قالامىزدىڭ تازالىعى قاشان دا وزەكتى بولىپ قالا بەرمەك. وسى رەتتە قالانى تۇرمىستىق قالدىقتاردان تازارتۋدىڭ قالىپتى جۇيەسىنە قالدىقتاردى جيناۋ, شىعارۋ, سۇرىپتاۋ جانە قايتا وڭدەۋ سياقتى جاڭا تاسىلدەر قولدانىلادى.
استانا قالاسى اكىمىنىڭ ورىنباسارى قوسمان ايتمۇحامەتوۆتىڭ ايتۋىنشا, قالا ءىشى اۋماعىندا 1842 كونتەينەرلىك الاڭدا 9891 قوقىس جيناۋ كونتەينەرى ورناتىلعان. بيىل پايدالانىلىپ جۇرگەن 150 كونتەينەرلىك الاڭدا جوندەۋ جۇمىستارى جۇرگىزىلىپ, قوسىمشا 200 الاڭ جابدىقتاۋ كوزدەلىپ وتىر. سونىمەن بىرگە, استانادا «جاسىل» ەكونوميكاعا كوشۋ باعدارلاماسى بويىنشا كەشەندى جۇمىستار بەلسەندى جۇرگىزىلۋدە.
– 2015 جىلعى 1 ناۋرىزدان باستاپ, ەلورداداعى تۇرعىن ءۇي قورىندا قتق-نى ءبولىپ جيناۋ جونىندەگى پيلوتتىق جوبا جۇزەگە اسىرىلۋدا. ءتيىستى ينفراقۇرىلىمدى جاساۋ ءۇشىن 54 كونتەينەرلىك الاڭدا ءتۇرلى-ءتۇستى 108 كونتەينەر ورناتىلدى. پيلوتتىق جوبا 36 تۇرعىن ءۇي كەشەنىندە, «استانا تازارتۋ» جشس قاتىسۋىمەن 17 پيك ۋچاسكەسىندە قولعا الىندى, – دەدى ق.ايتمۇحامەتوۆ.
2014 جىلدىڭ جەلتوقسان ايىنان باستاپ جىلىتۋ ماۋسىمىندا ەلوردانىڭ جەكە سەكتورىندا كۇل جيناۋ بويىنشا پيلوتتىق جوبا جۇزەگە اسىرىلدى. 75 ارنايى كونتەينەر ورناتىلىپ, 600 توننادان استام كۇل جينالىپ, شىعارىلدى. سونداي-اق, وتكەن جىلى قۇرامىندا سىناپ سۇيىعى بار ەنەرگيا ساقتاۋشى شامداردى قايتا وڭدەۋ جوباسى اياسىندا پوليگونعا 570 مىڭ توننا ءتۇرلى قالدىقتار جىبەرىلدى. جىل باسىنان بەرى 230 مىڭ توننا قالدىق قابىلداندى.
قالدىقتاردى كومۋ پوليگوندارىن كەڭەيتۋ شارالارى دا كەڭىنەن جۇرگىزىلۋدە. بۇگىنگى كۇنى قالدىقتاردى كومۋ پوليگونىنىڭ ەكىنشى الاڭىن سالۋ جۇمىستارى اياقتالۋعا جاقىن. 2015 جىلدىڭ قاراشاسىنا دەيىن ەسكى پوليگوندى قايتا قۇنارلاندىرۋ جۇمىستارى بىتەدى.
«ەگەمەن-اقپارات».