«ەل بىرلىگى – ەڭ اسىل قاسيەت», دەپ ەلباسىمىز ايتقانداي, قازاقستان كوپتەگەن ۇلتتاردىڭ باسىن ءبىر شاڭىراق استىنا بىرىكتىرىپ وتىرعان تۇعىرلى مەكەن. ءيا, جاس بارىستاي قۋاتتى مەملەكەتىمىز الەمگە ءوزىن تانىتىپ, دامۋدىڭ قارىشتى قادامدارىن جاساعان سەرپىندى ەل رەتىندە مويىندالىپ ۇلگەردى. ەڭ باستىسى, سۇتتەي ۇيىعان ۇلتتار تاتۋلىعىنىڭ جارقىن ۇلگىسىنە اينالدى. قاسيەتتى اۋليە اتا ءوڭىرى – ەجەلدەن دوستىقتىڭ كيەلى مەكەنى. جالپى, جامبىل وبلىسىندا سەكسەننەن استام ۇلتتىڭ وكىلدەرى تۇرادى. ەلىمىزدەگى بارلىق ازاماتتاردىڭ قۇقىقتارى بىردەي. ۇلتتار اراسىنداعى تەڭدىك قانا ءبىزدى دىتتەگەن ماقساتىمىزعا جەتكىزەدى. ياعني, مەملەكەت قۇراۋشى ۇلت رەتىندە قازاق حالقىنا ايىرىقشا جاۋاپكەرشىلىك جۇكتەلەتىنى ءسوزسىز.
دانا حالقىمىزدىڭ «ەركىندىك قايدا بولسا – ەلدىك سوندا, بىرلىك قايدا بولسا – ەرلىك سوندا» دەگەن اتالى ءسوزى بار, تۇعىرىمىز – تىنىشتىق, تىرەگىمىز – تۇراقتىلىق, تىلەگىمىز تاتۋلىق بولسا ەلىمىز تاريح تورىنەن تابىلارى ءسوزسىز. بۇگىندە ءبىز – الەم مويىنداعان, الەمدىك وركەنيەت كوشىندە وزىندىك بەت-بەينەسى, ماقتان تۇتار مادەنيەتى, لايىقتى سالت-ءداستۇرى بار ەلمىز. كەلىسىم جوق جەردە بىرلىك جوق, ال, بىرلىك بولماسا تىرلىك تە جوق. قازاقستاندا ۇلتارالىق كەلىسىم ەڭ جاقسى ۇلگىدە جۇرگىزىلۋدە. سوندىقتان الەم ەلدەرى مەملەكەتىمىزدەن ۇلگى الۋدا, ءبىز بۇعان قۋانامىز. ەلباسى ايتقانداي, ايقىن ماقساتقا جەتەر جەتىستىكتەرىمىزدى ورتاق تابىسپەن سايكەستەندىرىپ, جۇمىلا جۇمىس جاساۋ ءاربىر قازاقستاندىق ءۇشىن ماڭىزدى. ونى سانامىزعا سەرىك ەتىپ, جۇرەگىمىزبەن ۇعىنۋىمىز كەرەك.
تۇراقتىلىق نەگىزى – تاتۋلىق. ال تاتۋلىق كەز كەلگەن ەلدى, حالىقتى تەك جاقسىلىق پەن ىنتىماققا, كەلىسىمگە جەتەلەيدى. بىرلىگى بەرەكەلى, تىرلىگى مەرەكەلى, ىنتىماعى جاراسقان ەلدىڭ عانا ىرىس-نەسىبەسى مول بولماق. ۇلتارالىق كەلىسىم مەن بەرەكەگە باستار بىرلىكتىڭ ارقاسىندا ەكونوميكامىز قارىشتاپ دامىپ, تۇرمىسىمىز جىلدان جىلعا جاقسارا تۇسۋدە.
ايجان تۋعانوۆا,
«قازاۆتوجول» ۇك» اق-تىڭ جامبىل وبلىستىق فيليالى ديرەكتورىنىڭ ورىنباسارى.
جامبىل وبلىسى.