گرۋزيانىڭ باتۋمي قالاسىندا «جەمقورلىقپەن كۇرەس جانە كاسىبي تۇتاستىق: ايماقتىق حاب ەلدەرىنىڭ مەملەكەتتىك قىزمەت سالاسىنداعى تاجىريبەلەرى» دەگەن تاقىرىپتا حالىقارالىق كونفەرەنتسيا بولىپ ءوتتى. شارانى گرۋزيا مەملەكەتتىك قىزمەت بيۋروسىنىڭ قولداۋىمەن استانا قالاسىنداعى مەملەكەتتىك قىزمەت سالاسىنىڭ ايماقتىق حابى ۇيىمداستىردى.
كونفەرەنتسياعا ايماقتىڭ 9 ەلىنىڭ وكىلدەرى, جەمقورلىقپەن كۇرەس سالاسىنىڭ ساراپشىلارى مەن ماماندارى, سونداي-اق قازاقستاننىڭ گرۋزياداعى توتەنشە جانە وكىلەتتى ەلشىسى ەرمۇحامبەت ەرتىسباەۆ باستاعان ديپلوماتيا قىزمەتكەرلەرى قاتىستى.
جيىندا كوتەرىلىپ وتىرعان تاقىرىپ بۇگىنگى تاڭدا كۇللى الەمدە وتە ءبىر وتكىر ماسەلە بولىپ سانالادى. ونىڭ وزەكتىلىگى جەمقورلىققا قارسى كۇرەسكە قازىرگى كۇندەرى جاھانداعى بارلىق مەملەكەتتەردىڭ ايرىقشا ءمان بەرە باستاعانىنان كورىنىپ وتىر. مۇندا حابتىڭ قاتىسۋشى ەلدەردەگى مەملەكەتتىك قىزمەت جۇيەسىنىڭ بۇل ماسەلەدەگى بارىنشا اكتۋالدى پروبلەمالارىن انىقتاۋ ماقساتىندا جۇرگىزگەن ەكى بازالىق زەرتتەۋ جۇمىستارىنىڭ قورىتىندىلارى تالقىلاندى. وسىلايشا, جەمقورلىق ماسەلەلەرىنە زەرتتەۋ جۇرگىزۋ كونفەرەنتسياعا قاتىسۋشى ەلدەردىڭ باسىم كوپشىلىگىنىڭ قىزىعۋشىلىعىن تۋعىزدى.
باسقوسۋدا پروون-نىڭ جەمقورلىققا قارسى كۇرەسىنىڭ ينستيتۋتتىق اسپەكتىلەرىن سالىستىرمالى تالداۋ ناتيجەلەرىنە سايكەس, بۇل كەلەڭسىز قۇبىلىستاردىڭ قالاي جانە قاي جۇيەلەردە كوبىرەك كورىنىس تاباتىنى ايقىندالدى. وندا سونداي-اق, بۇلاردىڭ الدىن الۋ مەن جويۋ جولدارى قاراستىرىلدى. استانا حابى باسقارۋ كوميتەتىنىڭ توراعاسى ءاليحان بايمەنوۆتىڭ اتاپ كورسەتكەنىندەي, بۇل رەتتە گرۋزيادا سوڭعى جىلدارى قولعا الىنىپ, جۇزەگە اسىرىلىپ جاتقان وزىق تاجىريبەلەر نازار اۋدارۋعا ابدەن تۇرادى. ەلدە سالاعا جاڭا كادرلار تارتۋ, مەملەكەتتىڭ رولىنە شەكتەۋ سالۋ, ماسەلەنى شەشۋدىڭ ستاندارتتان تىس تاسىلدەرىن ەنگىزۋ, حالىقارالىق تاجىريبەلەردى جەرگىلىكتى جاعدايعا بەيىمدەۋ, بۇقارالىق اقپارات قۇرالدارى مەن باسقا دا فاكتورلاردى وسى جۇيەدەگى ستراتەگيالىق ماقساتتارعا پايدالانۋ ءبىرشاما تابىستى قولعا الىنىپ, ولار جەمقورلىققا قارسى كۇرەستى ايماقتا مەيلىنشە ۇتىمدى جۇرگىزۋگە سەپتىگىن تيگىزىپ كەلەدى. مۇنىڭ ءوزى گرۋزيانىڭ تاجىريبەسىن الۋعا نەگىز بولا الادى.
كونفەرەنتسيا شەڭبەرىندە سونداي-اق حابتىڭ «گرۋزيا پوليتسياسى جۇيەسىنىڭ جەمقورلىققا قارسى شارالارى» تاقىرىبىنداعى تاپسىرىسى بويىنشا ورىندالعان جۇمىس تالقىلاۋعا ۇسىنىلدى.
رۋسلان يگىلىك.