كەشە قازاقستان رەسپۋبليكاسى پرەمەر-ءمينيسترىنىڭ ءبىرىنشى ورىنباسارى باقىتجان ساعىنتاەۆ رەسەي فەدەراتسياسى ۇكىمەتى توراعاسىنىڭ ءبىرىنشى ورىنباسارى يگور شۋۆالوۆپەن كەزدەستى, دەپ حابارلادى پرەمەر-ءمينيستردىڭ ءباسپاسوز قىزمەتى.
بۇل كەزدەسۋ رەسەي پرەزيدەنتى ۆلاديمير ءپۋتيننىڭ قازاقستانعا مەملەكەتتىك ساپارى قارساڭىندا ءوتىپ وتىر.
قازاقستان رەسپۋبليكاسى مەن رەسەي فەدەراتسياسى اراسىنداعى ىنتىماقتاستىق جونىندەگى ۇكىمەتارالىق كوميسسيانىڭ تەڭ توراعالارى باقىتجان ساعىنتاەۆ پەن يگور شۋۆالوۆ ەكىجاقتى ءارىپتەستىكتىڭ, سونىڭ ىشىندە وتىن-ەنەرگەتيكا كەشەنى, ونەركاسىپ, اتوم ەنەرگياسى, كولىك سالالارىنداعى ارىپتەستىكتىڭ كەڭ اۋقىمدى ماسەلەلەرىن تالقىلادى.
كەزدەسۋ بارىسىندا سونداي-اق, قازاقستاننىڭ دسۇ-عا وتۋدە قابىلداعان مىندەتتەمەلەرى جانە ولاردى ەۋرازيالىق ەكونوميكالىق وداقتىڭ كەلىسىمشارتتىق بازاسىنا يمپلەمەنتاتسيالاۋ جايى تالقىلاندى.
تاراپتار ءوزارا ىنتىماقتاستىقتى كۇشەيتۋ, سونىڭ ىشىندە ەاەو شەڭبەرىندە كۇشەيتۋ ءۇشىن ايتارلىقتاي الەۋەتتىڭ بار ەكەنىن اتاپ كورسەتتى.