كەشە ورتالىق سايلاۋ كوميسسياسىندا قازاقستان رەسپۋبليكاسىنىڭ پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ ءجونىندەگى لينگۆيستيكالىق كوميسسيانىڭ وتىرىسى ءوتتى.
وتىرىستا كوميسسيا مۇشەلەرى كوميسسيا جۇمىسىنا قاتىستى ۇيىمداستىرۋ ماسەلەلەرىن, ورتسايلاۋكومنىڭ «قازاقستان رەسپۋبليكاسىنىڭ پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ ءراسىمى تۋرالى» 2015 جىلعى 31 تامىزداعى قاۋلىسىمەن ايقىندالاتىن قازاقستان رەسپۋبليكاسىنىڭ پرەزيدەنتتىگىنە كانديداتتىڭ مەملەكەتتىك ءتىلدى ەركىن مەڭگەرگەندىگىن انىقتاۋ رەسىمىن تالقىلادى. اتالعان قاۋلىعا ءسايكەس مەملەكەتتىك ءتىلدى ەركىن مەڭگەرگەندىگىن انىقتاۋ ءۇشىن, ءبىرىنشى – لينگۆيستيكالىق كوميسسيا ۇسىنعان تاقىرىپ بويىنشا كولەمى ەكى بەتتەن اسپايتىن جازباشا تاپسىرما جازۋى ءتيىس. ەكىنشى – لينگۆيستيكالىق كوميسسيا ۇسىنعان كولەمى ءۇش باسپا بەتتەن اسپايتىن ءماتىندى وقۋى كەرەك. ءۇشىنشى – لينگۆيستيكالىق كوميسسيا ۇسىنعان تاقىرىپ بويىنشا كوپشىلىك الدىندا كەمىندە ون بەس مينۋت ءسوز سويلەۋى تالاپ ەتىلەدى.
وتىرىس بارىسىندا كوميسسيا توراعاسى مىرزاتاي جولداسبەكوۆ اتالعان وسى ماسەلەلەرگە جەكە-جەكە توقتالىپ ءوتتى. «بۇگىن ءبىز سىناققا تۇسەتىن سۇراقتاردىڭ بارلىعىن بەكىتتىك, – دەدى كوميسسيا توراعاسى. – پرەزيدەنتتىككە كانديداتتىڭ مەملەكەتتىك ءتىلدى ەركىن مەڭگەرگەن دەڭگەيىن انىقتاۋ ءۇشىن, بىرىنشىدەن, كانديداتتىققا ۇسىنىلعان ادام لينگۆيستيكالىق كوميسسيا ۇسىنعان تاقىرىپتاردىڭ ءبىرىن تاڭداپ, كولەمى ەكى بەتتەن اسپايتىن جازباشا جۇمىس جازادى. ونى جازۋعا ءبىر ساعات ۋاقىت بەرىلەدى. ەگەر ول كوميسسياعا بەرىلگەن ۋاقىتتىڭ از ەكەندىگى ءجونىندە ءوتىنىش بىلدىرسە, كوميسسيانىڭ نەگىزگى ۋاقىتقا تاعى جارتى ساعات قوسۋلارىنا قۇقىعى بار. كوميسسيا ەكىنشى كەزەڭ سىناعىنا بايلانىستى قازاقتىڭ كلاسسيك اقىن-جازۋشىلارىنىڭ كىتاپتارىن بەكىتتى. ءوتىنىش بەرۋشى سول كىتاپتاردىڭ ءبىرىن تاڭداپ, كولەمى ءۇش باسپا بەتتەن اسپايتىن ءماتىندى ىرعاق-ناقىشىنا كەلتىرىپ وقىپ بەرەدى».
ال ءۇشىنشى كەزەڭدە كانديداتتىققا ۇسىنىلۋشى لينگۆيستيكالىق كوميسسيا بەكىتكەن تاقىرىپقا بايلانىستى دايىندالىپ, سول تاقىرىپ جونىندە 15 مينۋت ەركىن سويلەۋى ءتيىس. وعان دايىندالۋعا ءبىر ساعات ۋاقىت بەرىلەدى. «كانديداتتىققا ۇسىنىلۋشى وسى ءۇش سىناقتى تاپسىرعان سوڭ, كوميسسيا مۇشەلەرى وزدەرىنە بەكىتىلگەن بولمەدە باس قوسىپ, ءتيىستى قورىتىندى شىعارادى», – دەدى مىرزاتاي جولداسبەكوۆ.
كوميسسيا توراعاسىنا جۋرناليستەر تاراپىنان سۇراقتار دا قويىلدى. سونىڭ ءبىرى – 2011 جىلى وتكەن پرەزيدەنتتىك سايلاۋعا قاتىستى بولدى. «2011 جىلعى پرەزيدەنتتىك سايلاۋعا كانديدات رەتىندە تىركەلۋگە ءوتىنىش بەرگەندەردىڭ ىشىندە ەكى بەتتىك جازبا جۇمىسىنان ەلۋگە جۋىق قاتە جىبەرگەندەر دە بولدى, – دەدى كوميسسيا توراعاسى. – ءوتىنىش بەرۋشىلەردىڭ كوپشىلىگى جۇمىسسىز جۇرگەندەر ەدى. ءتىپتى, تىركەلۋگە كەلگەن ءبىر ازامات ءتيىستى جارنانى تولەۋگە اقشاسىنىڭ جوق ەكەندىگىن ايتىپ, ونىڭ ورنىنا سەكسەۋىل بەرۋدى ۇسىنسا, ەندى ءبىرى كوميسسيا مۇشەلەرىنەن جارنانى تولەۋگە قارجىلاي كومەك سۇراعان جاعدايلار دا كەزدەسكەن ەدى».
لينگۆيستيكالىق كوميسسيانىڭ وتىرىسىنا ونىڭ مۇشەلەرى مەن قازاقستان رەسپۋبليكاسىنىڭ پرەزيدەنتتىگىنە كانديداتتان باسقا ورتالىق سايلاۋ كوميسسياسىنىڭ مۇشەلەرى بايقاۋشىلار رەتىندە قاتىسۋعا قۇقىلى. كوميسسيانىڭ شەشىمى كوميسسيا مۇشەلەرى سانىنىڭ كوپشىلىك داۋسىمەن اشىق داۋىس بەرۋ ارقىلى قابىلدانادى جانە وتىرىس حاتتاماسىمەن رەسىمدەلىپ, وتىرىستاعى ورتالىق سايلاۋ كوميسسياسىنىڭ مۇشەسىنە كىدىرىسسىز تاپسىرىلادى.
وتىرىستا كوميسسيا مۇشەلەرى قازىرگى ۋاقىتتاعى ولشەمدەر ءۇمىتكەردىڭ مەملەكەتتىك ءتىلدى ءبىلۋ دەڭگەيىن ايقىنداۋعا مۇمكىندىك بەرەتىنىن اتاپ ءوتتى. سونداي-اق, ولار كوميسسيا جۇمىسى اشىق جانە جاريالى تۇردە جۇزەگە اسىرىلاتىنىن, ال بۇقارالىق اقپارات قۇرالدارى ءار كانديدات بويىنشا شەشىم قابىلداۋ بارىسىن بايقاۋ مۇمكىندىگىنە يە بولاتىنى دا ايتىلدى. وتىرىستان كەيىن ءباسپاسوز ورتالىعىندا لينگۆيستيكالىق كوميسسيانىڭ مۇشەسى, ۇلتتىق عىلىم اكادەمياسىنىڭ كوررەسپوندەنت-مۇشەسى فاۋزيا ورازباەۆا باق وكىلدەرىنىڭ سۇراقتارىنا جاۋاپتار قايتاردى.
ءاليسۇلتان قۇلانباي,
«ەگەمەن قازاقستان».