استانا. 1 شىلدە. ۇلىبريتانيادا ءوتىپ جاتقان تەننيستەن ۋيمبلدون تۋرنيرىندە قازاق قىزى زارينا دياس ءۇشىنشى اينالىمعا شىقتى. ەكىنشى كەزدەسۋىندە ول بەلورۋس قىزى الەكساندرا ءسوسنوۆيچتى ەكى سەتتە 7:5, 6:1 ەسەبىمەن جەڭدى. بۇل تۋرالى egemen.kz حابارلادى.
ويىننىڭ ءبىرىنشى سەتىندە قارسىلاستار تەڭ دارەجەدە ونەر كورسەتتى. ءتىپتى العاشقى ەكى گەيمدە ۇپاي ءسوسنوۆيچتىڭ ەنشىسىنە جازىلىپ, ول ەسەپتە العا شىققان ەدى. كەيىن قارسىلاستار 9-گەيمگە دەيىن ءوز دوپتارىنان ۇپاي الىپ وتىردى. سول كەزدە ەسەپ بەلورۋستىڭ پايداسىنا 5:3 بولاتىن. دەر كەزىندە جيناقىلىق تانىتقان زارينا قاتارىنان 4 مارتە ۇپاي الىپ, ءبىرىنشى سەتتى ءوز پايداسىنا اياقتادى.
ال كەلەسى سەتتە ز.دياس قارسىلاسىن تىرپ ەتكىزبەدى. سوسنوۆيچكە بار بولعانى ءبىر عانا ۇپاي ۇستاتقان ول 6:1 ەسەبىمەن جەڭىسكە جەتىپ, جالپى ەسەپتە دە باسىم ءتۇستى.
زارينا ءۇشىنشى اينالىمدا اندرەا پەتكوۆيچ (گەرمانيا) پەن ماريانا دۋكە-مارينو (كولۋمبيا) اراسىنداعى جەڭىمپازبەن كۇش سىناسادى. وسى رەتتە, ايتا كەتەر جايت, وتانداسىمىز وتكەن جىلى اتالعان تۋرنيرگە العاش رەت قاتىسىپ, ءتورتىنشى اينالىمعا دەيىن جەتكەن بولاتىن. بيىل دا سول ناتيجەسىن قايتالاسا WTA رەيتينگىندەگى جاعدايىن ايتارلىقتاي جاقسارتادى.
بۇل سىندا ەل نامىسىن قورعايتىن تاعى ءبىر تەننيسشىمىز يۋليا پۋتينتسەۆا ءۇشىنشى اينالىمنىڭ جولداماسى ءۇشىن ۆينۋس ۋيليامسقا قارسى وينايدى. ال ياروسلاۆا شۆەدوۆا, ميحايل كۋكۋشكين جانە الەكساندر نەدوۆەسوۆتار ءبىرىنشى اينالىمنان اسا المادى.
ەلامان قوڭىر.
دەرەك: egemen.kz.
سۋرەت: zimbio.com.