اقتوبە وبلىسىنىڭ اكىمى بەردىبەك ساپارباەۆ رەسەي فەدەراتسياسىنىڭ ورال قالاسىنداعى باس كونسۋلى سايد زابيتوۆپەن كەزدەستى. قوناقتى جىلىشىرايمەن قارسى العان اۋماق باسشىسى رەسەيمەن ءوزارا قارىم-قاتىناستىڭ اناعۇرلىم نىعايا تۇسكەنىن, اسىرەسە, شەكارالاس وڭىرلەرمەن الەۋمەتتىك-ەكونوميكالىق, مادەني جانە باسقا سالالاردا ىلگەرىلەۋ بار ەكەنىن اتاپ ءوتتى.
بۇل ءوز كەزەگىندە جالپى قازاقستان – رەسەي قارىم-قاتىناسى دامۋىنىڭ تيىمدىلىگى مەن سەرپىندىلىگىنىڭ بەلگىسى بولىپ تابىلادى. وبلىستا ءاربىر ءۇشىنشى بىرلەسكەن كاسىپورىن رەسەي بيزنەسىنىڭ قاتىسۋىمەن قۇرىلعان. اقتوبە وڭىرىندە رەسەي كاسىپورىندارىنىڭ قاتىسۋىمەن جۇزەگە اسىرىلىپ جاتقان ءىرى جوبالار قاتارىندا «ورىس مىس كومپانياسى» جاق, اقتوبە رەلس ارقالىقتارى زاۋىتى جانە باسقالارى بار.
ءوز كەزەگىندە سايد زابيتوۆ رەسەي مەن قازاقستاننىڭ عاسىرلار بويى قالىپتاسقان ىنتىماقتاستىعى بۇدان بىلاي دا نىعايا بەرەتىنىنە سەنىم ءبىلدىر-
ءدى. سودان كەيىن باس كونسۋل اۋعانستان سوعىسىنا قاتىسقان وبلىس تۇرعىنى ارتىق ەلكەەۆكە جوعارى ناگرادا تاپسىردى. 1989 جىلى كسرو جوعارعى كەڭەسى تورالقاسىنىڭ جارلىعىمەن سول كەزدەگى نوۆورەسەي اۋدانى «قوپا» كەڭشارىنىڭ تۋماسى ارتىق ەلكەەۆ «قىزىل جۇلدىز» وردەنىمەن ماراپاتتالعان ەكەن. مىنە, ارادا 26 جىل وتكەندە ناگرادا يەسىن تاپتى. قازىرگى تاڭدا ەكىنشى توپتاعى مۇگەدەك ارتىق ەلكەەۆ وتباسىمەن وبلىس ورتالىعىندا تۇرادى.
ءوڭىر باسشىسى دا اۋعاندىق جاۋىنگەردى لايىقتى ناگراداسىمەن قۇتتىقتاپ, وعان مىقتى دەنساۋلىق تىلەدى.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.