ۇلتتىق مۋزەيدە «دۇرىس اڭشىلىقتى قولداۋ جانە جانۋارلار دۇنيەسىن قورعاۋ» كورپوراتيۆتى قورى قازاق حاندىعىنىڭ 550 جىلدىعىنا «قازاقستاننىڭ جانۋارلار دۇنيەسى» اتتى رەسپۋبليكالىق فوتوكورمە ۇيىمداستىردى.
قور پرەزيدەنتى ورالباي ءابدىكارىموۆتىڭ ايتۋىنشا, بايقاۋ ءتۇرىندە وتكىزىلىپ جاتقان فوتوكورمەگە 70 فوتوسۋرەتشىدەن 231 سۋرەت كەلىپ تۇسكەن. بايقاۋعا قازاقستاننىڭ ەڭ مىقتى فوتوگرافتارى قاتىسىپ وتىر.
«فوتوونەر سالاسىنىڭ مايتالمان ماماندارىنان قۇرالعان قازىلار القاسى سۋرەتتەردىڭ ءستيلى مەن ساپاسىنا, ەرەكشەلىگى مەن بىرەگەيلىگىنە باسىمدىق بەردى. قازىلار القاسى فوتوكورمەگە ەڭ ۇزدىك 40 سۋرەتتى تاڭداپ الدى», – دەدى و.ءابدىكارىموۆ.
قور پرەزيدەنتىنىڭ سوزىنشە, رەسپۋبليكالىق فوتوكورمە ەلىمىزدەگى جانۋارلار دۇنيەسىنىڭ سانالۋاندىعىن كورسەتۋدى كوزدەيدى جانە ولاردى قورعاۋدى ناسيحاتتايدى.
«ادامداردىڭ تابيعاتقا سەلقوس قاراۋىنىڭ cالدارىنان كوپتەگەن جانۋارلاردىڭ سانى ازايىپ, كەيبىرەۋلەرى جويىلىپ كەتىپ جاتىر. بۇگىندە ءبىزدىڭ ەلىمىزدە قابىلان, تۇران جولبارىسى, پرجەۆالسك جىلقىسى مۇلدە جوعالىپ ءبىتتى دەسە دە بولادى. بۇعان ادامداردىڭ تابيعاتتى لاستاۋى, ءتۇرلى تابيعي اپاتتار مەن ءوندىرىس ورىندارىنىڭ كوبەيۋى بىردەن-ءبىر سەبەپ بولىپ وتىر. بۇگىنگى فوتوكورمە ەل ازاماتتارىنىڭ جانۋارلار دۇنيەسىن ساقتاۋعا دەگەن جاۋاپكەرشىلىگىن ارتتىرۋعا سەپ بولادى دەگەن ويدامىن. ءبىز بارلىعىمىز بىرلەسكەندە عانا تابيعاتىمىزدىڭ فاۋناسىن جوعالتپاي, بولاشاق ۇرپاققا امانات ەتىپ تاپسىرامىز», – دەدى قور پرەزيدەنتى.
ءسوز اراسىندا و.ابدىكارىموۆ قازاقستاندا قۇستاردىڭ – 490, ءسۇتقورەكتىلەردىڭ – 172, باۋىرىمەن جورعالاۋشىلاردىڭ – 51, قوسمەكەندىلەردىڭ – 12, بالىقتىڭ 100-دەن استام ءتۇرى بار ەكەنىنە توقتالدى.
«ەلىمىزدە جويىلىپ بارا جاتقان جانە جويىلۋدىڭ الدىندا تۇرعان جانۋارلاردى تىركەپ وتىراتىن «قىزىل كىتاپ» مەرزىمدى ءتۇردە جارىق كورىپ جاتىر. 2010 جىلى شىققان «قىزىل كىتاپتىڭ» 4 باسىلىمىنا بالىقتىڭ – 18, قوسمەكەندىلەردىڭ – 3, باۋىرىمەن جورعالاۋشىلاردىڭ – 10, قۇستاردىڭ – 57, سۇتقورەكتىلەردىڭ – 40, وزگە جانۋارلاردىڭ 128 ءتۇرى ەنگەن», – دەپ ءتۇيدى ويىن قور پرەزيدەنتى.
كورمەدە سويلەگەن سوزىندە مەملەكەت قايراتكەرى ءومىربەك بايگەلدي شەت مەملەكەتتەردە ادامدار تابيعاتپەن بىتە قايناسىپ كەتەتىنىن, ونى ايالايتىنىن, قادىرلەپ قاستەرلەيتىنىن, ءبىز سياقتى نەمكەتتىلىك تانىتپايتىنىن تىلگە تيەك ەتسە, ءماجىلىس دەپۋتاتى قۋانىش سۇلتانوۆ رەسپۋبليكالىق فوتوكورمە دەر كەزىندە ۇيىمداستىرىلىپ وتىرعانىنا توقتالىپ, ونىڭ بەرەرى مول بولاتىنىنا سەنىم ءبىلدىردى. ال ۇلتتىق مۋزەيدىڭ ديرەكتورى دارحان مىڭباي قازاقستان تاۋەلسىزدىك العاننان كەيىن العاشقى قابىلداعان زاڭدارىنىڭ ءبىرى جان-جانۋارلار مەن قورشاعان ورتانى قورعاۋعا قاتىستى زاڭ بولعانىن اتاپ كورسەتىپ: «مۇنىڭ ءوزى ءبىزدىڭ مەملەكەتىمىزدىڭ تابيعاتقا دەگەن دۇرىس كوزقاراسىن كورسەتەدى جانە اتاكاسىپ – اڭشىلىقتى وڭ باعىتتا دامىتۋعا باسىمدىق بەرۋدى قالايتىنىنىڭ جارقىن كورىنىسى بولىپ تابىلادى», – دەدى.
ايتا كەتەيىك, رەسپۋبليكالىق فوتوكورمەنىڭ قورىتىندىسى 20 قازان كۇنى شىعارىلادى.
ەرلان وماروۆ,
«ەگەمەن قازاقستان».