استانا. قىتايدىڭ تايپەي اۆتونوميالىق رەسپۋبليكاسىنىڭ تايۋان قالاسىندا ۇيىمداستىرىلعان ازيا-تىنىق مۇحيت ويىندارى اياقتالدى. بۇل تۋرالى «دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنىڭ» ءباسپاسوز قىزمەتكەرى تولەگەن جاكىتاي ۇلى حابارلادى.
الەمنىڭ 33 مەملەكەتىنەن بارعان سۋردوشىلار اراسىندا قازاقستاندىقتار سەگىزىنشى ورىنعا تابان تىرەدى. ۇتقان جۇلدە سانى 12 مەدالعا جەتتى.
«سەگىزىنشى رەت تۋ كوتەرگەن سۋردليمپياداشىلاردىڭ سايىسىنداعى ءبىزدىڭ سپورتشىلارىمىزدىڭ كورسەتكەن ونەرلەرى وسال بولعان جوق. اسىرەسە, العاشقى كۇندەرى تاەكۆاندوشىلار مەن جەڭىل اتلەتشىلەر, سوڭىنان جۇزۋشىلەر جۇلدەلەردى ۋىستاپ الىپ شىقتى. بۇل ساپاردا تەك بادمينتون, فۋتبول, ۇستەل تەننيسىنىڭ سپورتشىلارى ولجاسىز قايتتى. ۇتقان جۇلدەلەردىڭ ۇزىن سانى 12 مەدال. تاراتا ايتساق, 1 التىن, 6 كۇمىس, 5 قولا مەدال», دەدى تولەگەن جاكىتاي ۇلى.
ونىڭ ايتۋىنشا, ءتورت جىلدا ءبىر رەت وتكىزىلەتىن ازيا-تىنىق مۇحيت ويىندارىنان قازاقستان سۋردليمپياداشىلارىنىڭ ەڭ قوماقتى ورالعانى وسى جولى بولدى. تاريحقا كوز جۇگىرتسەك, 1996 جىلى مالايزيادا ۇيىمداستىرىلعان بۇل باسەكەگە قازاقستاندىق سپورتشىلار تۇڭعىش رەت قاتىسىپ, 1 كۇمىس, 4 قولا مەدالمەن ورالىپتى. 2000 جىلعى ازيا-تىنىق مۇحيت ويىندارى ءدال بيىلعىداي قىتايدىڭ تايپەي وڭىرىندە وتكەن. قازاقستان سۋردوشىلار تايپەيدەن بار-جوعى 2 قولا مەدال ۇتقان كورىنەدى. سودان بەلگىسىز سەبەپتەرمەن, تەك 2012 جىلى وڭتۇستىك كورەيادا بولعان ازيا-تىنىق مۇحيت ويىندارىنا عانا قاتىسقان قازاقستاندىقتار تۇڭعىش رەت وسى دودانىڭ التىن مەدالىنا قول جەتكىزگەن. وعان قوسا 2 كۇمىس, 5 قولا مەدال, بارلىعى 8 جۇلدەنى ۋىستاپ قايتادى.
«ەندى مىنە, اراعا 15 جىل سالىپ قىتايدىڭ تايپەي وڭىرىندەگى ازيا-تىنىق مۇحيت ويىندارىنا تاعى قاتىسقان ءبىزدىڭ سۋردوشىلارىمىز وتكەننىڭ ەسەسىن تولتىرىپ قايتقانداي بولدى. العاشقىدا وسى تايپەيدەن تەك 2 قولا مەدال عانا السا, وسى جولى التىن باستاعان 12 مەدالدى ولجالادى. سۋردليمپياداشىلارىمىزعا «جۇلدە قۇتتى بولسىن!» دەيمىز», دەيدى ول.
ازيا-تىنىق مۇحيت ويىندارىنىڭ باس جۇلدەسىن 31 التىن, 32 كۇمىس,25 قولا مەدال ۇتقان جاپوندىقتار تالاسسىز يەمدەندى. ەكىنشى ورىن 29 التىن, 19 كۇمىس, 25 قولا مەدالعا قول جەتكىزگەن تايپەي اۆتونوميالىق رەسپۋبليكاسىنا بۇيىردى. ال, ءۇشىنشى ورىندى 19 التىن, 18 كۇمىس, 15 قولا مەدالمەن شەكتەلگەن قىتاي سۋردليمپياداشىلارى الدى.
بۇل تىزىمدە قازاقستان سپورتشىلارى 1 التىن, 6 كۇمىس, 5 قولا مەدالمەن سەگىزىنشى ورىننان كورىندى.
داستان كەنجالين.
دەرەك, سۋرەت: egemen.kz
سۋرەتتە پاراتاەكۆاندودان 68 كيلو سالماقتا كۇمىس جۇلدەنى جەڭىپ العان تيمۋر كۋلەسوۆ.