سەمەي قالاسىنىڭ تۇرعىنى ءدىنيسلام ابدىقوجا ۇلىنىڭ قولىندا قۇندى جادىگەر بار.
اقساقال وسى ۋاقىتقا دەيىن ابايدىڭ باكىسىن ساقتاپ كەلگەن. جەتپىستىڭ تورتەۋىنە كەلگەن قاريا باكىنىڭ اتالارىنان مۇراعا قالعانىن ايتادى. 1890 جىلدارى اباي ەلىندە قاتتى جۇت بولىپ, ءۇيىر جىلقىنى امان الىپ قالۋ ءۇشىن اقىن اۋىلى ەرتىستىڭ وڭ جاعالاۋىنداعى يزاتوللا اۋىلىنا قىستاپ شىققان ەكەن. مەيرامعالي نىسپىلى بايدىڭ قىستاۋىنا جىلقىسىن پانالاتقان اباي ءوزىنىڭ باكىسىن بايدىڭ بالاسىنا سىيعا تارتقان كورىنەدى. سول ۋاقىتتان بەرى اتادان بالاعا مۇراعا قالىپ كەلە جاتقان قۇندى جادىگەردى ءدىنيسلام اقساقال 56 جاسىندا اناسىنان سىيعا الىپتى.
قاريا باكىنى بۇعان دەيىن ەلىمىزدىڭ مادەنيەت مينيسترلىگى مەن الماتىداعى ءابىلحان قاستەەۆ اتىنداعى ونەر مۇراجايىنا اپارىپ, كورسەتىپ قايتقان ەكەن. ءدىنيسلام ابدىقوجا ۇلى ۇزاق جىل قاستەرلەپ ساقتاعان بۇيىمدى ساتىپ الۋشىلار بولسا, بەرۋگە دايىن ەكەنىن جەتكىزدى.
– 2009 جىلى مادەنيەت مينيسترلىگىنە بارعانىمدا, ونداعى جاۋاپتى قىزمەتكەرلەر: «اتا, بۇل باكىنى شەتكە شىعارماڭىز. ەگەر شەتەلگە شىعىپ كەتسە, ونىڭ قايتارىمىنا وتە كوپ قۇن سۇراۋى مۇمكىن», دەدى. سودان بەرى باكىنى وزىمدە ساقتاپ كەلەمىن. ايتپەسە, قىتاي ەلىنەن ساتىپ الۋعا نيەت بىلدىرگەندەر, اۋكتسيونعا شىعارۋعا قولقالاعاندار بولدى. ولاردىڭ ەشقايسىسىنا قۇلاق اسقان جوقپىن, – دەيدى قاريا.
سارى جەز ءتۇستى سابى بار, قىزىلدى-جاسىلدى لاعىل تاستارمەن كومكەرىلگەن, مۇسىلمانشا اي مەن جۇلدىزدىڭ بەينەسى بەدەرلەنگەن, اسىل ءجۇزى سول كۇيى ساقتالعان ءسۇپ-سۇيكىمدى باكىدەن اباي اتامىزدىڭ تالعامىن تارازىلاۋعا بولادى.
دۋمان اناش,
«ەگەمەن قازاقستان».
سەمەي.