استانا كۇنى مەرەكەسىنە وراي, 1 شىلدەدە مادەنيەت جانە سپورت مينيسترلىگى ۇيىمداستىرۋىمەن بەيبىتشىلىك جانە كەلىسىم سارايى الدىنداعى اشىق الاڭدا دج. ۆەرديدىڭ «ايدا» وپەراسى قويىلماق. ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا ۇيىمداستىرۋشىلار مەن بەلگىلى ونەر شەبەرلەرى عاجايىپ دەكوراتسيالار مەن وتشاشۋمەن بەزەندىرىلگەن شوۋ سيپاتىنداعى ساحنالىق جوبا تۋرالى ويلارىمەن ءبولىستى. ولار قوناقتار ءۇشىن بيىلعى قالا كۇنىندەگى ەرەكشە سىيدىڭ ءبىرى وسى بولاتىنىنا سەنىمدى.
ءباسپاسوز ءماسليحاتىنا مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى ا. رايىمقۇلوۆا, «استانا وپەرا» مەملەكەتتىك وپەرا جانە بالەت تەاترىنىڭ ديرەكتورى ت. الپيەۆ, رەجيسسەر يۋ.الەكساندروۆ, ديريجەر ا. مۇحيتدينوۆ, «استانا وپەرا» تەاترىنىڭ جەتەكشى ءسوليسى ج.عابدۋللينا مەن بولگاريالىق تەنور ك. چانەۆ قاتىسىپ, جۋرناليستەردىڭ سۇراقتارىنا جاۋاپ بەردى. العاش رەت اشىق اسپان استىندا سالتانات قۇراتىن قويىلىم الەم ساحنالارىنداعى ۇلگىنى قايتالاماي, ەرەكشە جانردا ورىندالۋىمەن, تەحنيكالىق كۇردەلى فورماتىمەن, سونداي-اق كورەرمەندەر تالعامى بارىنشا ەسكەرىلىپ, كوپشىلىككە كوتەرىڭكى كوڭىل-كۇي سىيلاۋ ءۇشىن جان-جاقتى جاعدايلار تۋعىزۋىمەن وپەرا ونەرى تاريحىنداعى ەلەۋلى وقيعا عانا ەمەس, جالپى ەلوردا ءيميدجى ءۇشىن دە كەرەمەت اسەر تۇيدىرەتىن تىڭ يدەيا بولىپ قالماق.
– استانا كۇنىنىڭ قۇرمەتىنە ءتۇرلى مادەني سىي-تارتۋلار ازىرلەنۋدە, – دەدى اقتوتى رايىمقۇلوۆا. – الەم ساحنالارىندا وتكەن عاسىرلاردان ۇزىلمەي ءجۇرىپ كەلە جاتقان دج. ۆەرديدىڭ «ايدا» وپەراسى مۇنداي ايتۋلى كۇنگە قاي جاعىنان بولسىن لايىقتى ەكەنىندە ءسوز جوق. ونداعى كەيىپكەرلەر مۇددەسى, ساحنالىق سالتانات, ازاتتىق جولىنداعى جانايعاي مەن سۇيىسپەنشىلىك ءۇشىن كۇرەس يدەياسىنىڭ ءوزى وسى كۇننىڭ رۋحىمەن ۇندەسىپ تۇرعانى تاعى شىندىق. تەڭدەسسىز وپەرا تۋىندىسىنىڭ قايتا تۇلەپ, وزگەشە ناقىشتا قۇلپىرۋى الەمدىك دەڭگەيدەگى قۇبىلىس بولىپ تابىلادى.
سونىمەن قاتار, تەاتر الاڭىنىڭ اۋقىمدىلىعى, وراسان زور كورەرمەن اۋديتورياسى, ساحنالىق تۇپنۇسقاعا قاراعاندا قاتىسۋشى ارتىستەر سانىنىڭ ايتارلىقتاي كوپ بولۋى, زاماناۋي جارىق جانە بەينەقۇرالدار قىزمەتى سپەكتاكلدىڭ مەرەكەلىك سيپاتىن ايشىقتاي تۇسەتىنى ايتىلدى. «استانا وپەرا» تەاترىنىڭ ديرەكتورى تولەۋبەك الپيەۆ «ايدا» قويىلىمىن «لا سكالاعا» ارنايى بارىپ كورگەندەگى اسەرلەرىمەن بولىسسە, رەجيسسەر يۋري الەكساندروۆ دالا ساحناسىنداعى ەرەكشە جانردىڭ بولاشاعىنا ەكپىن بەرە ءسوز سويلەدى. «كورەرمەن پيراميداعا جاقىنداعان ساتتەن-اق عاجايىپ اسەرگە بولەنەدى. فرانكو دزەففيرەلليدىڭ نۇسقاسىندا جانۋارلار اتىمەن جوق. ال مۇندا كادىمگى وقيعانىڭ ورتاسىنا ءوزىڭىز ءتۇسىپ كەتكەندەي كۇيگە بولەنەرىڭىز حاق. وقيعا كۇننىڭ باتار تۇسىندا بولەك سارىنعا اۋىسادى. ات ەرتتەگەن شاباندوزدار كورىنىسى مىسىرلىق ساۋلەتتى ودان بەتەر اشا تۇسەدى. دزەففيرەللي دەكوراتسياسى رەسەي حالىق سۋرەتشىسى ۆياچەسلاۆ وكۋنەۆتىڭ ۇلان-عايىر بەينەينستاللياتسياسىن تولىقتىرىپ, كورىنىس سوڭى رادامەستىڭ سالتانات قۇراتىن ساتىمەن اياقتالادى» دەدى رەجيسسەر.
قويىلىمدا رادامەس پارتياسىن ورىندايتىن بولگار ءسوليسى كامەن چانەۆ ءوزىنىڭ ەلورداعا وسىمەن ەكىنشى رەت اتباسىن تىرەپ وتىرعانىن ايتا كەلىپ: «مەن بۇل قالانىڭ سونشالىق شاپشاڭدىقپەن ءوسىپ كەلە جاتقانىنا قىزىعامىن. وسى رولگە مۇندا اسىعۋىمنىڭ سەبەبى دە سودان. سىزدەر ءۇشىن ايانباي ونەر كورسەتۋگە دايىنمىن», دەپ اعىنان جارىلدى. تەاتردىڭ ءسوليسى جۇپار عابدۋللينا وتاندى, ماحابباتتى جىرلايتىن ساحنالىق تۋىندىنى كاسىبي تۇرعىدا اڭگىمەلەسە, ديريجەر ابزال مۇحيتدينوۆ جوبا اۆتورلارىنا ءوزىنىڭ ريزاشىلىعىن جەتكىزدى.
سپەكتاكلدەگى رادامەس پارتياسىن ورىنداۋ ءۇشىن بولگاريا تەنورى كامەن چانەۆ ارنايى شاقىرىلسا, باستى ءرولدى «استانا وپەرا» تەاترىنىڭ جەتەكشى ءسوليسى جۇپار عابدۋللينا سومدايدى, ال قازاقستاننىڭ ەڭبەك سىڭىرگەن قايراتكەرلەرى دينا حامزينا – امنەريس پارتياسىن, تالعات مۇساباەۆ –اموناسرونى, ارمەنيانىڭ حالىق ءارتىسى بارسەگ تۋمانيان ابىز ءرامفيستى بەينەلەيدى. سپەكتاكلگە شامامەن 300 ادام – سوليستەر, حور, بالەت, ميمانس ارتىستەرى, قورعانىس مينيسترلىگىنەن ساربازدار قاتىسادى. ەسكە سالا كەتەيىك, جوبانى جۇزەگە اسىرۋشى يۋري الەكساندروۆ قازاقستانمەن ەرەكشە بايلانىستاعى ادام. ونىڭ ەڭبەگىنىڭ كۇلاش بايسەيىتوۆا اتىنداعى تەاتردىڭ, «استانا وپەرا» تەاترىنىڭ اشىلۋىنا تىكەلەي قاتىسى بار. قويۋشى-رەجيسسەر قازاقستاندا بىرقاتار تاماشا وپەرالىق سپەكتاكلدى جارىققا شىعارعان. بىزدەگى ونىڭ سوڭعى جۇمىستارىنىڭ ءبىرى رەتىندە, ەلوردالىق تەاتردىڭ باستى تۋىندىسىنا اينالعان مۇقان تولەباەۆتىڭ «ءبىرجان-سارا» وپەراسىن اتاپ وتۋگە بولادى.
قاراشاش توقسانباي,
«ەگەمەن قازاقستان».