استانا. اياقتالۋعا تاياۋ قالعان قىتايداعى ازيا-تىنىق مۇحيت ويىندارىندا قازاقستان جۇزۋشىلەرى قولا جۇلدەنى يەلەنىپ, كوماندالىق ءۇشىنشى ورىنعا شىقتى. بۇل تۋرالى «دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنىڭ» ءباسپاسوز قىزمەتكەرى تولەگەن جاكىتاي ۇلى حابارلادى.
قىتايدىڭ تايۋان قالاسىندا ەستۋ قابىلەتى تومەن سپورتشىلار اراسىنداعى ءتورت جىلدا ءبىر رەت ۇيىمداستىرىلاتىن ازيا-تىنىق مۇحيت ويىندارىنىڭ مارەگە جەتۋىنە دە از ۋاقىت قالدى. قازاقستاندىق سۋردوسپورتشىلاردىڭ وسى ءدۇبىرلى دودادان ولجالاعان جۇلدەسى از ەمەس. العاشقى جۇلدەلەردى العان تاەكۆاندوشىلار مەن جەڭىل اتلەتشىلەر بولاتىن. بۇعان دەيىن ولار 1 التىن, 6 كۇمىس, 3 قولا مەدالدى يەلەنىپ, كوماندالىق سەگىزىنشى ورىنعا تابان تىرەگەن ەدى.
«جاقىندا تاعى ءبىر جاقسى جاڭالىق كەلىپ جەتتى. جۇزۋدەن ەرلەر اراسىنداعى ەستافەتالىق جارىستا ءبىزدىڭ جىگىتتەردىڭ جولى بولىپتى. قۇرامىندا نۇرلان جاسانوۆ, ەرنار مىرزاعاليەۆ, مارات ەرمەكپاەۆ, ۆيكتور فرۋندين ەسىمدى سپورتشىلار بار جۇزۋشىلەر 4ح100 مەترلىك (ۋاكىتى: 4:14,77 سەك.) قاشىقتىق باسەكەسىندە قولا جۇلدە الىپ, كوماندالىق ءۇشىنشى ورىندى يەلەنىپتى. بۇل سپورت ءتۇرى بويىنشا ءبىرىنشى ورىن جاپون, ەكىنشى ورىن قىتاي كوماندالارىنا بۇيىرعان», دەيدى تولەگەن جاكىتاي ۇلى.
سونىمەن, قازاقستان سپورتشىلارىنىڭ ازيا-تىنىق مۇحيت ويىندارىنان ازىرگە يەلەنگەنى 1 التىن, 6 كۇمىس, 4 قولا مەدال.
داستان كەنجالين.
دەرەك, سۋرەت: دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى.
سۋرەتتە سولدان وڭعا قاراي: ازيا-تىنىق مۇحيت ويىندارىنىڭ قولا جۇلدەگەرى اتانعان جۇزۋشىلەر نۇرلان جاسانوۆ, ەرنار مىرزاعاليەۆ, «دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعىنىڭ» اتقارۋشى ديرەكتورى جۇماجان يماياقوۆ, ۆيكتور فرۋندين, مارات ەرمەكباەۆ.