكەي ءبولىنۋ, اراسىندا تىنىسى اۋىرلاپ جوتەلۋى, تولدەردىڭ وكپە اۋرۋى بايقالادى.
سونداي-اق, ماماندار اپتاپ ىستىققا بايلانىستى مالدى سالقىن كەزدە جايىپ, كۇندىز كولەڭكەدە, سۋدىڭ جاعاسىندا ۇستاۋعا, ءبىر وتارداعى مال باسىن 400-500 باستان اسىرماۋعا كەڭەس بەرەدى.
تالعات رايىمبەك.
دەرەك: وبلىس اكىمدىگىنىڭ ءباسپاسوز قىزمەتى.
سۋرەت: azh.kz.