تەڭگە پارا العان شەنەۋنىك سوتتالدى
«قولىڭنان كەلسە, قونىشىنان باس» دەگەندى قىزمەتتىك ۇستانىمىنا اينالدىرعان شەنەۋنىكتەر قاتتى قاتەلەسەتىنىن بىلمەيدى-اۋ, ءسىرا! ايتپەسە, مەملەكەتتىڭ مۇددەسىنەن ءوز مۇددەسىن جوعارى قويماس ەدى. قۋ قۇلقىننىڭ قامىمەن قالتاسىن تولتىرۋ ءۇشىن وڭاي جولمەن اقشا تابۋدى ويلاماس ەدى. بۇعان ناقتى دالەل رەتىندە وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ شەتەلدىك جۇمىس كۇشىن تارتۋ بولىمىنە جەتەكشىلىك ەتەتىن شەنەۋنىكتىڭ جات ارەكەتىن كەلتىرۋگە بولادى.
اتىراۋ قالالىق №2 سوتىندا قارالعان قىلمىستىق ءىس ماتەريالدارىندا انىقتالعانداي, ءبولىم باسشىسى مەملەكەتتىك قىزمەتتى جۇزەگە اسىرۋشى وكىلەتتى تۇلعا بولا تۇرا «منسك سينوپەك قازاحستان» جشس وكىلىنەن شەتەلدىك جۇمىس كۇشىن پايدالانۋ مەن ونىڭ مەرزىمىن كەدەرگىسىز ۇزارتۋعا رۇقسات بەرگەندىگى ءۇشىن 777 000 تەڭگە پارا العان. سوت ۇكىمىمەن ول قىلمىستىق كودەكستىڭ 366-بابىنىڭ 2-ءبولىگىندە (پارا الۋ) كورسەتىلگەن قىلمىستىق ارەكەتتى جاساعاندىعى ءۇشىن كىنالى دەپ تانىلىپ, وعان ءتورت جىلعا باس بوستاندىعىنان ايىرۋ, دۇنيە-مۇلكىن ءتاركىلەۋ جانە ءومىر بويى مەملەكەتتىك قىزمەتپەن اينالىسپاۋ جازاسى تاعايىندالدى. جازا وتەۋ ورنى جالپى رەجىمدەگى كولونياسىنا بەلگىلەندى» دەپ حابارلادى وبلىستىق سوتتىڭ ءباسپاسوز حاتشىسى بورانباي عاليەۆ.
قىلمىستىڭ وتەۋى – جازا. مۇنىڭ وزگە مەملەكەتتىك قىزمەتكەرگە ساباق بولعانىن قالار ەدىك.
جولداسبەك شوپەعۇل,
«ەگەمەن قازاقستان».
اتىراۋ.