بۇگىن استانادا «Bolashak Alumni Reunion Conferenceand Education Fair-2015» اتتى ءداستۇرلى كورمە-كونفەرەنتسياسى وتەدى. بۇل تۋرالى كەشە ورتالىق كوممۋنيكاتسيالار قىزمەتىندە وتكەن ءباسپاسوز ءماسليxاتىندا «حالىقارالىق باعدارلامالار ورتالىعى» اق پرەزيدەنتى عاني نىعىمەتوۆ ءمالىم ەتتى.
«بۇل شارا پىكىر الماسۋ, ءبىلىم بەرۋ ماسەلەلەرىن وقىتۋداعى حالىقارالىق ۇردىستەردى تالقىلاۋ ءۇشىن بىرەگەي الاڭ دەۋگە بولادى. حالىقارالىق ساراپشىلار قازاقستاندا جۇرگىزىلگەن ءساتتى رەفورمالارعا, ەلباسىنىڭ «100 ناقتى قادام» ۇلت جوسپارى اياسىندا ىسكە اسىرىپ جاتقان كەمەل ارەكەتتەرىنە باعا بەرىپ, «بولاشاق» باعدارلاماسىنىڭ دامۋ كەلەشەگىن تالقىلايدى», – دەدى سپيكەر.
سونىمەن بىرگە, ع.نىعىمەتوۆ كونفەرەنتسيا اياسىندا قازاقستاندىق وقۋشىلار مەن ستۋدەنتتەر شەتەلدىڭ وقىتۋ جۇيەلەرىمەن تانىسا الاتىنىن جەتكىزدى. القالى فورۋمنان كەيىن 40-تان استام شەتەلدىك ۋنيۆەرسيتەت وزدەرىنىڭ وقىتۋ باعدارلامالارىن ۇسىنىپ, ۇلكەن كورمە وتكىزەتىنىن اتادى.
جيىن بارىسىندا, وتانىمىز ءبىلىم بەرۋ جۇيەسىن دامىتۋدا ۇلكەن جەتىستىكتەرگە جەتكەنىن, بۇل تۋرالى جوعارى ءبىلىم سالاسىنداعى حالىقارالىق ساراپشى دجاميل سالميدە (ماروككو) تىلگە تيەك ەتىپ, وقىتۋ ىسىندە قارقىندى قادامدار جاسالىپ جاتقانىن العا تارتتى. ول: «2008 جىلدان باستاپ ءبىز جەتەكشى الەمدىك ينستيتۋتتارمەن بىرلەسە وتىرىپ ءبىلىم بەرۋ ساپاسىنا باعالاۋ جۇرگىزىپ كەلەمىز. جانە بۇگىندە قازاقستان بۇل سالادا ايتارلىقتاي العا باستى دەپ نىق سەنىممەن ايتا الامىن. وسى ورايدا «بولاشاق» باعدارلاماسى زور مانگە يە بولىپ, ۇلكەن جەتىستىكتەرگە جەتتى», – دەدى.
«بۇگىندە كوپتەگەن ەلدەر ۇكىمەتتەرى ءبىلىم باعدارلامالارىن قارجىلاندىرۋدى قىسقارتىپ جاتىر, ال قازاقستاندا بولسا ونداي ۇردىستەر بايقالمايدى», – دەپ دجاميل سالمي ءسوزىن قورىتىندىلادى.
بىلتىر شامامەن ءتورت مىڭ ادام قاتىسقان وسىنداي كورمە-كونفەرەنتسيا بيىل ەكىنشى جىل ءوز جالعاسىن تاۋىپ وتىرعانىن دا ەسكە سالا كەتسەك دەيمىز.
راۋان قايدار,
«ەگەمەن قازاقستان».