جارتى الەمدى شارلاعان

سەرب ساياحاتشىسى پاۆلودارعا جەتتى ۆەلوسيپەدپەن جارتى الەمدى شارلاپ وتۋگە بەل بۋعان سەرب ساياحاتشىسى پاۆلودارعا جەتتى. ول بۇل ساپارىن 12 ساۋىردە سەربيا استاناسى – بەلگراد قالاسىنان باستاعان بولاتىن. سودان بەرى 5 مىڭ شاقىرىم جولدى ارتتا قالدىرعان دراگان شيباليچ رۋمىنيا, ۋكراينا, بەلارۋس جانە رەسەي ەلدەرىن باسىپ وتكەن. وسىلايشا ۆەلوساياحاتشى جاپونيا استاناسى – توكيوعا دەيىن جەتۋدى كوزدەيدى. ال ول ءۇشىن شيباليچ تاعى 15 مىڭ شاقىرىم جولدى ارتتا قالدىرۋى ءتيىس. سەربيا ازاماتى بۇل ساپارىن التى ايدا اياقتاپ, الەم رەكوردىن جاڭعىرتۋدى ماقسات تۇتىپ وتىر. پاۆلوداردان بولەك ول ەلىمىزدىڭ اقتوبە, قوستاناي جانە استانا قالالارىنا اتباسىن تىرەدى. ءارى قاراي, ساياحاتشى رەسەيدىڭ نوۆو­سىبىر قالاسى جانە موڭعوليا, وڭ­­تۇستىك كورەيا ەلدەرى ارقىلى دىتتە­گەن جەرىنە جەتۋدى جوسپارلاپ وتىر. الىس باعىتتى بەتكە العان 37 جاستاعى سەربيالىق وزىمەن بىرگە تۇندە تۇنەيتىن شاتىر, نوۋتبۋك جانە سۋ قۇياتىن قۇتى عانا الىپ شىققان. ول كۇنىنە 150 شاقىرىمعا دەيىن جول جۇرەدى. دراگان ءشيباليچتىڭ نەگىزگى ماماندىعى – ەلەكتريك. دەگەنمەن, بالا كۇنىنەن ساياحاتقا جانى قۇمار ول بۇگىنگە دەيىن ۆەلوسيپەدپەن ءبىراز جەردى شارلاعان. وتكەن جىلى تۋعان قالاسى كرالەۆتەن باستاۋ العان ساپار ماسكەۋ – كراسنودار – ىستامبۇل باعىتى بويىنشا ءوربىدى. بۇل ساياحاتىن ول ءوزى جانكۇيەرى بولىپ تابىلاتىن «پارتيزان» باس­كەتبول كو­مان­داسىنىڭ قۇرمە­تىنە ارناعان. سونداي-اق, 700 شاقى­رىمعا سو­زىلعان ميلانعا دەيىنگى ساپارى دا ءشيباليچتىڭ ماقتان تۇتارلىق جەتىستىكتەرىنىڭ ءبىرى. بۇل – ساياحاتشىنىڭ قا­زاق­ستان­عا العاش رەت كەلۋى. بۇعان ­دەيىن ءبىز­دىڭ ەل تۋرالى كوپ ەستىگەنى­مەن ءدال مۇن­داي قۇرمەتتى كۇتپەگە­نىن جاسىرمادى. – مەن ەۋروپانىڭ يتاليا, گەر­­مانيا, ماكەدونيا سەكىلدى ءبىر­قاتار ەلىندە بولدىم. الايدا, قا­زاق­­ستانداعىداي قوناق­جاي­لى­لىق پەن ءىلتي­پاتتى ەش جەردەن كەز­دەس­تىرمە­دىم. ءسىزدىڭ ەلدە ءار ادام كومەك قولىن سوزۋعا دايىن­ ەكەن. بار­لىعى بىردەي ۇيىنە قو­ناق­قا شا­قىرىپ, ءدام ۇسىنادى. تانىمايتىن جاندى قوناققا شاقىرۋ مەن ءۇشىن تاڭ­عالارلىق جايت, – دەيدى ساياحاتشى. پاۆلوداردا سەرب ساياحاتشىسى وبلىستىق ولكەتانۋ مۋزەيىندە بولىپ, ءوڭىردىڭ تاريحىمەن تانىستى. ءشيباليچتىڭ ءبىر كۇندىك شىعىنى 15 دوللاردان اسپايدى. بۇل قارجى نەگىزىنەن تاماققا جۇمسالادى. ال تۇندە وزىمەن بىرگە الىپ شىققان شاتىردا تۇنەيدى. ەلامان قوڭىر, «ەگەمەن قازاقستان».