ەلدىككە ەڭبەك ەتكەن
عاسىردان استام ۋاقىت ىشىندە ۇلتتىق ءتول ۇعىمىمىزعا اينالىپ ۇلگەرگەن مۇناي دەگەن ءسوز ويعا ورالسا, الدىمەن ەسكە تۇسەتىن ساناۋلى شاڭىراقتاردىڭ ءبىرى بالعىمباەۆتار اۋلەتى ەدى. بۇعان دەيىن بۇرعى مەن ۇڭعىعا باۋىر باسىپ قالعان قالىڭ قاۋىم العا قازداي ءتىزىلىپ, قاتار ادىمداپ الدا جۇرەتىن اعالى-ءىنىلى وتەپ, سالتانات, ماقاش دەيتىن ايگىلى ارىپتەستەرىنەن ايىرىلىپ, ورنى تولماس قازاعا ۇشىراپ, قاپى سوعىپ قالعان-دى. سوندا اتاقتى ۇرپاقتىڭ اكە ورنىن بالا, اعا ورنىن ءىنى باسىپ, ەڭبەكتەرىمەن كوگەرگەن كوسەگەلەرى ءبىر مىسقال دا ورتايماپ ەدى. بۇل جولى تەك بالعىمباەۆتار شاڭىراعىنداعى جاس بۋىن, جاڭا ۇرپاق قانا ەمەس, بۇكىل قازاق ەكونوميكاسى, ەلىمىزدىڭ اتىن شىعارىپ, ابىرويىن اسىرىپ وتىرعان مۇناي ونەركاسىبى, كۇننەن كۇنگە وركەندەپ ءوسىپ جاتقان عىلىمي-تەحنيكالىق ويىمىز اۋىر قازاعا ۇشىرادى. ارامىزدان تەپسە تەمىر ۇزەتىن دەر شاعىندا نۇرلان كەتتى. جاستايىنان ول ءوز اۋلەتىنىڭ جولىن قۋىپ, ءداستۇرىن جالعاستىردى. جەم, جايىق, ماڭعىستاۋ دالالارىنىڭ تۇڭعيىقتارىنا بويلاپ, جاڭا كەن ورىندارىن تاپتى. تۋعان جەردىڭ قازىنا بايلىقتارىن زەرتتەپ, عىلىم دوكتورى اتاندى. الەمدىك تاجىريبەگە دە دەر كەزىندە قۇلاش سەرمەدى. اقش-تا تاجىريبەدەن ءوتتى. ءالى بەيتانىس نارىق ەكونوميكاسىن تەرەڭدەپ بويعا سىڭىرۋگە كۇش جۇمسادى. اسا اۋىر جىلداردا مۇناي ونەركاسىبى ءمينيسترى, ۇلتتىق مۇناي جانە گاز كومپانياسىنىڭ پرەزيدەنتى بولدى. ۇلتتىق ۇكىمەتىمىزدى باسقارىپ, كوپسالالى دەربەس ەكونوميكامىزدىڭ ويداعىداي قالىپتاسۋىنا ايانباي ەڭبەك ەتتى. ەلوردا توسىندە جاڭا استانا ورنىعۋىنا ۇلەس قوستى. ەلدىككە ەڭبەك ەتكەن اياۋلى ازاماتىمىز, كورنەكتى مەملەكەت قايراتكەرى, قازاق حالقىنىڭ ماڭدايى جارقىراعان تاماشا ۇلى نۇرلان بالعىمباەۆتىڭ ابزال بەينەسى ەسىمىزدەن كەتپەك ەمەس. ءابىش كەكىلباي ۇلى, قازاقستاننىڭ ەڭبەك ەرى.ادامگەرشىلىك قالپىنان اينىماعان جان
نۇرلان وتەپ ۇلى ۇلكەن ازامات ەدى. ءبىز ەلىمىزدىڭ تاعى ءبىر كورنەكتى قايراتكەرىنەن, بارشامىز ەرەكشە قادىرلەيتىن باۋىرىمىزدان ايىرىلدىق. سۇم اجال ايتىپ كەلەدى دەيمىسىڭ. دەسە دە, حالقىمىزدىڭ جايساڭ دا جاناشىر جىگىتىنەن وسىلاي قاپىلىستا كوز جازىپ قالامىز دەگەن وي ءۇش ۇيىقتاساق تۇسىمىزگە كىرگەن ەمەس. نۇرلان باۋىرىمىز ۇكىمەتتى دە, مۇناي سالاسىن دا باسقاردى, مينيستر دە بولدى. قانداي ۇلكەن قىزمەتتە جۇرسە دە شىرەنگەن ەمەس, ادامگەرشىلىك قالپىنان اينىعان جوق. ۇلكەنگە – ءىنى, كىشىگە – اعا بولا ءبىلدى. جانى تازا دا جايساڭ, كوپشىل ءارى قاراپايىم, قادىرلى دە ادامگەرشىلىگى مول جان ەدى. ابزال ازامات ەشقاشان الدىمىزدى كەسىپ وتپەدى. جان دۇنيەسىمەن ادەمى ءارى ءازىل-قالجىڭى دا جاراسىپ تۇراتىن. مەنىمەن بىردە كۇيەۋ, بىردە بالدىز بولىپ قالجىڭداساتىن. نۇرلان باۋىرىم بۇكىل ءومىرىن ەلىنە ادال قىزمەت ەتۋگە, مۇناي وندىرۋگە ارنادى. باتىس قازاقستان ولكەسى بۇگىندە جايناپ, بايلىققا كەنەلىپ جاتسا, سول نۇرلان سەكىلدى مۇنايشى اۋلەتتەردىڭ ارقاسى. ارالاساتىنبىز, سىيلاسۋشى ەدىك, امال نە. جاتقان جەرىڭ – جايلى, توپىراعىن تورقا بولسىن. ەل-جۇرتىڭ, وتباسىڭ امان بولسىن, باۋىرىم نۇرلان. قوش, الدىڭنان جارىلقاسىن! مىرزاتاي جولداسبەكوۆ.جارقىن بەينەسى جادىمىزدان وشپەيدى
نۇرلان وتەپ ۇلى... جانى جايدارى جان بولاتىن. ول ەلىمىزدىڭ پرەمەر-مينيسترلىگىنە تاعايىندالعالى بەرى بىرگە قىزمەت ىستەدىك. قانداي جاعدايدا دا ءبىر ءسوزدى, ايتقانىنان قايتپايتىن, ويىنداعىسىن ۇلكەن ىجداعاتپەن جۇزەگە اسىرا بىلەتىن بىلىكتى مامان بولدى. ۇكىمەتتى قيىن كەزەڭدەردە باسقارىپ, مەملەكەتتى ەكونوميكالىق داعدارىستان ابىرويمەن الىپ شىقتى. ەشبىر جەردە ەكى سويلەگەنىن كورمەپپىز. ۇنەمى ايتقان ءسوزىن مۇلتىكسىز ورىنداۋعا تىرىساتىن تاباندى باسشىنىڭ ءبىرى بولدى. جاڭا مىڭجىلدىقتىڭ قارساڭىنداعى قيىندىقتاردا مەملەكەت باسشىسىنىڭ قاسىنان تابىلىپ, تاۋەلسىز قازاقستاننىڭ قالىپتاسۋىنا كوپ ەڭبەك ءسىڭىردى. شىندىعىن ايتقاندا, ۇكىمەتكە ۇلكەن جاۋاپكەرشىلىك ارتىلعان سول جىلداردا كەيبىر ەلدەردىڭ «كورەگەن» ساياساتكەرلەرىنىڭ بىرقاتارى قازاقتىڭ مەملەكەت قۇرا الاتىنىنا كۇمانمەن قاراپ, جەڭىل سوزدەر ايتقانى ءمالىم. سول جاڭساق پىكىرلەردى جوققا شىعارىپ, قازاقتىڭ قايراتتى ءارى پاراساتتى ۇلت ەكەنىن سوزىمەن دە, ىسىمەن دە تولىق دالەلدەپ بەرگەن تۇلعالى قايراتكەرلەرىمىزدىڭ ءبىرى وسى نۇرلان بالعىمباەۆ دەسەك قاتەلەسپەيمىز. ءوزى كاسىبي مۇنايشى بولعان سوڭ, سول جىلدارى ەكونوميكانى كوتەرىپ جىبەرۋگە سول سالانى دۇرىس پايدالانا بىلگەنى راس. وكىنىشتىسى, ءوزىمىز جاقسى كورەتىن, بىلەتىن نۇرلان وتەپ ۇلىنىڭ قازاسىن ەستۋ بارىمىزگە دە اۋىر سوعىپ تۇر. مارقۇمنىڭ يمانى سالاۋات, توپىراعى تورقا, جاتقان جەرى جايلى بولسىن. ونىڭ جارقىن بەينەسى ەشقاشان جادىمىزدان وشپەيدى. ورالباي ابدىكارىموۆ.اجالدان عانا جەڭىلگەن ازامات
حالقىمىز نار تۇلعالى ازاماتىنان ايىرىلدى. مەملەكەت قايراتكەرى, دارابوز مۇنايشى نۇرلان بالعىمباەۆ 68 جاسقا قاراعان شاعىندا ومىردەن وزدى. نۇرلان وتەپ ۇلى تاۋەلسىزدىگىمىزدىڭ كەشەگى قيىن-قىستاۋ كەزەڭىندە ەل جۇگىن ەلباسىمەن بىرگە كوتەرىسكەن ءىرى تۇلعا بولاتىن. مۇناي-گاز ءوندىرىسىنىڭ دامۋىنا ولشەۋسىز ۇلەس قوستى. پرەمەر-مينيستر قىزمەتىندە جۇرگەندە قۋاتتى رەفورمالاردىڭ جۇزەگە اسۋىنا بارىنشا كۇش سالدى. قاي لاۋازىمدا جۇرسە دە ۇلتتىق مۇددەنى العاشقى ورىنعا قوياتىن. شەتەلدىك كومپانيالارمەن قويان-قولتىق جۇمىس بارىسىندا نۇرلان بالعىمباەۆتىڭ ۇلتجاندىلىعى سەزىلىپ تۇراتىن. اۋىر قايعى قازاق حالقىنىڭ قابىرعاسىن قايىستىردى. اتىراۋ جۇرتى اسىل ازاماتىن ازالاپ جاتىر. كەسەك مىنەز, كەسكەكتى ەردىڭ سويى ەدى. جاراتىلىسى جەڭىلۋ دەگەندى بىلمەيتىن. اجالدان عانا جەڭىلدى. ونىڭ ازاماتتىق كەلبەتى, ىسكەرلىگى مەن جان شۋاعى جادىمىزدا وشپەستەي ساقتالادى. باقتىقوجا ىزمۇحامبەتوۆ, اتىراۋ وبلىسىنىڭ اكىمى.باقۇل بول, ءىنى-دوس!
ءبىز ءبىر اۋىلدا تۋىپ, بىرگە وستىك. اكە-شەشەلەرىمىز دە ءبىر-ءبىرىن جاقسى ءبىلۋشى ەدى. ول دا مۇنايشىلار اۋلەتىنىڭ وكىلى بولاتىن. بالعىمباي قاريانىڭ تۇڭعىش ۇلى قويشىعارا دا, ودان كەيىنگى وتەپ پەن ءوتالى دە, سالتانات پەن ماقاش تا مۇنايشىلىق كاسىپتى جەتىك مەڭگەرگەن جاندار-تىن. ولار ەل ەكونوميكاسىنىڭ جەتەكشى بۋىنىنا اينالعان مۇناي-گاز سالاسىنىڭ وركەندەۋىنە بار ءبىلىمى مەن بىلىگىن سالا ەڭبەك ەتتى. بالعىمباي قاريانىڭ مۇنايشى ۇلدارىنىڭ شەجىرەلى جولىن جالعاستىرۋدى ماقسات تۇتقان نۇرلان دا وسى كاسىپتىڭ يەسى بولۋدى قالادى. بالا كۇنىنەن العىر دا زەرەك, بىلىمگە قۇشتار ول مۇناي ينستيتۋتىن ءبىتىردى. العاشقى ەڭبەك جولىن اتىراۋداعى كەن ورنىنان باستاپ, الدىڭعى تولقىن مۇنايشىلاردىڭ تالىمىنەن, تاجىريبەسىنەن ۇيرەندى. اق الماستاي جارقىلداعان مىنەزدى ازامات ەدى. وداقتىق مۇناي-گاز مينيسترلىگىنىڭ باسشىلارى دا ونىمەن اقىلداسىپ, ساناسىپ وتىراتىن. بىلىمدىلىگىمەن سالا باسشىلارىن, عالىمداردى مويىنداتقان ول وداقتىق مۇناي-گاز مينيسترلىگىندە جاۋاپتى قىزمەتتەر اتقاردى. سول جىلدارى «تەڭىز» مۇناي كەنىشىن يگەرۋگە جەتەكشىلىك ەتىپ, «تەڭىزشەۆرويل» بىرلەسكەن كاسىپورنىن قۇرۋعا اتسالىستى. ەلىمىز تاۋەلسىزدىك العان تۇستا قازاقستانعا ورالىپ, وتاندىق مۇناي-گاز ونەركاسىبىن وركەندەتۋگە بەل شەشە كىرىستى. رەسپۋبليكا مۇناي-گاز ونەركاسىبىن قارقىندى دامىتۋعا ءبىلىمىن دە, كۇش-قۋاتىن اياماي جۇمسادى. ءار مۇنايشىمەن سىرلاس ەدى. تەك ءوزى قالاعان سالانىڭ عانا ەمەس, تاۋەلسىز ەلىنىڭ كەمەل كەلەشەگى ءۇشىن ايانباي, ادال ەڭبەك ەتتى. ونىڭ ىسكەرلىگى مەن ۇيىمداستىرۋشىلىعى, ەكونوميكانى باسقارا بىلەتىن مەنەدجەرلىگى پرەمەر-مينيستر لاۋازىمىندا بولعاندا قانداي جارقىراي كورىندى دەسەڭشى. قاتارداعى مۇنايشىدان كورنەكتى مەملەكەت جانە قوعام قايراتكەرىنە دەيىنگى ءومىر جولىندا وتانىنا دەگەن ادالدىقتان اينىعان جوق. ءبىر-ءبىرىمىزدى بالا كۇنىمىزدەن جاقسى بىلگەن بولساق, ءومىر بەلەستەرىندە ءبىر سالادا ەڭبەك ەتتىك. كوڭىلى قازاقتىڭ كەڭ دالاسىنداي دارقان, پاراسات پەن پايىمى جوعارى ازامات ەدىڭ. دوستىققا ادال ەدىڭ عوي, نۇرلان باۋىرىم! باقۇل بول, ءىنى-دوس! راۆيل شىرداباەۆ.تاۋەلسىزدىك تۋدىرعان تۇلعا
قازاق مۇنايىنا قىرۋار ەڭبەك سىڭىرگەن بالعىمباەۆتار اۋلەتىنىڭ ماڭدايىنا باسقان ۇلى نۇرلان وتەپ ۇلى دۇنيەدەن ءوتتى. ول – قازاقستاننىڭ تاۋەلسىزدىك العاننان كەيىنگى كەزەڭدەگى كورنەكتى تۇلعالاردىڭ ءبىرى. نۇرلان بالعىمباەۆ سوڭعى 20 جىلدىڭ ىشىندە قازاقستان ونەركاسىبىنىڭ وركەندەۋىنە ءبىر كىسىدەي ەڭبەك سىڭىرگەن ادام. ول مەملەكەت باسشىسىنىڭ ەڭ سەنىمدى كومەكشىلەرىنىڭ ءبىرى بولا ءبىلدى. ءبىز بىلەتىن نۇرلان بالعىمباەۆ وتە ءادىل, دوسقا قامقور, ءبىر ءسوزدى, ۋادەگە بەرىك ازامات بولاتىن. باسقاسىن ايتپاعاندا, نۇرلان وتەپ ۇلى ءوزىنىڭ ەڭبەك جولىندا دوسسور, ماقات سەكىلدى مۇناي كەن ورىندارىنىڭ كوركەيۋىنە, ونداعى ينفراقۇرىلىمنىڭ دامۋىنا ەرەكشە كوڭىل ءبولدى. سونداي-اق, تۋعان قالاسى اتىراۋدا دا ونىڭ قامقور قولىنىڭ ءىزىن انىق كورۋگە بولادى. اتالعان وبلىس ورتالىعىنداعى زامان تالابىنا ساي جابدىقتالعان ۇلكەن سپورت كەشەندەرى وسى نۇرلان وتەپ ۇلىنىڭ قولداپ, قۋاتتاۋىمەن بوي كوتەرگەن ەدى. ول كىسى ونەردى, ادەبيەتتى قاتتى قۇرمەتتەيتىن, جانىنا جاقىن تۇتاتىن. سوندىقتان دا, ەلىمىزدىڭ رۋحاني ءومىرىنىڭ دامۋىنا ۇلەس قوسىپ جۇرگەن وتانداستارىنا كومەك قولىن سوزۋدى ءوزىنىڭ ازاماتتىق بورىشى سانايتىن. قازاقستاننىڭ دامۋى جولىندا ايانباي ەڭبەك ەتكەن نۇرلان بالعىمباەۆتىڭ جارقىن بەينەسى جۇرەگىمىزدە ۇزاق ساقتالادى. جانى ءجانناتتا بولسىن. مەرەكە قۇلكەنوۆ, جازۋشى. الماتى.قازانات ەدى قايىرىلماي شاپقان ارتىنا
الاشتىڭ ارداكۇرەڭ تۇلعاسى, قازاقتىڭ ءبىرتۋار پەرزەنتى, ەلوردانى سارىارقانىڭ بەلىنە, تۋعان ەلدىڭ تورىنە كوشىرىپ قوندىرۋدا ەلباسىمىز نۇرسۇلتان ءابىش ۇلى نازارباەۆتىڭ وڭ قولى بولىپ ون سان قىزمەت اتقارعان, سەنىمدى سەرىگى بولىپ, ساردارلىق قولتاڭبا كورسەتكەن نۇرلان اعامىز ومىردەن ءوتتى دەگەن ىزعارلى حابار بويدى قارىپ, بولمىستى توڭدىردى. اجالدىڭ اقيقاتىنا توسقاۋىل قويار تاريحات, مۇڭىڭدى اشار ماعريپات قايدان بولسىن. تەك قانا: «بۇل ءولىم قايدا جوق, جارقىراعان ايدا جوق, كۇركىرەگەن كۇندە جوق, وتەرى ءوتىپ كەتكەن سوڭ, مىڭ تەڭگەلىك قايعىدان, ءبىر تەڭگەلىك پايدا جوق», دەگەن بابالار ءسوزىن مالدانىپ, جان-جاعىڭدى قارمانىپ, ساۋلەلى سوزگە الدانىپ, ورنىندا بار وڭالار دەپ ءوزىڭدى ءوزىڭ جۇباتاسىڭ. بابالار سوزىنە باپ قوسىپ قايتەمىز, دەگەنمەن, «مىڭ تەڭگەلىك قايعىنىڭ ميلليون تەڭگەلىك سالماعى» بار ەكەنىن وسىنداي كەزدە سەزىنەسىڭ. بۇدان ەكى جىلداي ۋاقىت بۇرىن نۇرلان اعاما سالەمدەسە بارعانىمدا انشەيىندە جانارى جارقىلداپ, جاعاسى جايلاۋدا وتىراتىن ول كىسىنىڭ جۇزىندەگى نۇر ءسال سولعىن تارتقانداي كورىندى. قازبالاپ سۇراساڭ قاعىپ تاستايتىن مىنەزىن بىلگەندىكتەن, وراعىتىپ ءسوز باستاپ ەدىم, «مەن اۋىرىپ قالدىم, اناۋ-مىناۋعا بوي الدىرمايتىنىمدى بىلەسىڭ عوي, بىلە ءجۇر, الدا اياۋسىز شايقاس, الاپات كۇرەس تۇرعان سەكىلدى» دەپ سالقىنداۋ جىميدى. «اۋىرىپ تۇردىڭ, اۋناپ تۇردىڭ دەگەن عوي, اعا» دەپ كوڭىل اۋانىنا قاراي كولدەنەڭ تارتىپ ەدىم, «جاسىراتىن نە بار, بولارى بولار, بوياۋى سىڭەر» دەپ قىسقا قايىردى. وسىدان ءۇش اپتاداي بۇرىن اتىراۋ جاقتان تاعى ءبىر سالقىنداۋ ءسوز جەتكەن. اعامىز تۋعان توپىراعىنا تابان تىرەپ, اعايىن-تۋمانىڭ كوڭىلىن قوبالجىتىپ جاتىر دەگەن سوڭ, جايىق بويىنا جەدەل جەتتىم. قايسار مىنەزدى قايران اعا, قاباعىن اشىپ, باۋىرىنا باسىپ, جارقىلداپ سويلەمەسە دە, جاسىماي قابىلداپ, بەتىمىزدەن ءسۇيىپ, تورگى ۇيىندە تىك وتىردى. قۋانىپ قالدىق, ءتىپتى ءاپ تۇرىپ, ارعىماعىنا قول سوزىپ, قۇيرىق-جالىن توگىلتىپ, قۇيعىتىپ شاۋىپ كەتەردەي كورىپ, كوڭىلدى بىرلەپ, تويعا شاقىرۋعا دا رەت تاپتىق. تەك قوشتاسار ساتتە, ورنىنان باياعى ادەتىنشە جەڭىل ىرعىپ تۇرىپ, زالدىڭ ورتاسىنا جەتە بەرە: «وتەگەن, بەرى كەل, ايتار ءسوزىم بار», دەپ شاقىرعاندا تويعا كەلىپ قالار دەگەن دامە كوڭىل باس كوتەرىپ, كوڭىل اسپانىم ك ۇلىمسىرەپ قالىپ ەدى. «باۋىرىم, مەن شارشادىم, جەڭىلمەيىن دەپ كۇرەستىم, جەڭە المايتىنىمدى سەزدىم, سەنىڭ تويىڭدى اشامىن دەگەن ۋادەم بار ەدى, اللانىڭ ىسىنە ادام نە ىستەي الادى؟ الىستان حابار الىپ, اڭداپ جۇرگەيسىڭ. ەشكىمگە ەشنارسە دەمەي-اق قوي, مەنىڭ قۇلپىتاسىما جازىلار ءبىر شۋماق ولەڭ جاز, ۇزاتپاي جىبەر» دەپ, جاۋتاڭداپ قاراي بەرگەن مەنى باۋىرىنا تارتتى. «قۇداي قۋات بەرسىن, اعا, ءالى-اق تۇرىپ كەتەسىز», دەي بەرگەنىمدە, «بولدى, جولدارىڭ بولسىن, بالالارىڭ باقىتتى بولسىن, تاپسىرمانى تەز ورىندا» دەپ قىسقا قايىردى. اعانىڭ مىنەزىن بىلگەندىكتەن ەندى ەشتەڭە ايتا المادىم. تۇڭعيىق ويعا باتىپ, تۇنجىراپ اتتاندىم. ارادا 3-4 كۇن وتكەندە تەلەفونمەن حابارلاسىپ ەدىم, قىسقا اماندىق-ساۋلىقتان سوڭ: «تاپسىرمام نە بولدى؟» دەپ قادالا سۇرادى. سول كۇنى جانىم جابىرقاپ وتىرىپ, ءبىر شۋماق جىر جازدىم دا: «اعا, تاپسىرماڭىزدى ورىنداماسقا امالىم قايسى», دەپ ينتەرنەت ارقىلى جازعانىمدى جولداۋعا ءماجبۇر بولدىم. الىپ, حابارلاستى. ۇنادى, ۇنامادى دەگەن ءسوز بولعان جوق. بىراق, كوڭىلىمدە نۇرەكەڭ اۋرۋعا بوي بەرمەي تۇرىپ كەتەر دەگەن ءۇمىت ءبىر ساتكە دە ۇزىلگەن جوق. قارالى حابار جەتكەندە دە سەنە الماي وتىرعان جايىم بار. ولىمگە قيار ادام ەمەس ەدى. ودان ءومىردىڭ ەركە شۋاعى ارقاشان ەسىپ تۇراتىن. كورگەندە ك ۇلىمسىرەپ, باۋىرىنا تارتىپ, اعالىق مەيىرىمىن اق نۇرعا وراپ جەتكىزەتىن ونىڭ نۇرلى ءجۇزىن ەندى كورە المايتىنىمىز قانداي وكىنىشتى. نۇرەكەڭ ماعان قۇيرىق جالى توگىلىپ, ەڭىسكە قاراي ەمىنىپ, شاڭى شاڭقان كورىنىپ, باۋىرىن جازىپ, بەرىلىپ بارا جاتقان اق جال ارعىماق, قايىرىلماي شاپقان قازاناتتاي كورىنەتىن ەدى. اقىرەتتىك كەرمەسى اللانىڭ ءجاننات باعىنان تارتىلىپ, پايعامباردىڭ شاپاعاتىنا بولەنە بەرگەي. «ءولدى دەۋگە بولا ما, ويلاڭدارشى», دەگەن ابىز ابايدىڭ ماڭگىلىك سۇراعىنا: «ولمەيتىن ءىسى, وشپەيتىن ءىزى بار ءبىر ادام نۇرلان وتەپ ۇلى بولار», دەپ كوڭىل جۇباتىپ, تۋعان-تۋىستارىنا, باۋىرلارىما كوڭىل ايتامىن. وتەگەن ورالباي ۇلى.