استانا. 15 قازان. رەسەي فەدەراتسياسىنىڭ پرەزيدەنتى ۆلاديمير ءپۋتيننىڭ قازاقستانعا مەملەكەتتىك ساپارى اياسىندا كەڭەيتىلگەن قۇرامداعى كەلىسسوزدەر ءوتتى. بۇل تۋرالى akorda.kz حابارلادى.
قازاقستان پرەزيدەنتى رەسەي ءبىزدىڭ ەلىمىزدىڭ ستراتەگيالىق سەرىكتەسى ءارى وداقتاسى ەكەنىن اتاپ ءوتتى.
«ءبىز ەۋرازيالىق ەكونوميكالىق وداقتا ءوزارا ىقپالداسىپ وتىرمىز. ەلدەرىمىز ەكىجاقتى بايلانىستار اياسىندا ەكونوميكا, عىلىم جانە گۋمانيتارلىق سالالارداعى جوبالاردى تابىستى جۇزەگە اسىرۋدا. سوعان وراي ءبىز ەكى مەملەكەتتىڭ ىنتىماقتاستىعىنا قوسىمشا سەرپىن بەرەتىن وسى جولعى كەزدەسۋگە ايرىقشا ءمان بەرەمىز», – دەدى ەلباسى.
نۇرسۇلتان نازارباەۆ ءوزارا تاۋار اينالىمى كولەمىنىڭ قازىرگى قۇلدىراۋى الەمدىك ەكونوميكا دامۋىنىڭ كەزەڭدىلىگىنە جانە نەگىزگى ەكسپورتتىق تاۋارلار باعاسىنىڭ تومەندەۋىنە بايلانىستى ۋاقىتشا قۇبىلىس ەكەنىنە نازار اۋداردى.
«ءبىز ۇلتتىق دەڭگەيدە دە, ەاەو اياسىندا دا ۇيلەسىمدى جەدەل شارالار قابىلداۋ قاجەتتىگىن تۇسىنەمىز. ەكونوميكالىق ماسەلەلەردىڭ سالدارىن جەڭىلدەتە ءتۇسۋ ۇشىن رەزەرۆتەردى پايدالانعان ءجون. ەۋرازيالىق ەكونوميكالىق وداق ۇيىمنىڭ بارلىق مۇشەسىنىڭ تەڭقۇقىلىعى جاعدايىندا قىزمەت ەتە الادى, ەلدەرىمىزدىڭ وكىلدەرى بارلىق ەلدەردىڭ مۇددەسىنە وراي جانە ورتاق ەكونوميكالىق ۇستانىمدارعا سايكەس جۇمىس ىستەۋى ءتيىس», – دەدى قازاقستان پرەزيدەنتى.
ۆ.پۋتين ەكىجاقتى قارىم-قاتىناستاردىڭ بارلىق, سونىڭ ىشىندە ساياسات, ەكونوميكا جانە قاۋىپسىزدىك باعىتتارىندا ءتيىمدى دامىپ جاتقانىن ايتتى.
«ءبىز ستاتيستيكالىق كورسەتكىشتەردىڭ ازداپ تومەندەگەنىن بايقاپ وتىرمىز, بىراق ناقتى كولەم تۇرعىسىنان ءىس جۇزىندە وزگەرىس جوق. ءبىز 2013 جىلى قابىلدانعان, 2015 جىلى مەرزىمى اياقتالاتىن ەكىجاقتى جوسپار نەگىزىندە جۇمىس ىستەپ جاتىرمىز. قازىر ءبىزدىڭ ارىپتەستەرىمىز 2016-2018 جىلدارعا ارنالعان بىرلەسكەن جۇمىس جوسپارىن ازىرلەۋدە. ونى جىل اياعىنا دەيىن بەكىتەمىز دەپ ۇمىتتەنەمىن», – دەدى رەسەي پرەزيدەنتى.
ۆ.پۋتين رەسەيدىڭ قازاقستان ەكونوميكاسىنا سالعان ينۆەستيتسيالارى 9 ميلليارد دوللاردان اسقانىن دا اتاپ ءوتتى. قازاقستان مۇنايىنىڭ سىرتقى نارىققا ارنالعان نەگىزگى كولەمى رەسەي اۋماعى ارقىلى وتەدى. سونىمەن قاتار, رەسەي پرەزيدەنتى جوعارى تەحنولوگيالار, ونەركاسىپ, اۋىل شارۋاشىلىعى جانە ەنەرگەتيكا سالالارىندا بىرلەسكەن ءىرى جوبالار بار ەكەنىنە نازار اۋداردى.
ايدار ورىسباەۆ.
دەرەك, سۋرەت: akorda.kz.