ورال. 6 ناۋرىز. ورال قالاسىنىڭ دەپوۆسكايا كوشەسىندەگى اپاتتى №18 ءۇيدىڭ تۇرعىندارى №5 شاعىن اۋدانداعى ۋاقىتشا باسپاناعا كوشىرىلدى. بۇل تۋرالى egemen.kz ءتىلشىسى حابارلادى.
كوپ كەشىكپەي اتالعان كوشەدەگى وزگە دە اپاتتى ۇيلەردىڭ تۇرعىندارى ۋاقىتشا قونىسقا ورىن الماستىرماق. ويتكەنى بيىل اپاتتى دەپ تانىلعان ۇيلەر بۇزىلىپ, ونىڭ ورنىنا كوپ قاباتتى ۇيلەردىڭ قۇرىلىسى باستالماق. ناقتى ايتار بولساق, توقسان پاتەرلىك توعىز قاباتتى جانە 144 پاتەرلىك توعىز قاباتتى جاڭا ۇيلەر سالىنادى. قۇرىلىس جۇمىستارى اياقتالعاننان كەيىن ۋاقىتشا مەكەنجايداعىلار تۇپكىلىكتى جاڭا باسپاناعا قايتا كوشىپ كەلمەك.
مۇنداي يگى شارا قالاداعى اپاتتى ۇيلەردىڭ تۇرعىندارىن باسپانامەن قامتۋعا باعىتتالعان قاناتقاقتى جوبانىڭ اياسىندا جۇزەگە اسىرىلماق. تۇرعىنداردى كوپتەن بەرى تولعاندىرىپ كەلگەن تۇيتكىلدى ماسەلەنىڭ ءتۇيىنى مەملەكەتتىك-جەكەمەنشىك ارىپتەستىك شەڭبەرىندە شەشىمىن تاپپاق. ياعني, «بولاشاقت» جانە «سۆ پليۋس» قۇرىلىس كومپانيالارى بۇل ىسكە بىلەك سىبانا كىرىسۋگە تىلەك ءبىلدىردى. جوبا بويىنشا ورال قالالىق اكىمدىگى, قۇرىلىس كومپانيالارى جانە تۇرعىندار اراسىندا ءۇش جاقتى كەلىسىمشارتقا قول قويىلدى.
سوعان سايكەس قالالىق اكىمدىك قۇرىلىس جۇمىستارى كەزىندە تۇرعىنداردى مەملەكەتتىك تۇرعىن ءۇي قورىنان بولىنگەن ۋاقىتشا باسپانامەن قامتاماسىز ەتەدى. جوعارىدا اتالعان قۇرىلىس كومپانيالارى ءۇيدى سالىپ بىتكەننەن كەيىن ونى تۇرعىندارعا جەكەمەنشىككە بەرەدى. بۇل كەزدە جاڭا باسپانا ەسكى پاتەرلەردىڭ اۋدانىنا سايكەس ۇسىنىلادى. جاڭا ۇيلەردى ينجەنەرلىك ينفراقۇرىلىممەن قامتاماسىز ەتۋ مەملەكەت ەسەبىنەن جۇرگىزىلەدى.
ورال قالالىق اكىمدىگىنىڭ ءباسپاسوز قىزمەتى ۇسىنعان مالىمەتكە سۇيەنسەك, وبلىس ورتالىعىنداعى 32 ءۇي اپاتتى جاعدايدا دەپ تانىلعان. بۇل ۇيلەردە 325 وتباسى تۇرادى. وزگە ۇيلەردىڭ دە ماسەلەسى وسى ۇلگىدە كەزەڭ-كەزەڭمەن شەشىملەك.
تەمىر قۇسايىن.
دەرەك: egemen.kz.
سۋرەت: priru.kz.