وڭتۇستىك – اگرارلى ءوڭىر. الا جازداي كەتپەنى كۇنگە جارقىراپ ەگىستىك القابىندا جۇرگەن ديقان قوڭىر كۇزدە ەڭبەگىنىڭ بەرەكەسىن كۇتەدى. قىرىق گرادۋس اپتاپتىڭ استىندا ءجۇرىپ وسىرگەن ءونىمىنەن كەيدە شىعىنعا شىعىپ, شاقشاداي باسى شاراداي بولىپ جاتاتىنى دا بار. سەبەبى, وندىرگەن تاۋارىن الۋشى از. ەگىستىك باسىنا بارىپ, ەكى قولىن ءبىر-بىرىنە سوعىپ كورمەگەن دەلدالدىڭ تاۋارىن جارتى باعاسىنا سۇراپ قاراداي كۇيدىرەتىنى جانە بار.
مۇندايدا تىعىرىقتان وبلىس اكىمدىگى شىعارادى. وڭتۇستىككە ءتۇرلى مەملەكەتتەردەن ەلشىلەر كەلىپ جاتادى. ەكى جاققا دا ءتيىمدى تۇستاردى ايقىنداپ, كاسىپكەرلەردىڭ باسىن قوسادى.
جاقىندا وبلىس اكىمى بەيبىت اتامقۇلوۆ گرۋزيانىڭ قازاقستانداعى توتەنشە جانە وكىلەتتى ەلشىسى زۋراب پاتارادزەنى قابىلدادى. باسقوسۋدا ەكى جاققا دا ءتيىمدى جوبالار تالقىلاندى. وبلىس باسشىسى وڭتۇستىكتىڭ ءتۇرلى سالاداعى مۇمكىندىكتەرىن تاراتىپ ايتىپ, ەگەر گرۋزين كاسىپكەرلەرى ينۆەستيتسيا سالۋعا نيەت بىلدىرسە, ەكى مەملەكەتكە دە پايداسى بولاتىندىعىن جەتكىزدى. نەگىزىنەن تاۋ-تاستى وڭىردە تۇراتىن گرۋزياعا اگرارلى ءوڭتۇستىكپەن ىسكەرلىك بايلانىستا بولۋ ءتيىمدىرەك. بۇل جايىندا ەلشى ءوز ويىن ءبىلدىردى. «وزدەرىڭىزگە بەلگىلى, گرۋزيا مەن قازاقستان, ونىڭ ىشىندە, وڭتۇستىك قازاقستان وبلىسى اگرارلى ايماق رەتىندە تانىمال ولكەلەر. سوندىقتان, ءبىزدىڭ تاراپ قازاقستانمەن اراداعى تاۋار اينالىمىنىڭ ارتۋىنا قىزىعۋشىلىق تانىتىپ وتىر. گرۋزيانىڭ ونىمدەرى قازاقستانعا ەكسپورتتالىپ, سايكەسىنشە, قازاقستاندىق تاۋارلاردىڭ گرۋزيادا يمپورتتالۋىنا ءبىز دايىنبىز», – دەدى ز.پاتارادزە.
زۋراب پاتارادزە جۋىق ارادا استانادا وتەتىن اۋىلشارۋاشىلىق كورمەسىنە گرۋزين كاسىپكەرلەرىنىڭ كەلەتىندىگىن, بۇل ساپار قازاق-گرۋزين ىنتىماقتاستىعىن ودان ءارى نىعايتاتىندىعىن, ەكى جاققا دا ءتيىمدى جوبالاردا بىرلەسىپ جۇمىس جاسايتىندىقتارىن مالىمدەدى. مۇنداي پايدالى كەزدەسۋلەر وبلىس اۋىل شارۋاشىلىعىنىڭ كەڭىرەك قانات جايۋىنا جاڭا سەرپىن بەرمەك.
باقتيار تايجان,
«ەگەمەن قازاقستان».
شىمكەنت.