اقتوبە. 15 قازان. اقتوبەدەگى مارات وسپانوۆ اتىنداعى مەملەكەتتىك مەديتسينا ۋنيۆەرسيتەتىنىڭ №1 وقۋ كورپۋسى اۋماعىندا جاڭا ستۋدەنتتىك الما باعى اشىلدى. بۇل تۋرالى egemen.kz ءتىلشىسى حابارلادى.
مۇندا وسى جوعارى وقۋ ورنىنىڭ ستۋدەنتتەرى العاشقى 120 ءتۇپ الما اعاشىنىڭ كوشەتتەرىن وتىرعىزدى. كوشەتتەردى ساتىپ الۋعا ۋنيۆەرسيتەتتىڭ كاسىپوداق كوميتەتتى قارجى ءبولىپ, باعالى باستاماعا قولداۋ كورسەتتى. باققا وتىرعىزىلاتىن الما اعاشىنىڭ كوشەتتەرى جەرگىلىكتى جەرگە بەيىمدەلگەن سۇرىپتار. ولار سۋىققا شىدامدى, باسقالاي دا اۋا رايىنىڭ ەرەكشەلىكتەرىنە ءتوزىمدى.
«بۇل اكتسيا قورشاعان ورتانىڭ جاعدايىن جاقسارتۋ ماقساتىندا جانە تاربيەلىك تاعىلىمدىق سيپات الادى. ستۋدەنتتەر جىل سايىن جاس اعاش كوشەتتەرىن وتىرعىزاتىن جانە كۇتىپ باپتايتىن بولادى دەپ جوسپارلاپ وتىرمىز. سوندا ۋنيۆەرسيتەتتەگى وقۋ مەرزىمىندە ادەمى الما اعاشتارى بوي كوتەرىپ, جەمىسىن بەرەدى. بارىنەن بۇرىن باقتىڭ ءسانى كەلەدى. كوشەتتى وتىرعىزعان ستۋدەنت ءوزىنىڭ اتى جازىلعان لەنتا بايلايدى, كوشەتتىڭ تامىر تارتىپ, ءوسىپ كەتۋىن جاۋاپكەرشىلىگىنە الادى. بۇل بولاشاق دارىگەرلەردىڭ بويىندا ولارعا اسا قاجەتتى جاۋاپكەرشىلىك سەزىمىن قالىپتاستىرۋعا ىقپال ەتەدى. وسىلاي ستۋدەنت تەك ءوزى وقىعان ۋنيۆەرسيتەت تاريحىنا ءىز قالدىرىپ قانا قويماي, قالانى كوگالداندىرۋعا دا ۇلەس قوسادى», – دەيدى ۋنيۆەرسيتەت كاسىپوداق كوميتەتىنىڭ توراعاسى جانگەلدى شايمىبەتوۆ.
ساتىبالدى ءساۋىرباي.
دەرەك, سۋرەت: egemen.kz.