كەشە ورتالىق كوممۋنيكاتسيالار قىزمەتىندە «نۇرلى جول» باعدارلاماسى اياسىندا اۆتوكولىك جولدارىن سالۋ مەن قايتا جاڭعىرتۋ تاقىرىبىنا ارنالعان ءباسپاسوز ءماسليحاتى بولىپ ءوتتى.
وندا ءسوز العان ينۆەستيتسيالار جانە دامۋ مينيسترلىگى اۆتوكولىك جولدارى كوميتەتى توراعاسىنىڭ ورىنباسارى امانگەلدى بەكوۆ 2020 جىلعا دەيىن 30 مىڭ شاقىرىمنان استام اۆتوكولىك جولدارىن جوندەۋ جۇمىستارىمەن قامتۋ كوزدەلىنىپ وتىرعاندىعىن, ءسويتىپ وسى ۋاقىت ارالىعىندا جولداردىڭ 81 پايىزىنىڭ جاعدايى جاقسارتىلاتىندىعىن مالىمدەدى.
ونىڭ بايانداۋى بويىنشا, «سامارا – شىمكەنت», «استراحان – اتىراۋ – اقتاۋ – تۇرىكمەنستان شەكاراسى», «الماتى – قاراعاندى – استانا – پەتروپاۆل – رەسەي فەدەراتسياسىنىڭ شەكاراسى», «تاشكەنت – شىمكەنت – تاراز – الماتى – قورعاس», «ومبى – پاۆلودار – مايقاپشاعاي», «استانا – قوستاناي – چەليابى», سونداي-اق, «باتىس ەۋروپا – باتىس قىتاي» سەكىلدى نەگىزگى حالىقارالىق دالىزدەردى سالۋ جانە قايتا جاڭعىرتۋ جۇمىستارى وسى مەرزىمدە اياقتالىپ بولادى. وسىنداي جۇرگىزىلگەن جۇمىستاردىڭ ناتيجەسىندە ترانزيت جۇكتەردىڭ كولەمى 3,5 ميلليون تونناعا دەيىن ارتىپ, جۇك تاسىمالداۋ اۋقىمى 2,5 ەسەگە وسەدى دەپ كۇتىلۋدە. ءسويتىپ, قازاقستان قىتاي, رەسەي جانە ورتالىق ازيا ەلدەرىنەن كولىك اعىنىن تارتۋشى ورتالىقازيالىق ترانزيتتىك ءدالىز رەتىندەگى ءوز ورنىن بۇرىنعىعا قاراعاندا الدەقايدا نىعايتا تۇسەتىن بولادى.
ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا «قازاۆتوجول» ۇك باسقارما توراعاسىنىڭ ورىنباسارى ۇلان ءالىپوۆ رەسپۋبليكالىق ماڭىزى بار اۆتوكولىك جولدارىنىڭ بويىنداعى سەرۆيستىك قىزمەتتەردى دامىتۋ باعدارلاماسىن قابىلداۋ مەرزىمى جەدەلدەتىلەتىندىگىن جەتكىزدى. ونىڭ ايتۋى بويىنشا, 2020 جىلعا دەيىنگى مەرزىمگە ارنالعان بۇل باعدارلاما ازىرلەنىپ, ۇكىمەتتىڭ قاراۋىنا تاپسىرىلعان. وسى قۇجات بويىنشا جولدار بويىندا 200 سەرۆيستىك قىزمەت نىسانى سالىنادى. ءسويتىپ, ەكى مىڭنان استام جەرگىلىكتى تۇرعىندار جاڭا جۇمىس ورىندارىمەن قامتاماسىز ەتىلەدى. ەكىنشى جاعىنان العاندا, مۇنىڭ ءوزى حالىقارالىق كولىك اعىمدارىندا قازاقستان جولدارىنىڭ تارتىمدىلىعىن ارتتىراتىن بولادى.
ۇلان ءالىپوۆ سونداي-اق, قازاقستاندا 2020 جىلعا دەيىن 7 مىڭ شاقىرىمعا تارتا اۆتوجولدار اقىلى بولاتىندىعىن ءمالىم ەتتى. «جوسپار بويىنشا 2020 جىلعا دەيىن رەسپۋبليكاداعى 7 مىڭ شاقىرىمعا جۋىق جولداردى اقىلى نەگىزگە وتكىزۋدى قاراستىرۋدامىز. كەلەسى جىلى ەكى ۋچاسكەدە – «استانا-اتباسار» جانە «قىزىلوردا-شىمكەنت» ۋچاسكەلەرىندە اقىلى نەگىزدە قىزمەت كورسەتۋدى ەنگىزۋ كوزدەلۋدە», – دەدى ول.
ۇ. ءالىپوۆتىڭ سوزىنە قاراعاندا, «استانا-اتباسار» جولىندا تەك جۇك كولىكتەرىنەن اقى الىنسا, «قىزىلوردا – شىمكەنت» جولى بارلىق كولىك تۇرلەرى ءۇشىن اقىلى بولادى دەپ كۇتىلۋدە.
سونداي-اق, ورتالىق كوممۋنيكاتسيالار قىزمەتىندە وتكەن وسى ءباسپاسوز ءماسليحاتىندا اقىلى جولداردا ءجۇرۋ ءۇشىن ابونەنتتىك تولەم ءتارتىبىن ەنگىزۋ باعدارلاماسى ازىرلەنىپ جاتقاندىعى ايتىلدى. بۇل ءاربىر جۇرگەن جول ءۇشىن قولما-قول تولەپ جاتقاننان الدەقايدا ءتيىمدى بولاتىندىعى تۇسىنىكتى. سوندىقتان اتالعان باعدارلاما بويىنشا جەڭىل كولىكتەر ءۇشىن جىلدىق, جارتىجىلدىق جانە توقساندىق ابونەنتتىك تولەمدەر ءتارتىبىن ەنگىزۋ قاراستىرىلىپ جاتقان كورىنەدى.
سۇڭعات ءالىپباي,
«ەگەمەن قازاقستان».