كەشە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ەلىمىزگە مەملەكەتتىك ساپارمەن كەلگەن رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەستى. الدىمەن ەكى مەملەكەت باسشىلارى شاعىن قۇرامدا, ياعني ەكەۋارا كەزدەسۋ وتكىزىپ, قازاقستان مەن رەسەي اراسىنداعى بايلانىستار جايىندا اڭگىمەلەستى.
قازاقستان پرەزيدەنتى كەزدەسۋ كەزىندە ۆ.ءپۋتيننىڭ ەلىمىزگە جاساعان ساپارىنا ءوز ءىلتيپاتىن بىلدىرە كەلە, بىلاي دەدى: «ءسىزدىڭ قازاقستانعا سوڭعى مەملەكەتتىك ساپارىڭىز ءتورت جىل بۇرىن بولدى. وسى مەرزىم ىشىندە ءبىز ورتاق ماسەلەلەرگە قاتىستى كوزقاراستارىمىزدى ءاردايىم ءوزارا ۇيلەستىرىپ, ەكىجاقتى قارىم-قاتىناستىڭ وزەكتى تۇستارىن ءتۇرلى الاڭداردا شەشىپ وتىردىق. ءسىزدىڭ بۇل جولعى ساپارىڭىز دا قازىرگىدەي كۇردەلى كەزەڭدەگى ىنتىماقتاستىعىمىزدى نىعايتۋعا ءجانە كەڭەيتۋگە ىقپال ەتەتىنىنە سەنىمدىمىن».
وسىلاي دەگەن قازاقستان باسشىسى 16 قازاندا, ياعني بۇگىن وتەتىن تمد-عا مۇشە مەملەكەتتەر باسشىلارى كەڭەسى مەن جوعارى ەۋرازيالىق ەكونوميكالىق كەڭەس اياسىنداعى كەلىسسوز ماسەلەلەرىن قوزعادى. «بۇگىندە ەاەو حالىقارالىق ارەنادا قۇرمەت پەن بەدەلگە يە بولا وتىرىپ, ءوزىنىڭ اياسىن كەڭەيتىپ كەلەدى. دەمەك, ءبىز دۇرىس جولدا كەلەمىز دەپ ەسەپتەيمىن», – دەدى قازاقستان پرەزيدەنتى.
نۇرسۇلتان نازارباەۆ, سونداي-اق, ەكى مەملەكەتتىڭ ارىپتەستىگىن دامىتۋ كەلەشەگىنە دە توقتالىپ ءوتتى. «ءبىز سوچيدە ءوزارا قارىم-قاتىناستارىمىزعا قاتىستى نەگىزگى ماسەلەلەردى تالقىلاۋعا مۇمكىندىك الدىق, ەندى بۇگىن سولارعا قاتىستى ءتيىستى قۇجاتتار دايىندالىپ وتىر. ءبىزدىڭ قارىم-قاتىناستارىمىز «ءححى عاسىرداعى تاتۋ كورشىلىك جانە وداقتاستىق تۋرالى» ىرگەلى كەلىسىم نەگىزىندە دامىپ جاتقانىن دا ايتقىم كەلەدى. وداقتاستىق ۇجىمدىق قاۋىپسىزدىك تۋرالى شارتپەن, ال ەكونوميكالىق تۇرعىدان ەاەو-نىڭ جارعىلىق قۇجاتتارىمەن بەكىتىلگەن. قازاقستان ءاردايىم رەسەيدىڭ جاقىن ءارى سەنىمدى كورشىسى, وداقتاسى بولعان, الداعى ۋاقىتتا دا سولاي بولىپ قالا بەرەدى. بۇل قازاقستان حالقىنىڭ تۇپكى مۇددەلەرىمەن توعىسىپ جاتىر», – دەپ اتاپ ءوتتى ن.نازارباەۆ.
ن.نازارباەۆتان كەيىن سويلەگەن ۆ.پۋتين بۇگىندە جوعارى دەڭگەيدەگى كەزدەسۋلەر مەن كەلىسسوزدەر جۇيەلى تۇردە ءجۇرگىزىلىپ كەلە جاتقانىن جەتكىزدى. «مەنىڭ رەسەي-قازاقستان قارىم-قاتىناسىنا سيپاتتاما بەرۋىمنىڭ كەرەگى جوق. بۇل – جاي ءوزارا سەنىمدى سەرىكتەستىك قانا ەمەس, تولىق ماعىناسىندا وداقتاستىق قارىم-قاتىناس. قازاقستان – ءبىزدىڭ ءىرى ساۋدا-ەكونوميكالىق سەرىكتەستەرىمىزدىڭ ءبىرى. قازىرگى تاڭدا 6 مىڭعا تارتا رەسەيلىك كومپانيا قازاقستاندا جۇمىس ىستەپ جاتىر, ناتيجەسىندە, دوللارلىق ەكۆيۆالەنتپەن ەسەپتەگەندە مول كولەمدەگى ينۆەستيتسيا جيناقتالدى. ءسىزدىڭ ءتول باستاماڭىز – ەۋرازيالىق ەكونوميكالىق وداق بەلسەنە دامىپ, ەكونوميكالارىمىزعا وڭ ىقپالىن تيگىزۋدە. ءبىز باسقا دا كوپتەگەن سەرىكتەسىمىزدىڭ ەاەو-مەن ءتۇرلى پىشىمدە ىنتىماقتاسۋعا نيەتتى ەكەنىن كورىپ وتىرمىز», – دەدى رەسەي پرەزيدەنتى.
ەكەۋارا كەزدەسۋ اياقتالعان سوڭ, كەلىسسوزدەر كەڭەيتىلگەن قۇرامدا جالعاستى. بۇل شارا رەسەي پرەزيدەنتى ۆ.ءپۋتيننىڭ قازاقستانعا مەملەكەتتىك ساپارى اياسىندا ۇيىمداستىرىلدى. قازاقستان پرەزيدەنتى رەسەي ءبىزدىڭ ەلىمىزدىڭ ستراتەگيالىق سەرىكتەسى ءارى وداقتاسى ەكەنىن اتاپ ءوتتى. «ءبىز ەۋرازيالىق ەكونوميكالىق وداقتا ءوزارا ىقپالداسىپ وتىرمىز. ەلدەرىمىز ەكىجاقتى بايلانىستار اياسىندا ەكونوميكا, عىلىم جانە گۋمانيتارلىق سالالارداعى جوبالاردى تابىستى جۇزەگە اسىرىپ كەلەدى. سوعان وراي ءبىز ەكى مەملەكەتتىڭ ىنتىماقتاستىعىنا سونى سەرپىن قوساتىن بۇل جولعى كەزدەسۋگە ايرىقشا ءمان بەرەمىز», – دەدى نۇرسۇلتان ءابىش ۇلى.
قازاقستان پرەزيدەنتى ءوزارا تاۋار اينالىمى كولەمىنىڭ قازىرگى قۇلدىراۋى الەمدىك ەكونوميكا دامۋىنىڭ كەزەڭدىلىگىنە جانە نەگىزگى ەكسپورتتىق تاۋارلار باعاسىنىڭ تومەندەۋىنە بايلانىستى ۋاقىتشا قۇبىلىس ەكەنىنە نازار اۋداردى. بۇل تۋراسىنداعى ويىن ەلباسى: «ءبىز ۇلتتىق دەڭگەيدە دە, ەاەو اياسىندا دا ۇيلەسىمدى جەدەل شارالار قابىلداۋ قاجەتتىگىن تۇسىنەمىز. ەكونوميكالىق ماسەلەلەردىڭ سالدارىن جەڭىلدەتە ءتۇسۋ ءۇشىن رەزەرۆتەردى پايدالانعان ءجون. ەۋرازيالىق ەكونوميكالىق وداق ۇيىمنىڭ بارلىق مۇشەسىنىڭ تەڭ قۇقىلىعى جاعدايىندا قىزمەت ەتە الادى, مەملەكەتتەرىمىزدىڭ وكىلدەرى بارلىق ەلدىڭ مۇددەسىنە جانە ورتاق ەكونوميكالىق ۇستانىمدارعا سايكەس جۇمىس ىستەۋى ءتيىس», – دەپ تۇيىندەدى.
ءوز كەزەگىندە ۆلاديمير پۋتين ەكىجاقتى قارىم-قاتىناس بارلىق سالادا, سونىڭ ىشىندە ساياسات, ەكونوميكا جانە قاۋىپسىزدىك باعىتتارىندا ءتيىمدى دامىپ كەلەدى دەگەن ويىن جەتكىزدى. «ءبىز ستاتيستيكالىق كورسەتكىشتەردىڭ ازداپ تومەندەگەنىن بايقاپ وتىرمىز, بىراق ناقتى كولەم تۇرعىسىنان ءىس جۇزىندە وزگەرىس جوق. ءبىز 2013 جىلى قابىلدانعان, 2015 جىلى مەرزىمى اياقتالاتىن ەكىجاقتى جوسپار نەگىزىندە جۇمىس ىستەپ جاتىرمىز. قازىر ءبىزدىڭ ارىپتەستەرىمىز 2016-2018 جىلدارعا ارنالعان بىرلەسكەن جۇمىس جوسپارىن ازىرلەۋدە. ونى جىل اياعىنا دەيىن بەكىتەمىز دەپ ۇمىتتەنەمىن», – دەدى رەسەي پرەزيدەنتى. سونىمەن قاتار, ۆ.پۋتين رەسەيدىڭ قازاقستان ەكونوميكاسىنا سالعان ينۆەستيتسياسى شامامەن 9 ميلليارد دوللاردان اسقانىن دا اتاپ ءوتتى.
قازاقستان مۇنايىنىڭ سىرتقى نارىققا ارنالعان نەگىزگى كولەمى رەسەي اۋماعى ارقىلى وتەتىنىنە, ماسەلەن, قازاقستان مۇنايىنىڭ باسىم بولىگى اتىراۋ – سامارا, ماحاچكالا – نوۆوروسسيسك جانە كاسپي مۇناي قۇبىرلارى ارقىلى ەكسپورتقا شىعارىلىپ جاتقانىنا نازار اۋداردى, سونداي-اق, جوعارى تەحنولوگيالار, ونەركاسىپ, اۋىل شارۋاشىلىعى جانە ەنەرگەتيكا سالالارىندا بىرلەسكەن ءىرى جوبالار بار ەكەنىن اتاپ كورسەتتى.
اقورداداعى كەلىسسوزدەر اياقتالعاننان كەيىن مەملەكەتتەر باسشىلارى بريفينگ وتكىزىپ, بىرلەسكەن ءمالىمدەمە جاسادى. بريفينگ, كۇتىلگەنىندەي, قازاقستان مەن رەسەي پرەزيدەنتتەرىنىڭ كەلىسسوز قورىتىندىسىنا ارنالدى. نۇرسۇلتان نازارباەۆ ۆلاديمير ءپۋتيننىڭ قازاقستانعا ساپارى مارتەبەسىنىڭ بيىكتىگى ەكى ەل قارىم-قاتىناسىنىڭ ەرەكشە سيپاتىن ايعاقتايتىنىن اتاپ كورسەتتى. «ءبىزدىڭ ەلدەرىمىزدىڭ اراسىندا ءوزارا ءىس-قيمىلدىڭ, دوستىق پەن ىنتىماقتاستىقتىڭ ىلگەرىدەن كەلە جاتقان جانە ناعىز تابىستى تاجىريبەسى قالىپتاسقان. ءبىزدىڭ ءاربىر كەزدەسۋىمىز – بىرلەسكەن جوبالاردى جۇزەگە اسىرۋ جونىندەگى ناقتى ۋاعدالاستىقتارعا, ىنتىماقتاستىقتىڭ ءوزارا ءتيىمدى شارتقا نەگىزدەلگەن جاڭا باعىتتارىن ايقىنداۋ ماسەلەلەرىنە ارنالادى», – دەدى ن. نازارباەۆ.
قازاقستان پرەزيدەنتى قازىرگى كۇردەلى احۋالدى ەسكەرە وتىرىپ, كەلىسسوزدەردە ەكونوميكادا ۇيلەسىمدى ءىس-قيمىلدار جۇرگىزۋ ماسەلەسى باستى تاقىرىپ بولعانىنا نازار اۋداردى. «بۇل ءۇشىن بىزدە ەكىجاقتى پىشىمدە دە, ەۋرازيالىق ەكونوميكالىق وداق اياسىندا دا قاجەتتى نارسەنىڭ ءبارى بار. ەاەو قۇرۋدىڭ ءوزى ەلدەرىمىز ءۇشىن ماڭىزى زور يگى قادام بولىپ سانالادى. قازاقستاننىڭ ءونىم وندىرۋشىلەرى ەاەو-عا مۇشە ەلدەردىڭ اۋقىمدى نارىعىنا شەكتەۋسىز قول جەتكىزدى. ەندى وسى نارىقتا ورنىعۋ ءۇشىن تاۋار مەن جۇمىس جانە قىزمەت كورسەتۋدىڭ باسەكەگە قابىلەتتىلىگىن ارتتىرۋ كەرەك», – دەدى قازاقستان باسشىسى.
نۇرسۇلتان نازارباەۆ كەلىسسوزدەر كەزىندە الەمدىك ەكونوميكاداعى ءتۇيتكىلدەردىڭ سالدارىن جەڭىلدەتۋ ءۇشىن بىرقاتار ناقتى شارالار بەلگىلەنگەنىن ايتتى. «بۇلار – رەسەيدىڭ گازى مەن مۇنايىن قازاقستان ارقىلى قىتايعا ترانزيتتەۋ, كاسپيدەگى «تسەنترالنوە» جانە حۆالىنسكوە» كەنىشتەرىن بىرلەسىپ يگەرۋ, كومىر ونەركاسىبى سالاسىندا ىنتىماقتاسۋ, ترانزيت ءۇشىن كاسپي تەڭىزىنىڭ بويىمەن پارسى شىعاناعىنا شىعاتىن جاڭا جولدى پايدالانۋ جايىن پىسىقتاۋ ماسەلەسى. ءبىز «باتىس ەۋروپا – باتىس قىتاي» جوباسىنىڭ اياقتالۋى, سونداي-اق, ينفراقۇرىلىمدىق سالاداعى ىنتىماقتاستىق تۋرالى ارنايى سويلەستىك. وسى باعىتتارداعى سەرىكتەستىكتى دامىتۋ ءۇشىن زور الەۋەتىمىز بار», – دەدى قازاقستان پرەزيدەنتى.
نۇرسۇلتان ءابىش ۇلى ەكى ەلدىڭ ساۋدا-ەكونوميكا سالاسىنداعى ءوزارا ءىس-قيمىلىنىڭ كەلەشەگىنە بولەك توقتالا كەلە, رەسەي قازاقستاننىڭ ساۋدا سالاسىنداعى ءداستۇرلى ءىرى سەرىكتەسى ەكەنىن ايتتى. «ءوزارا تاۋار اينالىمىنىڭ ورتاشا جىلدىق كولەمى شامامەن 21 ميلليارد دوللاردى قۇرايدى. رەسەي كومپانيالارى قازاقستاننىڭ ءىرى كومىرسۋتەگى شيكىزاتى كەنىشتەرىن يگەرۋگە قاتىسۋدا. قازاقستاندا رەسەيلىك كاپيتالدىڭ قاتىسۋىمەن 5600-دەن استام كاسىپورىن جۇمىس جۇرگىزۋدە. بۇگىندە قازاقستاننىڭ يندۋستريالاندىرۋ كارتاسى اياسىندا قازىردىڭ وزىندە بىرلەسكەن 20 ءىرى ينۆەستيتسيالىق جوبا ىسكە اسىرىلدى, 4-ەۋى اتقارىلىپ جاتىر, تاعى 3-ەۋى بولاشاقتا قاراستىرىلماق», – دەدى ن.نازارباەۆ.
بريفينگ بارىسىندا, سونداي-اق, كۇن تارتىبىندەگى وزەكتى حالىقارالىق ءماسەلەلەرگە قاتىستى قازاقستان مەن رەسەيدىڭ ۇستانىمدارى ايتىلدى. «ءبىز مينسك ۋاعدالاستىقتارىنىڭ جۇزەگە اسىرىلۋ بارىسىن, جاھاندىق جانە وڭىرلىك ۇيىمدار اياسىنداعى ىقپالداستىق اياسىن, اسىرەسە, ورتالىق ازيا وڭىرىندەگى تۇراقتىلىق پەن قاۋىپسىزدىكتى كۇشەيتۋ ماسەلەلەرىن تالقىلادىق. بۇل رەتتە, اۋعانستانداعى, سيريا مەن يراكتاعى احۋالدىڭ ءمانى زور. ءبىز ۆلاديمير ۆلاديميروۆيچپەن وسى وڭىردە قالىپتاسقان جاعدايدى تالقىلادىق. بۇگىندە شيتتەر مەن سۇننيتتەر اراسىنداعى تەكەتىرەستى ءوز ماقساتىنا پايدالانۋ بەلسەندى جۇرۋدە. الايدا, بۇل اڭگىمەلەر شىندىققا ەش جاناسپايدى. سيريادا بولىپ جاتقان جايت – ءبىزدىڭ ءبارىمىز ءۇشىن, اسىرەسە, ورتالىق ازيا ءوڭىرى ءۇشىن ورتاق قاتەر. وسىعان بايلانىستى ءبىز «يسلام تەرروريزمگە قارسى» فورۋمىن وتكىزۋ يدەياسىن ۇسىنىپ وتىرمىز», – دەدى قازاقستان پرەزيدەنتى.
ەلباسى, سونداي-اق, قازاقستان مەن رەسەيدىڭ الەمدەگى احۋالدىڭ ورىستەۋىنە جانە ونى باعالاۋعا قاتىستى كوزقاراستارى ورتاق ەكەنى, ەكى ەل حالىقارالىق ماسەلەلەردى شەشۋ جونىندەگى قادامدارىنىڭ تىعىز ۇيلەسىمدىلىگى, بۇل ماسەلەلەر بويىنشا پىكىر الماسۋلار مۇنى تاعى دا دالەلدەگەنى اتاپ ءوتىلدى. ءسوزىنىڭ قورىتىندىسىندا نۇرسۇلتان نازارباەۆ رەسەي تاراپىنا قازاقستان تاريحىنداعى ءۇشىنشى عارىشكەر ايدىن ايىمبەتوۆتىڭ عارىش ەكسپەديتسياسىن ۇيىمداستىرۋعا جاردەمدەسكەنى ءۇشىن العىس ايتتى.
ال رەسەي پرەزيدەنتى اقوردادا سىندارلى ءارى مازمۇندى كەلىسسوزدەر جۇرگىزىلگەنىن جەتكىزدى. «ءداستۇر بويىنشا بۇل كەلىسسوزدەر اشىق ءارى دوستاستىق ىڭعايىندا ءوتتى. ءبىز ساۋدا-ساتتىق, ينۆەستيتسيا, ەنەرگەتيكا, كولىك, عارىش, اتوم ەنەرگياسىن بەيبىت ماقساتتا پايدالانۋ سياقتى سالالارعا ايرىقشا كوڭىل ءبولىپ, ەكىجاقتى قارىم-قاتىناستاردىڭ بارلىق ماسەلەلەرى بويىنشا پىكىر الماستىق», – دەدى ۆ. پۋتين. سونىمەن قاتار, رەسەي پرەزيدەنتى ەكى ەلدىڭ كاسپي مۇنايىن بىرلەسىپ يگەرىپ جاتقانىنا توقتالىپ ءوتتى. «كاسپيدەن بىرلەسە مۇناي وندىرۋگە قاتىستى ۇلكەن جوسپارلار بار. ماسەلەن, ءبىز كاسپي تەڭىزىنىڭ سولتۇستىك بولىگىنىڭ قايراڭىن مەجەلەۋ تۋرالى 1998 جىلعى كەلىسىمگە وزگەرىستەر مەن تولىقتىرۋلار ەنگىزۋ تۋرالى قۇجاتقا قول قويدىق. بۇل ەكى ەلدىڭ كومپانيالارىنا ءىرى كومىرسۋتەگى كەن ورنىن يگەرۋگە كىرىسۋگە مۇمكىندىك بەرەدى», – دەدى رەسەي پرەزيدەنتى.
سونىمەن قاتار, ۆ.پۋتين ەكى ەلدىڭ ەنەرگيا جۇيەسى سينحروندى, ياعني قاپتالداسقان رەجىمدە جۇمىس ىستەپ تۇرعانىن, بۇگىندە قازاقستان مەن رەسەيدىڭ ورتاق ەلەكتر ەنەرگياسى نارىعىن قۇرۋ باعدارلاماسى ازىرلەنىپ جاتقانىن ايتتى. «ماسەلەن, قازىر ەكىباستۇز گرەس-2-ءنى كەڭەيتۋ جانە قايتا جاڭعىرتۋ جوباسى جۇزەگە اسىرىلۋدا. بۇعان قوسا, قازاقستانداعى ءبىرىنشى اتوم ەلەكتر ستانساسىن سالۋعا دايىندىق ءۇستىندەمىز», – دەدى ۆ.پۋتين.
رەسەي پرەزيدەنتى سىرتقى كونيۋنكتۋرانىڭ قيىندىعىنا, ەكسپورتقا شىعارىلاتىن قازاقستاندىق جانە رەسەيلىك نەگىزگى تاۋارلار باعاسىنىڭ قۇلدىراۋىنا, ۆاليۋتالار باعامىنىڭ قۇبىلمالىعىنا قاراماستان, ءوزارا ساۋدا-ەكونوميكالىق بايلانىستاردىڭ قارقىنىن ساقتاپ قالۋعا مۇمكىندىك بار ەكەنىن ايتا كەلە, بىلاي دەدى: «ۇستىمىزدەگى جىلدىڭ قاڭتار-شىلدە ايلارىندا قازاقستان مەن رەسەي اراسىنداعى تاۋار اينالىمى رۋبلمەن ەسەپتەگەندە 23 پايىزعا ارتتى. ءوزارا ينۆەستيتسيا اعىنى دا وسۋدە. ماسەلەن, قازاقستاننىڭ رەسەيدەگى ينۆەستيتسياسىنىڭ كولەمى شامامەن 3 ملرد. دوللاردى قۇرايدى. ياعني, بۇل – رەسەيلىك بيزنەس ءىس جۇزىندە قازاقستان ەكونوميكاسىنىڭ بارلىق سالاسىندا بار دەگەن ءسوز».
ۆ.پۋتين ءوز سوزىندە قازاقستان پرەزيدەنتىنىڭ تەرروريزممەن كۇرەس ماسەلەسىندە الەم ەلدەرىنىڭ كۇشىن بىرىكتىرۋ ۇسىنىسىن قولدايتىنىن دا جەتكىزدى. «ءبىز قازاقستان پرەزيدەنتىنىڭ بارلىق ەلدىڭ, ەڭ الدىمەن حالقى يسلام ءدىنىن ۇستاناتىن ەلدەردىڭ لاڭكەستىكپەن كۇرەستەگى كۇش-جىگەرىن بىرىكتىرۋ ۇسىنىسىنا قولداۋ بىلدىرەمىز», – دەدى ۆ.پۋتين.
بىرلەسكەن بريفينگ بارىسىندا رەسەي پرەزيدەنتى اقورداداعى كەلىسسوزدەر كەزىندە ەۋرازيالىق ەكونوميكالىق وداق قىزمەتىنىڭ بىرقاتار اسپەكتىلەرى, حالىقارالىق ۇيىمدارمەن ءوزارا ءىس-قيمىلدى ارتتىرۋ بولاشاعى قارالعانىن دا ايتىپ ءوتتى.
بريفينگ قورىتىندىسىندا ۆ.پۋتين رەسەيدىڭ سيرياداعى حالىقارالىق لاڭكەستىكپەن كۇرەستەگى ءىس-قيمىلىن اقش-تىڭ سىنعا الۋىنا قاتىستى جۋرناليستەر تاراپىنان قويىلعان سۇراققا بىلايشا جاۋاپ بەردى: «مەن مۇنى تۇسىنە المايمىن جانە بۇل ۇستانىمدى دۇرىس ەمەس دەپ سانايمىن. بۇل رەتتە, امەريكالىق ۇستانىمنىڭ ءالسىز بولۋىنىڭ نەگىزى اتالعان ماسەلەدە قانداي دا ءبىر كۇن ءتارتىبىنىڭ بولماۋىندا جاتقان سەكىلدى». سونىمەن قاتار, ول الداعى ۋاقىتتا بۇل كۇردەلى ۇدەرىسكە قاتىسۋشىلاردىڭ بارلىعىمەن, ونىڭ ىشىندە امەريكالىق ارىپتەستەرىمەن سىندارلى ۇنقاتىسۋعا ءۇمىت ارتاتىنىن ايتتى.
رەسەي پرەزيدەنتىنىڭ قازاقستانعا مەملەكەتتىك ساپارى اياسىندا تومەندەگىدەي ەكىجاقتى قۇجاتتارعا قول قويىلدى:
– جەر قويناۋىن پايدالانۋعا قاتىستى ەگەمەندىك قۇقىقتاردى جۇزەگە اسىرۋ ماقساتىندا كاسپي تەڭىزىنىڭ سولتۇستىك بولىگىنىڭ ءتۇبىن مەجەلەۋ تۋرالى قازاقستان رەسپۋبليكاسى مەن رەسەي فەدەراتسياسى اراسىنداعى 1998 جىلعى 6 شىلدەدەگى كەلىسىم حاتتاماسىنا وزگەرىستەر ەنگىزۋ تۋرالى حاتتاما;
– قازاقستان رەسپۋبليكاسى ۇكىمەتى مەن رەسەي فەدەراتسياسى ۇكىمەتى اراسىنداعى اۆياتسيالىق ىزدەستىرۋ جانە قۇتقارۋ سالاسىنداعى ىنتىماقتاستىق تۋرالى كەلىسىم;
– قازاقستان رەسپۋبليكاسىنىڭ اۋماعىنداعى جەر ۋچاسكەسىن پايدالانا وتىرىپ, دومباروۆسكي پوزيتسيالىق اۋدانىنان زىمىراندار ۇشىرۋ كەزىندەگى ءوزارا ءىس-قيمىل ءتارتىبى تۋرالى قازاقستان رەسپۋبليكاسى ۇكىمەتى مەن رەسەي فەدەراتسياسى ۇكىمەتى اراسىنداعى كەلىسىم.
ءلايلا ەدىلقىزى,
«ەگەمەن قازاقستان».
سۋرەتتەردى تۇسىرگەندەر
س.بوندارەنكو, ب.وتارباەۆ.