ءماجىلىس توراعاسىنىڭ ورىنباسارى سەرگەي دياچەنكو قىتاي حالىقتىق ساياسي-كونسۋلتاتيۆتىك كەڭەسى بۇكىلقىتايلىق كوميتەتىنىڭ سىرتقى ىستەر جونىندەگى كوميتەتى توراعاسىنىڭ ورىنباسارى ۆان گوتسين باستاعان قىتايلىق دەلەگاتسيا وكىلدەرىمەن كەزدەستى.
كەزدەسۋ كەزىندە قازاقستان مەن قىتاي اراسىنداعى ساياسي ءوزارا ءىس-قيمىلدى تەرەڭدەتۋ, ساۋدا-ەكونوميكالىق ىنتىماقتاستىقتى دامىتۋ, پارلامەنتارالىق بايلانىستى نىعايتۋ, مادەني قاتىناستى كۇشەيتۋ, سونداي-اق, كۇن تارتىبىندەگى حالىقارالىق جانە ايماقتىق دەڭگەيدەگى ماڭىزدى ماسەلەلەر اڭگىمە وزەگىنە اينالدى.
سونىمەن قاتار, تاراپتار قازاقستان مەن قىتاي باسشىلارىنىڭ ساليقالى ساياساتىنىڭ ارقاسىندا جىل سايىن نىعايىپ كەلە جاتقان دوستىق, ارىپتەستىك, تاتۋ كورشىلىك قارىم-قاتىناستى العا تارتا كەلىپ, قازاقستان پرەزيدەنتىنىڭ «نۇرلى جول» باعدارلاماسى مەن قحر توراعاسىنىڭ «ءبىر بەلدەۋ – ءبىر جول» باستاماسى ۇزاق مەرزىمدى ءوزارا ورتاق ءىس-قيمىلدىڭ جارقىن كورىنىسىنە اينالعانىن, ونىڭ تابىستى جۇزەگە اسىرىلۋى ەكى ەل دامۋىنا تىڭ سەرپىن بەرەتىنىن اتاپ ءوتتى.
ءماجىلىس توراعاسى ورىنباسارىنىڭ پىكىرىنشە, ترانسشەكارالىق سۋ رەسۋرستارى سالاسىنداعى ىقپالداستىق تا ەكى ەل اراسىنداعى ستراتەگيالىق ارىپتەستىكتىڭ ماڭىزدى باعىتتارىنىڭ ءبىرى.
س.دياچەنكو مەيمانداردى ءماجىلىستىڭ تىنىس-تىرشىلىگىمەن تانىستىرا كەلىپ, ەلباسىنىڭ بەس ينستيتۋتتىق رەفورماسىن جۇزەگە اسىرۋدىڭ «100 ناقتى قادام» ۇلت جوسپارى جونىندە, ونى زاڭنامالىق قولداۋ جۇمىستارى جايىندا كەڭىنەن اڭگىمەلەدى.
ءوز كەزەگىندە ۆان گوتسين ەكى ەل اراسىندا ديپلوماتيالىق قارىم-قاتىناس ورناعان 23 جىل ىشىندە تاتۋ كورشىلىك سيپاتىنا سىزات تۇسپەي, كەرىسىنشە, جىل سايىن تەرەڭدەپ كەلە جاتقانىن, اسىرەسە, اوسشك, شىۇ, تاعى باسقا حالىقارالىق ۇيىمدار اياسىندا قازاقستان مەن قىتاي ىقپالداستىعىنىڭ ارتا تۇسكەنىن جەتكىزدى. وسىدان 12 جىل بۇرىن قازاقستانعا تۇڭعىش رەت ساپارمەن كەلگەن مارتەبەلى مەيمان ءبىزدىڭ ەلىمىزدىڭ دامۋ قارقىنى تاڭعالدىرعانىن ايتىپ, بولاشاقتا دا تولاعاي تابىستار تىلەدى.
س.دياچەنكو مەن ۆ.گوتسيننىڭ ورتاق پىكىرىنە سۇيەنسەك, وسىنداي ساپار الماسۋلار مەملەكەتتەرىمىز اراسىنداعى ستراتەگيالىق ارىپتەستىكتى ودان ءارى كۇشەيتە تۇسەدى.
كەزدەسۋگە, ءماجىلىس دەپۋتاتتارى م.ءاشىمباەۆ, ۆ.كوسارەۆ, ك.بۇرحانوۆ قاتىستى.
«ەگەمەن-اقپارات».