ءماجىلىس توراعاسى قابيبوللا جاقىپوۆ گرۋزيانىڭ قازاقستانداعى توتەنشە جانە وكىلەتتى ەلشىسى زۋراب پاتارادزەنى قابىلدادى, دەپ حابارلادى وسى پالاتانىڭ ءباسپاسوز قىزمەتى.
كەزدەسۋ بارىسىندا تاراپتار ساۋدا-ەكونوميكالىق, كولىكتىك-لوگيستيكالىق, مادەني-گۋمانيتارلىق سالالارداعى قازاقستان-گرۋزيا ىنتىماقتاستىعىنىڭ وزەكتى ماسەلەلەرىن تالقىلادى.
زۋراب پاتارادزەنىڭ اتاپ وتكەنىندەي, قازاقستان گرۋزيانىڭ ەڭ ءىرى ينۆەستورلارىنىڭ ءبىرى. اتالعان ەلدە 100-گە جۋىق قازاقستاندىق كومپانيالار تىركەلگەن.
ق. جاقىپوۆ پەن ز. پاتارادزە ءوزارا ءىس-قيمىل باسىمدىقتارى تۋرالى ءسوز ەتكەندە, قازاقستان پرەزيدەنتىنىڭ 5 ينستيتۋتتىق رەفورماسىن جۇزەگە اسىرۋدىڭ ماڭىزدىلىعىنا توقتالدى. اتاپ ايتقاندا, ازيادان ەۋروپاعا كەدەرگىسىز جۇك تاسىمالىن جۇزەگە اسىرۋعا مۇمكىندىك بەرەتىن «ەۋرازيالىق ترانسقۇرلىقتىق ءدالىز» جوباسىنا قازاقستان مەن گرۋزيانىڭ قاتىسۋى توڭىرەگىندە اڭگىمە قوزعالدى.
كەزدەسۋ يەلەرى ەكىجاقتى پارلامەنتارالىق ىنتىماقتاستىقتى نىعايتۋ ماسەلەلەرىن دە نازاردان تىس قالدىرماي, ەكى ەل پارلامەنتتەرىندە جۇمىس ىستەيتىن بەيىندى كوميتەتتەر مەن دوستىق توپتارى ارقىلى قارىم-قاتىناستى نىعايتا ءتۇسۋ كەرەكتىگىن العا تارتتى.