ەلباسى كورنەكتى مەملەكەت جانە قوعام قايراتكەرى نۇرلان بالعىمباەۆتىڭ قايتىس بولۋىنا بايلانىستى ونىڭ تۋعان-تۋىستارى مەن جاقىندارىنا كوڭىل ايتۋ جەدەلحاتىن جولدادى, دەپ حابارلادى پرەزيدەنتتىڭ ءباسپاسوز قىزمەتى.
نۇرسۇلتان نازارباەۆ ن.بالعىمباەۆتىڭ قايتىس بولۋىنا بايلانىستى اۋىر قايعىعا ورتاقتاسىپ, كوڭىل ايتتى.
جەدەلحاتتا مەملەكەتتىك باسقارۋ جانە ەكونوميكا سالاسىنداعى ءىرى قايراتكەردىڭ ءبىرى بولعان ن.بالعىمباەۆتىڭ بار ءبىلىمى مەن تاجىريبەسىن ەلدىڭ ءوسىپ-وركەندەۋىنە ارناعانى اتاپ وتىلگەن. ەڭبەك جولىن مۇناي سالاسىندا قاراپايىم جۇمىسشى بولۋدان باستاپ, ۇدايى وقىپ-ىزدەنۋى مەن ۇيىمداستىرۋشىلىق قابىلەتى ارقاسىندا بيىك بەلەستەردى باعىندىردى, قازاقستان رەسپۋبليكاسىنىڭ پرەمەر-ءمينيسترى لاۋازىمىنا دەيىن كوتەرىلدى. بۇل قىزمەتتى ول زور جاۋاپكەرشىلىكپەن اتقاردى.
«ءوز وتانى مەن حالقىن قالتقىسىز سۇيگەن ن.بالعىمباەۆتىڭ بولمىسىنا قاراپايىمدىق پەن زيالىلىق, ناعىز بەكزاتتىق ءتان ەدى. حالقىمىز ونىڭ ەسىمى مەن ەڭبەگىن ۇمىتپاي, ءاردايىم قاستەر تۇتاتىن بولادى», – دەلىنگەن كوڭىل ايتۋ جەدەلحاتىندا.