استانا. 30 ناۋرىز. وزبەكستاننىڭ ءىس باسىنداعى پرەزيدەنتى يسلام كاريموۆ كەشە, 29 ناۋرىز كۇنى وتكەن مەملەكەت باسشىسىن سايلاۋدا داۋىس جيناۋدان توپ باستاپ كەلەدى. بۇل تۋرالى UZ24 حابارلادى.
ورتالىق سايلاۋ كوميسسياسىنىڭ توراعاسى ميرزا-ۋلۋگبەك ابدۋسالوموۆ مالىمدەگەندەي, الدىن الا ەسەپتەۋلەردىڭ ناتيجەسى بويىنشا ول سايلاۋشىلاردىڭ 90,39 پايىزدىق داۋسىنا يە بولعان.
30 ناۋرىز كۇنى وزبەكستان ورتالىق سايلاۋ كوميسسياسىنىڭ توراعاسى ميرزا-ۋلۋگبەك ابدۋسالوموۆ كەزەكتى بريفينگىن وتكىزىپ, پرەزيدەنت سايلاۋىنىڭ الدىن الا قورىتىندىلارىن ايتىپ بەردى. ونىڭ سوزىنە قاراعاندا, قازىرگى ءىس باسىنداعى پرەزيدەنت يسلام كاريموۆ سايلاۋشىلاردىڭ 90,39 پايىزدىق داۋىسىن الىپ, 17,122 ملن. ادامنىڭ قولداۋىنا يە بولدى. ەكىنشى ورىنعا 3,08 پايىزدىق داۋىس العان «ميللي تيكلانيش» («ۇلتتىق جاڭعىرۋ») پارتياسىنىڭ كانديداتى اكمال سايدوۆ شىقتى. ءۇشىنشى ورىنعا وزبەكستان حالىق-دەموكراتيالىق پارتياسىنىڭ وكىلى حاتامجون كەتمونوۆ (2,92%), ءتورتىنشى ورىنعا – «ادولات» («ادىلەت») سوتسيال-دەموكراتيالىق پارتيانىڭ ۇمىتكەرى «ادولات» ناريمون ۋماروۆ (2,05%) ورنالاستى.
ابدۋسالوموۆ سونداي-اق سايلاۋ بارىسىندا الدەقانداي ءبىر سايلاۋ زاڭىنىڭ بۇزىلۋ فاكتىسىنىڭ ورىن الماعانىن ايتتى.
سايلاۋعا تىزىمگە ەنگىزىلگەن سايلاۋشىلاردىڭ 91,01 پايىزى, ياعني 18,928 ملن. ادام قاتىستى.
وزبەكستان ورتالىق سايلاۋ كوميسسياسى توراعاسىنىڭ ايتۋىنشا, سايلاۋدىڭ تۇپكىلىكتى ناتيجەلەرى 10 كۇننەن قالدىرىلماي, ياعني 2015 جىلدىڭ 8 ساۋىرىنە دەيىن جاريالاناتىن بولادى.
مۇرات ايتقوجا.
مانبە, سۋرەت: UZ24.