اتىراۋ وبلىسىندا ۇساق بالىقتار قىرىلۋدا

اتىراۋ. 22 مامىر. اتىراۋ وبلىسىندا تاعى قارا بالىقتاردىڭ قىرىلۋ دەرەگى انىقتالدى. بۇل تۋرالى egemen.kz ءتىلشىسى حابارلادى. بۇعان دەيىن قارا بالىقتاردىڭ قىرىلۋ دەرەگى جايىق وزەنىنە قۇياتىن ارنالاردا بايقالعان ەدى. ال بۇل جولى بالىقتار قۇرمانعازى اۋدانىنداعى اتوتكەل وزەگىندە ولگەنى بەلگىلى بولىپ وتىر. اتىراۋ وبلىستىق ورمان شارۋاشىلىعى جانە جانۋارلار الەمى ينسپەكتسياسىنىڭ باسشىسى مۇرات ەرمەكقاليەۆتىڭ جەرگىلىكتى «اقجايىق» گازەتىنىڭ تىلشىسىنە بەرگەن مالىمەتىنشە, بالىقتاردىڭ ءولۋى 12 مامىردا بولعان. «سول كەزدە قيعاش وزەنىندە سۋ دەڭگەيى كوتەرىلىپ, اتوتكەل وزەگىنە سۋمەن بىرگە بالىقتار دا كىرگەن. الايدا, وزەك سۋى تەز تارتىلىپ, توپىراققا ءسىڭىپ كەتكەن. وسىنىڭ سالدارىنان سۋ مەن اۋانىڭ جەتىسپەگەن بالىقتار قىرىلعان», – دەپ جورامال جاسايدى باسقارما باسشىسى. باسقارما ينسپەكتورلارى ساراپتاما جۇرگىزۋ ماقساتىمەن سۋدان جانە بالىقتاردان سىنامالار الدى. اتالعان وزەكتە 21 مىڭنان استام, ياعني, 2,5 تونناداي ۇساق بالىقتاردىڭ قىرىلعانى بەلگىلى بولىپ وتىر. جولداسبەك شوپەعۇل. دەرەك, سۋرەت: egemen.kz.