ورال. 6 ناۋرىز. باتىس قازاقستان وبلىسىنىڭ اكىمى نۇرلان نوعاەۆ ۇكىمەت دەڭگەيىندەگى سەلەكتورلىق ءماجىلىس كەزىندە سمارتفوندارىمەن اۋرەلەنىپ وتىراتىن جەرگىلىكتى شەنەۋنىكتەرگە ەسكەرتۋ جاسادى. بۇل تۋرالى egemen.kz ءتىلشىسى حابارلادى.
ماسەلەنىڭ ءمانىسى مىنادا. الدىڭعى كۇندەردىڭ بىرىندە قر پرەمەر ءمينيسترىنىڭ ورىنباسارى بەردىبەك ساپارباەۆتىڭ توراعالىعىمەن رەسپۋبليكادا دۋالدى وقىتۋ جۇيەسىن ەنگىزۋ جونىندە سەلەكتورلىق ءماجىلىس وتكىزىلگەن. وعان باتىس قازاقستان وبلىسىنان كاسىپكەرلەر, كوللەدجدەر مەن ارناۋلى ورتا وقۋ ورىندارىنىڭ جەتەكشىلەرى, وبلىستىق باسقارما باسشىلارى جانە جەرگىلىكتى اتقارۋشى ورگانداردىڭ وكىلدەرى قاتىسقان. «موي گورود» پورتالىنان الىنعان دەرەكتە سەلەكتورلىق بايلانىس اياقتالعان سوڭ وبلىس باسشىسىنىڭ وعان قاتىسۋشىلارعا ەسكەرتۋ بەرگەنى ايتىلعان. وندا بىلاي دەلىنگەن: «ءماجىلىس ەكى ساعاتقا سوزىلدى. مۇندا بۇگىنگى كۇننىڭ وزەكتى ماسەلەلەرىنىڭ ءبىرى قارالدى. سوعان قاراماستان سىزدەر باستى نازاردى كۇن تارتىبىندە تۇرعان ماسەلەگە اۋدارۋدىڭ ورنىنا سمارتفوندارىڭىزبەن شۇقىلانىپ وتىردىڭىزدار. بۇل قىزمەت ەتيكاسىنا سايكەس كەلمەيدى. راس, قازىر اقپاراتتىق تەحنولوگيا عاسىرى. بۇل قۇرال قاجەت تە. الايدا, سەلەكتور ۋاقىتى كەزىندە جۇمىس ىستەۋدىڭ ورنىنا باستى كوڭىلدى سمارتفونعا اۋدارعاندارىڭىز كەلىسپەيدى. بۇلارىڭ قالاي؟ ۇكىمەت جەتەكشىلەرىنىڭ ءبىرى سەلەكتورلىق ءماجىلىس وتكىزەدى. جاندارىڭىزدا وبلىس باسشىسى وتىرادى. ەشقايسىن دا ەلەڭ ەتپەدىڭىزدەر. سوندىقتان كەلەسىدە مۇنداي ادەتتەرىڭىزدى تىيۋلارىڭىزدى وتىنەمىن».
وبلىس باسشىسىنىڭ بۇل ەسكەرتۋى وتە ورىندى دەپ بىلەمىز. ويتكەنى دۋالدى وقىتۋ جۇيەسى
سەكىلدى بىرقاتار مەملەكەتتىك باعدارلامالاردىڭ وڭىرلەرگە ەنگىزىلۋ دەڭگەيى تومەن ەكەنى جاسىرىن ەمەس. مۇنىڭ ءوزى ءتيىستى سالاعا تىكەلەي قاتىسى بار جەتەكشىلەردىڭ جوعارىدا وبلىس باسشىسى ايتقانداي ەنجارلىعى مەن نەمكەتتىلىگىنەن ورىن الىپ جۇرمەسىنە كىم كەپىل؟
تەمىر قۇسايىن.
دەرەك: egemen.kz.
سۋرەت: macdigger.ru.