ادەتتە, ءبىز جازۋشىنىڭ, عالىمنىڭ, قوعام قايراتكەرىنىڭ مەرەيتويىن اتاپ ءوتۋدى ءداستۇرگە اينالدىرعانبىز. ال مەملەكەت باسشىسىنىڭ مەرەيتويىن ەل بولىپ اتاپ وتۋگە داعدىلانباعانبىز. نەگە؟ اتاق-داڭقى جەر جارعان, ۇلى تۇلعا بولعاسىن يمەنىپ, ابەستىك سانايمىز با؟ بۇلاي ويلاۋىمىز دۇرىس دەپ ايتا المايمىن. ويتكەنى, پرەزيدەنت تە ءبىز سياقتى ەت پەن سۇيەكتەن جارالعان ادام. ونىڭ ۇستىنە نۇرسۇلتان نازارباەۆتىڭ ەلباسى رەتىندە ەلىمىزگە سىڭىرگەن ەڭبەگى ۇشان-تەڭىز. ونى تۇگەلدەي جازىپ كورسەتۋگە گازەت كولەمى كوتەرمەيدى. سودان دا ەلباسىنىڭ مەملەكەتىمىز بەن حالقىمىزعا سىڭىرگەن وراسان زور ەڭبەگىنە شولۋ عانا جاساۋمەن شەكتەلەمىز.
«جاقسىنىڭ جاقسىلىعىن ايت, نۇرى تاسسىن» دەپ, حالقىمىز اتام زاماننان بەرى ايتىپ كەلە جاتقانىن ەسكەرسەك, نۇرسۇلتان نازارباەۆتىڭ تۋعان حالقىنىڭ قامىن ويلاپ, كۇندىز-ءتۇنى جارعاق قۇلاعى جاستىققا تيمەي, جانكەشتىلىكپەن ەڭبەك ەتىپ كەلە جاتقانىن ايتۋ – بارشامىز ءۇشىن زور ماقتانىش. اللا تاعالانىڭ بىزگە بەرگەن ۇلكەن سىيى نازارباەۆ ەكەنىن الەمگە جار سالا, بار داۋىسپەن قانشاما رەت ايتساق تا ارتىق ەتپەيدى.
مەملەكەت باسقارۋ جەڭىل جۇمىس ەمەس. بىلە بىلگەنگە, و شەتى مەن بۇ شەتىنە وسى زامانعى ۇشاقپەن جەتۋدىڭ ءوزى قيىن, اۋماعى الپاۋىت مەملەكەتتى, ون جەتى ميلليون حالقى بار ەلدى باسقارۋ تۇگىلى, ساناۋلى عانا جانى بار ءبىر وتباسىنىڭ شىرقىن بۇزباي, ءتۇتىنىن ءتۇزۋ شىعارۋدى قامتاماسىز ەتۋدىڭ ءوزى قيىننىڭ قيىنى. حالقىمىزدىڭ باعىنا بولا تۋعان ۇلى تۇلعا نۇرسۇلتان نازارباەۆتىڭ ارقاسىندا تاۋەلسىز اتانعان جيىرما ءتورت جىلدا ادام ايتسا نانعىسىز كەرەمەت جەتىستىكتەرگە جەتكەنىمىزدى دۇنيەجۇزى مويىنداپ, ءبىزدىڭ وزىق ىستەرىمىزگە شىن ىقىلاسپەن قول سوعىپ وتىر. ەلىمىز تاۋەلسىزدىكتىڭ جيىرما ءتورت جىلىندا عاسىردا عانا جۇزەگە اسىرىلاتىن قىرۋار جۇمىستى تىندىرىپ, ەكونوميكاسى شيكىزات قورىمەن شەكتەلىپ مەشەۋ قالعان ەلدەن دۇنيەجۇزىندەگى الدىڭعى قاتارلى ەلۋ ەلدىڭ قۇرامىنا ەندى. ەلباسىمىز نۇرسۇلتان نازارباەۆتىڭ «قازاقستان-2050» ستراتەگياسىندا بەلگىلەنگەن الەمنىڭ ەڭ وزىق 30 مەملەكەتىنىڭ قاتارىنا كىرۋ مىندەتىن ويداعىداي جۇزەگە اسىرۋدى باستى ماقسات ەتىپ العا قويىپ وتىر.
ايتا بەرسەك, بۇل تاۋسىلمايتىن, حالقىمىزدى تابىستان-تابىسقا جىگەرلەندىرە, ىنتالاندىرا تۇسەتىن ۇلى وزگەرىستەر. ەلباسىمىزدىڭ «نۇرلى جول – بولاشاققا باستار جول» باعدارلاماسىنداعى «ماڭگىلىك ەل» يدەياسىن ىسكە اسىرۋ مىندەتى دە ءاربىر قازاقستاندىققا جوعارى جاۋاپكەرشىلىك, زور ءمىندەتتەر جۇكتەيدى. وسىنىڭ ءبارى ەلباسىنىڭ تولعانىسىنان, ەلىمىزگە بولسىن دەگەن ىزگى نيەتىنەن تۋعان مىندەتتەر.
ءبىز سارىارقانىڭ ورتاسىندا بوي تۇزەگەن, بۇگىندە الەمنىڭ كورىكتى دە اسەم قالاسىنىڭ بىرىنە اينالعان استانانىڭ باس ارحيتەكتورى جانە اۆتورى دەپ نۇرسۇلتان نازارباەۆتى ورىندى ماقتان ەتەمىز. شىنتۋايتىنا كەلگەندە, نۇرسۇلتان ءابىش ۇلى استانانىڭ عانا ەمەس, قازاقستان رەسپۋبليكاسى اتانعان الىپ مەملەكەتتىڭ اۆتورى, باس ارحيتەكتورى, ءبىزدىڭ جەتىستىكتەرىمىزدىڭ ۇيىمداستىرۋشىسى, دەم بەرۋشىسى, كەمەڭگەر كوسەمى. مۇنى ەلباسىمىزدىڭ مەرەيتويىندا ايتپاعاندا, قاشان ايتامىز؟!
نۇرسۇلتان ءابىش ۇلىنىڭ «بارشاعا ارنالعان قازىرگى زامانعى مەملەكەت: 100 قادام – ۇلت جوسپارى» اتتى ەڭبەگىندە مەملەكەتىمىزدى جاڭعىرتۋدىڭ مىندەتتەرى بەلگىلەنىپ, بۇكىل الەم الدىندا قازاقستاننىڭ ءوسۋ-ورلەۋ, جاڭعىرۋ مىندەتتەرى كەڭىنەن جاريا ەتىلدى. «ناقتى 100 قادامنىڭ» ءار قادامى ۇلى وزگەرىستەرگە تولى. بۇل مەملەكەتتىك قىزمەتشىلەرگە عانا ەمەس ءبىز سياقتى قاتارداعى ادامدارعا دا كۇردەلى دە جاۋاپتى مىندەتتەر جۇكتەيدى. وسىناۋ اۋقىمدى جوسپارعا لايىقتى ۇلەس قوسۋ – ۇلكەنىمىز بار, كىشىمىز بار, بارشامىزدىڭ پارىزىمىز.
ەلىمىز تاۋەلسىزدىك العالى بەرى قالامىمدى قارۋ ەتىپ, ەلباسىنىڭ ۇستانعان ساياساتىن بۇقارا اراسىندا ناسيحاتتاپ كەلە جاتقان قالامگەر رەتىندە اللاعا شۇكىرشىلىك ەتەتىنىم: ءبىزدىڭ العا قاراي جىلجىعان ۇلى كوشىمىزدىڭ باسىندا نۇرسۇلتان ءابىش ۇلى نازارباەۆتىڭ بولعانى. قيىن-قىستاۋ كۇندەردە ءبىزدى اداستىرماي, دۇرىس جولعا سالعانى. قۇداي ونىڭ بەتىن اۋلاق قىلسىن, ەل تىزگىنىن بوتەن بىرەۋ ۇستاسا, ءبىز قازىرگىدەي ۇلى جەتىستىكتەرگە جەتە الار ما ەدىك؟..
نۇرسۇلتان نازارباەۆتىڭ ارقاسىندا ەلىمىزدى مەكەندەگەن 130-دان استام ەتنوستىڭ اراسىندا بولاتتاي بەرىك اۋىزبىرشىلىك پەن ۇلتارالىق تاتۋلىق ورنادى. بۇرىنعى وتكەن اتا-بابالارىمىز عاسىرلار بويى ارمانداعان قوي ۇستىنە بوزتورعاي جۇمىرتقالاعان زامانعا جەتتىك. ساياسي تۇراقتىلىقتىڭ, اۋىزبىرشىلىكتىڭ, تاتۋلىقتىڭ ارقاسىندا ەلىمىز دامىپ, ەكونو-
ميكامىز قارىشتاپ ورگە باسۋدا. قازاقستان بۇل كۇندە الەم حالىقتارىنا ۇلگى-ونەگە بولىپ وتىر. بۇل دا ەلباسىمىز نۇرسۇلتان نازارباەۆتىڭ ۇتىمدى باسشىلىعىنىڭ ارقاسىندا مۇمكىن بولعانىن تاعى دا اتاپ وتكىم كەلەدى.
بيىلعى جىلدىڭ حالقىمىزعا سىيلاعان قۋانىشى – قازاقستان رەسپۋبليكاسى دۇنيەجۇزىلىك ساۋدا ۇيىمىنىڭ قۇرامىنا قابىلدانادى, 19 جىل بويى وسى ۇيىمعا مۇشە بولۋدى كوزدەگەن ەلىمىز جان-جاقتى زەرتتەۋدەن, اۋىر سىناقتان ابىرويلى ءوتتى. دۇنيەجۇزىلىك ساۋدا ۇيىمىنا مۇشە 161 مەملەكەت تاراپىنان ۇلكەن قولداۋعا يە بولعان قازاقستان وسى ۇيىمنىڭ 162-مۇشەسى بولدى. ءۇستىمىزدەگى جىلدىڭ جەلتوقسان ايىندا ەلىمىز اتالعان ۇيىمنىڭ تولىققاندى مۇشەسى رەتىندە سونى سەرپىنمەن, تىڭ كۇشپەن ىسكە كىرىسەدى. ۇيىمعا مۇشە بولعاندىقتان, ەلىمىزگە الەمدە جوعارى باعالاناتىن ساپاسى جوعارى, باعاسى تومەن تاۋارلار كەلە باستايدى. دسۇ-نىڭ حالقىمىزعا اكەلەر جاقسىلىعى مول ەكەنىن الەم ساراپشىلارى جارىسا ناسيحاتتاۋدا. بۇل جونىندە ەلباسىمىز نۇرسۇلتان نازارباەۆ حالىققا ارناعان ۇندەۋىندە اتاپ ءوتتى.
ەلىمىزدىڭ تۇڭعىش پرەزيدەنتى نۇرسۇلتان نازارباەۆتىڭ جان-جاقتى باسشىلىعىنىڭ ارقاسىندا قازاقستان قارىشتى قاداممەن العا باسۋدا. الەم جۇرتشىلىعى نازارباەۆ دەسە, قازاقستان دەگەنى, قازاقستان دەسە, نازارباەۆ دەگەنى. تاعى دا ايتامىن: ءبىزدىڭ ءومىرىمىزدىڭ بار سالاسىندا نۇرسۇلتان نازارباەۆتىڭ اتقارعان ءرولى زور. نازارباەۆ بار جەردە بەيبىتشىلىك تە, باقىت تا, كول-كوسىر جەتىستىكتەر دە بار ەكەنىن دۇنيەجۇزى كورىپ-ءبىلىپ وتىر.
جاساي بەر, ءبىزدى نۇرلى جولمەن العا قاراي باستاي بەر, ەلباسى!
المامبەت الىشەۆ,
قازاقستان جازۋشىلار وداعىنىڭ مۇشەسى,
قازاقستاننىڭ مادەنيەت قايراتكەرى.
قىزىلوردا وبلىسى,
قازالى اۋدانى.