استانا. 30 ناۋرىز. قىزىلوردا تۇرعىنى گۇلنار الەكپاەۆا ءوزىنىڭ كونستيتۋتسيالىق قۇقىعىنىڭ قورعالۋىنا زاڭدىق نەگىزدە ىقپال ەتكەن قالا پروكۋرورىنا العىس ءبىلدىردى. بۇل تۋرالى قالالىق پروكۋراتۋرانىڭ ءباسپاسوز قىزمەتىنە سىلتەمە جاساپ, egemen.kz ءتىلشىسى حابارلادى.
گ.الەكپاەۆا: «مەن جالعىز باستى, ەكى بالالى انامىن. ەكى بالام دا جۇمىستا جوق. ۇيدە جۇمىس ىستەيتىن مەن عانا. تەك مەنىڭ ايلىق تابىسىممەن كۇن كورىپ وتىرمىز. وسىلاي جۇرگەندە, «تسەنتركرەديت بانكى» 2002 جىلى شىققان اتقارۋ پاراعى ورىندالماي قالدى دەپ (ول اتقارۋ قۇجاتىنداعى سۋممانى بانك وكىلدەرى تولىق العانىنا قاراماستان) قىزىلوردا وبلىسى بويىنشا جەكە سوت ورىنداۋشىسى ك.دەسياتنيچەنكوعا تاپسىرعان. ك.دەسياتنيچەنكو ءوز كەزەگىندە 2015 جىلعى 22 قاڭتار كۇنى مەنىڭ ۇستىمنەن زاڭسىز اتقارۋشىلىق ءىس جۇرگىزۋ ءوندىرىسىن قوزعاپ, ايلىق تابىسىمنىڭ 50 پايىزىنا شەكتەۋ جاساپ, بانكىنىڭ پايداسىنا ءوندىرۋ تۋرالى قاۋلى قابىلداپ, مەنىڭ جۇمىسىما, ەسەپ بولىمىنە جىبەرگەن. ول قاۋلى بۋحگالتەرياعا اقپان ايىنىڭ اياعىندا كەلگەن. سودان بۋحگالتەريا مەنىڭ ەكى ايلىق اقشامنىڭ 50 پايىزىن سوت ورىنداۋشىعا اۋدارامىز دەيدى. الدىڭعى قاڭتار ايىندا ايلىق بەرمەي كەشىكتىرگەن. ءوزىمىز ازىق-ت ۇلىك, باسقا دا قاجەتتەرىمىزگە كەرەكتى اقشانى قارىزعا العانبىز. ونىڭ ۇستىنە مىنا سوت ورىنداۋشىسىنىڭ قاۋلىسى ماعان جاي تۇسكەندەي اسەر ەتتى. سەبەبى, سوت ورىنداۋشىسىنىڭ قاۋلىسىندا كورسەتىلگەن سومانى تولەپ قۇتىلۋ ءۇشىن 3 جىل كەرەك ەكەن. ءارى قاراي 2 بالاممەن قالاي ءومىر سۇرەم دەپ باسىم قاتتى», دەيدى.
وسىلايشا, ايەل قىزىلوردا قالالىق پروكۋراتۋراسىنا جۇگىنەدى. مۇنداعىلار ايەلدىڭ جاي-كۇيىن ءتۇسىنىپ ءارى زاڭدىق تۇرعىدا ارەكەت ەتىپ, شاعىمدانۋشىنىڭ قۇقىعىن قورعاپ بەرەدى. وسىدان كەيىن بارىپ كوڭىلى جايلانعان انا قالا پروكۋرورىنا: «بانك پەن سوت ورىنداۋشى مەنىڭ كونستيتۋتسيالىق قۇقىعىمدى بۇزىپ وتىرعانىن ايتىپ, كومەكتەسۋلەرىڭىزدى سۇراپ 2015 جىلدىڭ 26 اقپانىندا سىزگە ارىز جازعانمىن. وسى ارىزىمنىڭ نەگىزىندە ءسىزدىڭ قاراماعىڭىزداعى قىزمەتكەرلەر جەدەل تۇردە شاعىمىمدى قاراپ, زاڭسىز شىعارىلعان سوت ورىنداۋشىنىڭ قاۋلىسىن بۇزدىرىپ, ايلىعىمدى ۇستاتپاي, وزىمدە قالدىرۋعا جاردەم بەردى. جوعارىدا ايتىلعاندار نەگىزىندە سىزدەن سۇرايتىنىم, مەنىڭ ارىزىمدى قاراعان قىزمەتكەرلەرىڭىزگە شەكسىز العىسىمدى جانە قاراپايىم حالىقتىڭ مۇڭ-مۇقتاجىنا وسىلاي جەدەل تۇردە كومەك بەرە بەرۋلەرىنە تىلەكتەستىگىمدى جەتكىزسەڭىز» دەپ حات جازعان.
جولدىباي بازار.
دەرەك: قىزىلوردا قالالىق پروكۋراتۋراسى.
سۋرەت: i-news.kz.