شىمكەنت. 6 ناۋرىز. وڭتۇستىك قازاقستان وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتى «سارىاعاش وقيعاسىنا» قاتىستى قوزعالعان قىلمىستىق ءىستى قايتا تەرگەۋگە جىبەرۋگە ۇيعارىم جاسادى. بۇل تۋرالى وبلىستىق سوت ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى.
«ەگەر بۇل قاۋلىعا ەشكىم شاعىم تۇسىرمەسە, 15 كۇننىڭ ىشىندە ءىستى وڭتۇستىك قازاقستان وبلىستىق پروكۋراتۋراسىنا جىبەرەمىز», - دەدى وسىعان وراي وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتتىڭ سۋدياسى ءابينۇر قاراباەۆ. سۋديا سونىمەن بىرگە وسى قىلمىستىق ىسكە بايلانىستى تابىلعان جاڭا ايعاق – قازا تاپقان ادام اۆتوكولىگىنىڭ بەينەتىركەگىش قۇرالى ىسكە تىركەلەتىنىن ايتتى.
«پوليتسەيلەر ايعاق زاتتى قىلمىستىق ءىس سوتقا كەتكەن سوڭ تاپقان. ونى مارقۇمنىڭ كولىگىنەن ۇرلاپ, لاقتىرىپ جىبەرگەنى انىقتالعان. ءبىز ونى كوردىك, تەكسەردىك, ىسكە ماڭىزى بار ايعاق زات ەكەنىنە كوزىمىز جەتتى», - دەدى سۋديا.
ەسكە سالا كەتەيىك, 4 اقپان كۇنى ساعات 1:40 شاماسىندا سارىاعاش اۋدانى جارتىتوبە اۋىلدىق وكرۋگى بوستاندىق اۋىلىنىڭ جانىنان اعىپ وتەتىن كەلەس وزەنىنەن باتىسقا قاراي 500 مەتر قاشىقتىقتا ءوزىنىڭ «مەرسەدەس-گەلينۆاگەن» ماركالى م/ب KZ 606 KLA اۆتوكولىگىنىڭ ارتقى ورىندىعىنان 1985 جىلى تۋعان باقىتجان ارتىقوۆ دەگەن ازاماتتىڭ ءولى دەنەسى تابىلعان. كۇدىكتى – بوستاندىق ەلدى مەكەنىنىڭ تۇرعىنى پاۆمادين نارمەتوۆ ارادا ءۇش وتكەننەن كەيىن كورشى وزبەكستان جەرىندە قولعا ءتۇستى. قاندى وقيعانىڭ سوڭى جاپپاي تارتىپسىزدىككە ۇلاستى. ىنتىماق جانە بوستاندىق اۋىلدارىندا اقپاننىڭ 5-ءى مەن 6-سى كۇندەرى جەرگىلىكتى تاجىك تۇرعىندارىنىڭ مەنشىگىندەگى بىرنەشە تۇرعىن ءۇي مەن اۆتوكولىكتەر ورتەنگەن.
باقتيار تايجان.
دەرەك, فوتو: وڭتۇستىك قازاقستان وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتى.