كەشە استانا قالاسىندا قازاقستان رەسپۋبليكاسى پرەزيدەنتى جانىنداعى ورتالىق كوممۋنيكاتسيالار قىزمەتىندە «قازاقستان مۋزەيلەرىنىڭ جۇمىسىن جاڭعىرتۋ تۋرالى» دەگەن تاقىرىپتا ءباسپاسوز كونفەرەنتسياسى وتكەن بولاتىن.
بۇل باعىتتا جۇرگىزىلىپ وتىرعان جۇمىستار تۋرالى مادەنيەت جانە سپورت ۆيتسە-ءمينيسترى ع.احمەدياروۆ, ەلورداداعى ۇلتتىق مۋزەيدىڭ ديرەكتورى د.مىڭباي, الماتىداعى ورتالىق مەملەكەتتىك مۋزەيدىڭ ديرەكتورى ن.ءالىمباي, ش.ءۋاليحانوۆ اتىنداعى تاريح جانە ەتنولوگيا ينستيتۋتىنىڭ ديرەكتورى ح.ءابجانوۆ باياندادى.
مۋزەيلەردىڭ زاڭنامالىق بازاسىن جەتىلدىرۋ, مۋزەي ىسىندە قولجەتىمدىلىكتى ارتتىرۋ, زاماناۋي ءىت-تەحنولوگيا ونىمدەرىن ەنگىزۋ, عىلىمي-زەرتتەۋلەردى جەتىلدىرۋ, سونىمەن قاتار, جەكە كوللەكتسيا جيۋشىلارمەن بايلانىس جاساۋ, ت.ب. ورتاعا سالىندى.
جيىن بارىسىندا ۆيتسە-مينيستر ع.احمەدياروۆ, پرەزيدەنت ن.نازارباەۆتىڭ جاھاندىق جانە ىشكى سىن-قاتەرلەرگە جاۋاپ بەرەتىن, سونىمەن ءبىر مەزگىلدە, جاڭا تاريحي جاعدايلاردا ەلىمىزدى ۇزدىك وتىزدىققا اپاراتىن «بەس ينستيتۋتتىق رەفورما – 100 ناقتى قادام» ۇلت جوسپارىن جاريالاعانىن تىلگە تيەك ەتىپ, اتالعان ۇلت جوسپارىنىڭ «بىرتەكتىلىك پەن بىرلىك» باعىتى بويىنشا ۇستىمىزدەگى جىلى شىلدەدە قازاقستان رەسپۋبليكاسىنىڭ پرەمەر-ءمينيسترىنىڭ توراعالىعىمەن جاڭعىرتۋ جونىندەگى ۇلتتىق كوميسسيا وتىرىسى وتكەنىن, ناقتى تاپسىرمالار بەرىلگەنىن اتادى. سونداي تاپسىرمالاردىڭ ءبىرى, «بىرتەكتىلىك پەن بىرلىك» ينستيتۋتتىق رەفورماسىنىڭ 86-شى قادامى قازاقستان حالقى اسسامبلەياسىنىڭ «ۇلكەن ەل» – ۇلكەن وتباسى» كەڭ كولەمدى جوباسىن ازىرلەۋ جانە جۇزەگە اسىرۋ بولىپ تابىلاتىنىن وسى جوبانىڭ اياسىندا قازىرگى ۋاقىتتا ەل مۋزەيلەرىنىڭ جۇمىسىن جاڭعىرتۋ جونىندە جۇمىستار جۇرگىزىلىپ جاتقانىن ناقتى مىسالدارمەن العا تارتتى.
مىسالى, ۇلىبريتانيادا بارلىق مۋزەيلەر مەن كىتاپحانالاردى بىرىكتىرەتىن National Arts Council (ونەر ۇلتتىق كەڭەسى) جۇمىسى جولعا قويىلعانىن بىرەۋ بىلسە, ءبىرى بىلمەيدى. سونداي يگى قادامعا بارۋ ءۇشىن.
ۇلتتىق مۋزەي جانىنان مۋزەيلەر مەن مۋزەي قىزمەتكەرلەرىنىڭ ۇلتتىق كەڭەسى اسسوتسياتسياسىن قۇرۋ جوسپارى تالقىلاندى.
كونفەرەنتسياعا قاتىسقاندار بيىلعى جىلى ابايدىڭ «جيدەباي – ءبورىلى» مەملەكەتتىك تاريحي-مادەني جانە ادەبي-مەموريالدى قورىق-مۇراجايىنىڭ اۋماعىندا قوناق ءۇيى مەن اسحاناسى, كونفەرەنتس-زالى بار تاريحي-مادەني تۋريستىك كەشەن, سونداي-اق «تاڭبالى» قورىق-مۇراجايىندا قۇرىلاتىن ۆيزيت ورتالىقتىڭ جوباسى جاساقتالعانىن دا ەسكە سالدى.
راۋان قايدار,
«ەگەمەن قازاقستان».