پەتروپاۆل. 6 ناۋرىز. پەتروپاۆلداعى ەس-164/6 ايەلدەر كولونياسىندا قوسىمشا جۇمىس ورىندارى اشىلدى. بۇل تۋرالى سولتۇستىك قازاقستان وبلىستىق قىلمىستىق اتقارۋ جۇيەسى دەپارتامەنتى حابارلادى.
جەكە كاسىپكەر ەۆگەني ششەگولەۆ بۇل مەكەمەمەن ءۇش جىلدان بەرى قويان-قولتىق جۇمىس جاساپ كەلەدى. العاشقى كەزدە ونعا جۋىق سوتتالۋشى عانا ەڭبەككە تارتىلسا, وتكەن جىلى ولاردىڭ سانى 70-كە جەتتى. بۇگىندە بارلىعى 95 جازاسىن وتەۋشى جۇمىس ىستەيدى.
«وتاندىق تاۋار وندىرۋشىلەردى قولداۋعا باعىتتالعان مەملەكەتتىك باعدارلامالاردىڭ ارقاسىندا ءوندىرىس ورنىن كەڭەيتۋ مۇمكىندىكتەرى تابىلىپ, تاعى 20 ادام جۇمىسپەن قامتىلىپ وتىر», – دەيدى ەۆگەني سەرگەەۆيچ.
كولونيا اۋماعىنداعى عيماراتتى جالعا الىپ وتىرعان كاسىپكەر شاعىن جانە ورتا كاسىپتى دامىتۋ ماقساتىمەن مونشاعا قاجەتتى بۇيىمداردى شىعارادى. ءوز ونىمدەرىن قوستاناي, اقمولا وبلىستارىنا جانە استانا قالاسىنا ساتۋدى جۇيەلى ۇيىمداستىرىپ كەلەدى. ونىمدەردىڭ شەتەلدىك تاۋارلارعا قاراعاندا باعاسى قولجەتىمدى, ساپا جاعىنان دا كەم تۇسپەيدى.
كولونيانىڭ باسشىسى بيبىگۇل مانسۇروۆانىڭ ايتۋىنشا, جۇمىسقا ورنالاسۋعا نيەت ەتكەن سوتتالۋشىلاردىڭ كاسىبي دايارلىعى مەن جەكە باسىنىڭ ءتارتىبى, مىنەز-قۇلقى ءبىرىنشى كەزەكتە ەسكەرىلەدى. بۇل تاجىريبەنىڭ اباقتىدان بوساپ شىققاننان كەيىنگى ومىرلەرىنە دە پايداسىن تيگىزەرىنە ەش كۇمان كەلتىرمەيدى.
ءومىر ەسقالي.
دەرەك: سولتۇستىك قازاقستان وبلىستىق قىلمىستىق اتقارۋ جۇيەسى دەپارتامەنتى.
سۋرەت: inform.kz.