بۇگىنگى كۇنى الەمنىڭ ءۇلكەن ءوزگەرىستەر قارساڭىندا تۇرعاندىعى بارشامىزعا ءمالىم. بۇل جاھاندىق وزگەرىستەردىڭ قازاقستان رەسپۋبليكاسىنا دا اسەر ەتەتىندىگى انىق. وسىنداي كەزەڭدەردە ءبىز, قازاقستاندىقتار, ساياسي الەم تورىندە ماڭگىلىك ەل جولىندا ەڭبەك ەتىپ كەلە جاتقان مەملەكەتىمىزدىڭ دارەجەسىن, حالقىمىزدىڭ تاتۋلىعى مەن جاسامپازدىعىن ساقتاۋىمىز قاجەت. بيىلعى وتكەن پرەزيدەنتتىك سايلاۋ وسىنىڭ جارقىن ايعاعى بولىپ, ونىڭ نەگىزىن, حالىقتىڭ بەيبىتشىلىگى مەن ەلدىڭ تىنىشتىعىن, تۇراقتىلىعىن ارتتىردى. سەبەبى, سول دۇربەلەڭدەردەن ءبىزدى لايىقتى كوشباسشى الىپ شىعا الادى.
قازداۋىستى قازىبەك اتامىز: «ءبىز قازاق دەگەن ەلمىز, ەشكىمگە سوقتىقپاي, جاي جاتقان ەلمىز. ەلىمىزدەن قۇت-بەرەكە كەتپەسىن دەپ, جەرىمىزدىڭ شەتىن جاۋ باسپاسىن دەپ, نايزاعا ۇكى تاققان ەلمىز. ەشبىر دۇشپان باسىنباعان ەلمىز, باسىمىزدان ءسوز اسىرماعان ەلمىز…» – دەپ بەكەر ايتپاسا كەرەك. ەلباسى نۇرسۇلتان نازارباەۆتىڭ ءبىزدىڭ جاڭا داۋىردەگى مەملەكەتىمىزدىڭ بۇكىل ماقسات-مۇددەلەرىن, ءوسىپ-
وركەندەۋىن تەرەڭنەن ءارى كەڭىنەن تولعايتىن ساياساتكەر ەكەندىگى اقيقات. يندۋستريالىق-يننوۆاتسيالىق سيپاتى باسىم بۇگىنگى زاماندا كوشباسشىنىڭ پراگماتيكالىق, ديپلوماتيالىق, جان-جاقتى دامىعاندىعى مەن كورەگەندىك ساياساتى, بولاشاقتى ءدال جوسپارلاي الۋ قابىلەتى وسى تۇلعانىڭ بويىندا بار دەپ نىق ايتا الامىن. «نۇرسۇلتان نازارباەۆ – ساياسي فيلوسوفيا مەن ساياسي ەكونوميكانىڭ كوپتەگەن جەتىستىكتەرىن تەرەڭ مەڭگەرىپ, قايتا قورىتقان ادام», – دەپ پرەزيدەنت اكىمشىلىگىنىڭ باسشىسى نۇرلان نىعماتۋلين جازعانداي, جاڭا داۋىردەگى قازاق مەملەكەتىنىڭ باسشىسى نۇرسۇلتان نازارباەۆ بەيبىت ءارى جاسامپازدىق جولىمەن ءوز ەلىن دامىتۋ, ونىڭ الەۋەتىن كوتەرۋ ارقىلى الەم ساحناسىنا شىعۋعا بولاتىندىعىن دالەلدەدى. ەلباسى ۇلىقتاۋ راسىمىندە پاش ەتىلگەن «قازاقستاننىڭ ەكونوميكالىق عاجابى» – وسىنىڭ ايقىن مىسالى. نۇرسۇلتان ءابىش ۇلىنىڭ شىعىس پەن باتىستىڭ توعىسقان تورابىندا ورنالاسقان ەلىمىزدى دامىتۋدا قازاقتىڭ بايىرعىدان كەلە جاتقان ءداستۇرىن الەم مادەنيەتىمەن ۇشتاستىرىپ, حالقىمىزدىڭ مەملەكەت باسقارۋداعى عاسىرلار بويعى ۇلگىسىن جانداندىرىپ, جاڭا سەرپىن مەن كەلبەت بەرۋىنەن باسشىنىڭ پراگماتيكالىق ءتاجىريبەسى جارقىن كورىنىس تاپقان.
ساياسي دۇربەلەڭدەر كەزەڭىندە «نازارباەۆ فورمۋلاسىنىڭ», «نازارباەۆ فەنومەنىنىڭ» الەم كولەمىندە «تەتچەريزم» مەن رونالد رەيگان, فرانكلين رۋزۆەلت, لي كۋان يۋ سىندى تۇلعالاردىڭ ساياساتىمەن قاتار تۇرۋى – بۇكىل قازاق, قازاقستان جۇرتى ءۇشىن زور ماقتانىش. ءاز تاۋكە حان كەزىندە: «لايىقتى باسشىنىڭ مىندەتى – كوش باسىندا تۋ الىپ ءجۇرۋ, ال حالقىنىڭ مىندەتى – سول تۋ ارتىنان ەرۋ», – دەپ ايتىپ كەتىپتى. سوندىقتان وسىنداي سارا ساياساتكەرلىكتى ۇستاناتىن ەلباسىنىڭ سوڭىنان كەۋدەمىزگە اسقاق سەزىم ۇيالاتىپ, ەڭسەمىزدى تىك ۇستاپ ەرۋ ۇلكەن باقىت دەپ سانايمىن.
«قازاقستان جانە نازارباەۆ – مەملەكەت پەن ونىڭ ليدەرى دەگەن تۇسىنىكتەر», – دەگەن قاعيدالى وي بۇل كۇندە اكسيوماعا اينالعان. سەبەبى, مەملەكەت باسشىسى – حالقىمىزدىڭ الەم تورىندەگى ايناسى. كوشباسشىنىڭ ءسوزى – ونىڭ حالقىنىڭ ءسوزى, شەشىمى – حالىق ءىلتيپاتى.
بۇگىنگى كۇنى تولەرانتتىلىق ءححى عاسىردىڭ باستى فاكتورلارىنىڭ ءبىرى دەسەك بولار. تولەرانتتىلىق – وركەنيەتتى قوعامعا ءتان قۇبىلىس. مۇنداي قاسيەتتىڭ تۇتاس حالىقتىڭ باسىنا ءبىر كۇندە ورناي سالمايتىنى بەلگىلى, ونىڭ حالىقتىڭ سانا-سەزىمىنىڭ, ءداستۇرىنىڭ, رۋحاني بايلىعى كەمەلدەنگەنىنىڭ ايقىن كورىنىسى ەكەندىگى انىق. وسى تۇرعىدان قاراساق, قازاقستانداعى قوعامدىق قارىم-قاتىناستار ەلباسىنىڭ جارقىن ساياساتى مەن حالىقتىڭ ونى قولداۋىنىڭ ءناتيجەسىندە جوعارى دارەجەگە كوتەرىلگەنىن نىق ايتا الامىز.
مەملەكەت باسشىسى ۇسىنعان «قازاقستان-2050» ستراتەگياسى, «نۇرلى جول» مەن «بەس حالىقتىق رەفورما» سىندى باعدارلامالاردىڭ بارلىعى دا, ءسوزسىز, ەلدىڭ كەمەل بولاشاعى جولىندا جاريالانۋدا. مەنىڭ ويىمشا, بولاشاقتى قازىر بولجاپ, وعان ەڭبەك ارقىلى عانا ۇلكەن جەتىستىكتەرگە جەتۋگە بولادى.
دانا حالقىمىز: «حان – ءبىرەۋ, حالىق – تىرەۋ», – دەگەن ناقىلدى بەكەر ايتپاعان. ءبىز بارشامىز ءبىر بولىپ, زامانىمىزدىڭ باعدارشامى نۇرسۇلتان ءابىش ۇلىمەن بولاشاققا نۇرلى قادام جاساپ جاتقانىمىز قانداي عانيبەت. ەلباسىنا مىقتى دەنساۋلىق, ىرىس-قۇت تىلەيمىن. رەسپۋبليكامىزدىڭ جارقىن يگىلىگى جولىنداعى مارتەبەلى قىزمەتى تابىستى ءارى بەرەكەلى بولعاي.
رۇستەم كەنجەبەكوۆ,
ى.التىنسارين اتىنداعى №159 گيمنازيانىڭ وقۋشىسى,
«جاس ۇلان» رببجۇ-نىڭ الماتى قالاسى بويىنشا ۇلانباسشىسى.
الماتى.