الداعى قىس ايلارى جىلداعىدان سۋىق بولعالى تۇر. بۇل جونىندە 2015-2016 جىلداردىڭ سۋىق ماۋسىمدارىنا ارنالعان كونسۋلتاتيۆتىك بولجامدار بويىنشا ءباسپاسوز ءماسليحاتىندا «قازگيدرومەت» رمك گيدرومەتورتالىعىنىڭ ديرەكتورى بايان سازانوۆا ايتتى. شاراعا مەكەمەنىڭ باس ديرەكتورىنىڭ ورىنباسارى نۇركەن سۇلتانوۆ پەن گيدرولوگيا دەپارتامەنتىنىڭ ديرەكتورى ديدار جانىبەك ۇلى دا قاتىستى.
بيىلعى قىس ايلارىندا وتكەن جىلمەن سالىستىرعاندا جانە كوپجىلدىق تاجىريبەگە سۇيەنە ايتقاندا كوپ ايىرماشىلىق بولمايدى ەكەن. تەك قاڭتار ايىندا ىزعارلى جەل سوعىپ, قالىپتى نورمادان 1-2 °س تومەن بولادى دەپ بولجانىپتى. وسىنى مالىمدەگەن ورتالىق ديرەكتورى, ءار ايدىڭ ونكۇندىكتەرىندە ورىن الۋى ىقتيمال اۋا رايى تۋرالى اڭگىمەلەدى. «قاراشا ايىنا جاسالعان بولجام بويىنشا اۋا رايى قۇبىلمالى, جاۋىن-شاشىندى ءارى قاتتى جەل ءجيى سوعۋى مۇمكىن. وعان قوسا, تۇماندى جانە كوكتايعاق بولادى. سونداي-اق, قاراشانىڭ ءبىرىنشى جانە ءۇشىنشى ونكۇندىكتەرىنىڭ سوڭىندا سۋىق اۋا ماسسالارىنىڭ ەنۋىنە بايلانىستى كۇن رايى كۇرت سۋىتادى. سولتۇستىك ايماقتاردا تۇندە – 20, كۇندىز 12 گرادۋس ايازعا دەيىن تومەندەسە, وڭتۇستىك ايماقتاردا تۇندە – 10, كۇندىز 3 گرادۋس اياز بولادى», دەدى ول.
ال قار جاۋاتىن مەرزىم تۋرالى, رەسپۋبليكامىزدىڭ سولتۇستىك, شىعىس جانە ورتالىعىندا ايدىڭ ءبىرىنشى ونكۇندىگىندە اق ۇلپا ءتۇسىپ, باتىس پەن وڭتۇستىك-شىعىستا ءۇشىنشى ونكۇندىككە قاراي قار جاۋاتىنىن ايتتى. قىس ايلارى جونىندەگى بولجامدارعا دا توقتالدى. «وسى جىلدىڭ جەلتوقسان ايىندا ەلىمىزدىڭ باسىم بولىگىندە قار از جاۋادى جانە اۋانىڭ ورتاشا ايلىق تەمپەراتۋراسى بىلتىرعى وسى مەرزىمدەگىدەي بولادى دەپ بولجانۋدا. ءبىرىنشى ونكۇندىكتىڭ سوڭىندا جانە جاڭا جىل مەرەكەسى قارساڭىندا باتىس ءسىبىر جانە تايمىر تۇبەگىنەن ەنەتىن ۋلتراپوليارلىق سۋىق اۋا ماسسالارىنىڭ سالدارىنان اۋا تەمپەراتۋراسى سولتۇستىكتە جانە ورتالىقتا مينۋس 28 گرادۋسقا, شىعىس وڭىرلەردە مينۋس 36 گرادۋسقا تومەندەيدى.
ۇزاق مەرزىمدى بولجامعا سايكەس الداعى جىلدىڭ قاڭتار ايى تايمىر تۇبەگىنەن ۇزدىكسىز ەنەتىن سۋىق اۋا ماسسالارىنىڭ ىقپالىنان ىزعارلى, ياعني اۋانىڭ ورتاشا ايلىق تەمپەراتۋراسى قالىپتى مولشەردەن 1-2°س تومەن بولادى دەپ بولجانۋدا. ەڭ تومەنگى تەمپەراتۋرالار ايدىڭ باسىندا, ورتاسىندا جانە ءۇشىنشى ونكۇندىكتە بايقالادى. ەلىمىزدىڭ سولتۇستىك جارتىسىندا مينۋس 45 گرادۋسقا دەيىن تومەندەسە, وڭتۇستىك جاقتا 30 گرادۋس اياز بولادى. ال اقپان ايىندا تسيكلونداردىڭ ءجيى وتۋىنە بايلانىستى قار شامادان تىس كوپ جاۋىپ, ايازدىڭ السىرەۋىنە جانە اۋانىڭ ورتاشا ايلىق تەمپەراتۋراسى قازاقستاننىڭ وڭتۇستىك-شىعىس بولىگىندە مولشەردەن 1-2 گرادۋس جوعارىلاۋىنا, ياعني جىلىنۋىنا سەبەپشى بولماق. دەگەنمەن, بولجامعا سايكەس ءبىرىنشى ونكۇندىكتىڭ سوڭىندا جانە ءۇشىنشى ونكۇندىكتە ەكى سۋىق تولقىن كەلەدى دەپ ويلايمىز. ول كەزدە رەسپۋبليكانىڭ سولتۇستىك جارتىسىندا مينۋس 30 گرادۋسقا, وڭتۇستىك ايماقتاردا 20 گرادۋس ايازعا تومەندەيدى», دەدى ب.سازانوۆا.
ونىڭ سوزىنە قاراعاندا, كوكتەمنىڭ العاشقى ناۋرىز ايى جىلى كليماتتىق مولشەردەن 1-2 گرادۋس جوعارى بولىپ, كوكتەم ەرتە كەلەدى ەكەن. بۇل اسىرەسە ايدىڭ ەكىنشى جارتىسىندا انىق بايقالاتىن كورىنەدى.
نۇرباي ەلمۇراتوۆ,
«ەگەمەن قازاقستان».