كەشە قازاقستان رەسپۋبليكاسى ورتالىق سايلاۋ كوميسسياسىنىڭ توراعاسى قۋاندىق تۇرعانقۇلوۆ ەقىۇ/دياقب ميسسياسىنىڭ قاجەتتىلىكتەردى باعالاۋ جونىندەگى مۇشەلەرى – ەقىۇ/دياقب كەڭەسشىلەرى ريچارد لاپينمەن جانە راديۆوە گرۋيچپەن كەزدەستى.
ورتسايلاۋكوم باسشىسى حالىقارالىق ساراپشىلاردى ورتالىق سايلاۋ كوميسسياسىنىڭ 2015 جىلعى 26 ساۋىرگە تاعايىندالعان قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن ازىرلەۋ مەن وتكىزۋ جونىندەگى جۇمىسىمەن تانىستىردى. ول ساراپشىلاردى سايلاۋدىڭ قۇقىقتىق بازاسى, سايلاۋ ناۋقانىنىڭ نەگىزگى كەزەڭدەرىنىڭ مەرزىمدەرى, ونى اقپاراتتىق سۇيەمەلدەۋ جانە سايلاۋ ۇدەرىسىنە قاتىسۋشىلاردى وقىتۋ تۋرالى اقپاراتتاندىردى.
سونداي-اق, ق.تۇرعانقۇلوۆ ەقىۇ/دياقب ۇسىنىمدارىن ىسكە اسىرۋ جونىندەگى جۇمىس جانە قازاقستاننىڭ قازىرگى ۋاقىتتا حالىقارالىق ستاندارتتارعا تولىقتاي سايكەس دەرلىك سايلاۋ زاڭناماسى دايەكتى تۇردە جۇيەلى جەتىلدىرىلىپ وتىراتىنى تۋرالى ايتىپ بەردى.
كەزدەسۋ بارىسىندا پرەزيدەنتتىككە كانديداتتاردى قولداپ قول جيناۋ ۇدەرىسى مەن مەرزىمدەرىنە, لينگۆيستيكالىق كوميسسيا قىزمەتىنىڭ قۇقىقتىق نەگىزدەرىنە, سايلاۋدى ۇيىمداستىرۋشىلاردى وقىتۋ, سايلاۋ ۇدەرىسىنە قاتىسۋشىلاردى ءادىستەمەلىك قۇرالدارمەن قامتاماسىز ەتۋ جونىندەگى ورتسايلاۋكومنىڭ جۇمىسىنا, ۇگىت ناۋقانى كەزەڭىندەگى باق-تىڭ ءىس-ارەكەتتەرىنە, بارلىق كانديداتتاردىڭ باق-قا تەڭ قول جەتكىزۋىن قامتاماسىز ەتۋگە, شاعىمدار مەن اپەللياتسيالاردى بەرۋ جانە قاراۋ راسىمدەرىنە قاتىستى ماسەلەلەر تالقىلاندى.
ق.تۇرعانقۇلوۆ, سونداي-اق, حالىقارالىق ساراپشىلارعا قازاقستان رەسپۋبليكاسى ورتالىق سايلاۋ كوميسسياسى سايلاۋ ۇدەرىسىن ۇيىمداستىرۋدىڭ بارلىق ماسەلەلەرى مەن قىرلارى بويىنشا ىنتىماقتاستىق ءۇشىن اشىق ەكەنىن جانە ەقىۇ/دياقب ساراپشىلارىنا ولاردىڭ ءتيىمدى جۇمىسى ءۇشىن بارلىق قاجەتتى مالىمەتتەر مەن ماتەريالداردى ۇسىنۋعا دايىن ەكەنىن ايتتى.
«ەگەمەن-اقپارات».