استانا. 30 ناۋرىز. وزبەكستاندا ورتالىق سايلاۋ كوميسسياسىنىڭ مالىمەتى بويىنشا, سايلاۋشىلاردىڭ پرەزيدەنت سايلاۋىنا قاتىسۋ دەڭگەيى 91,01 پايىز بولعان. بۇل تۋرالى UZ 24 حابارلادى.
ورتالىق سايلاۋ كوميسسياسىنىڭ توراعاسى ميرزا-ۋلۋگبەك ابدۋسالوموۆتىڭ كەشە, 29 ناۋرىز كۇنى كەشكە وتكىزگەن بريفينگىندە حابارلاۋىنشا, ەلدەگى 20,798 ملن. سايلاۋشىدان 18,928 ملن. ادام نەمەسە جالپى سايلاۋشىلاردىڭ 91,01 پايىزى داۋىس بەرگەن. داۋىس ساناۋ ساعات 20:00-دا باستالدى. الدىن الا قورىتىندى بۇگىن جەرگىلىكتى ۋاقىت بويىنشا ساعات 16:00-دە جاريالانادى.
ابدۋسالوموۆ سونداي-اق داۋىس بەرۋدىڭ وزبەكستانننىڭ ەۋروپا مەن اقش-تاعى ەلشىلىكتەرىندە دە ءجۇرىپ جاتقانىن مالىمدەدى. الدىن الا مالىمەت بويىنشا, سايلاۋ بارىسىندا الدەقانداي ءبىر سايلاۋ زاڭناماسىنىڭ بۇزىلۋشىلىعى تۋرالى شاعىم تۇسپەگەن.
وزبەكستاندا پرەزيدەنت سايلاۋى 29 ناۋرىز كۇنى جەرگىلىكتى ۋاقىت بويىنشا 6:00 ساعاتتا بارلىق 14 سايلاۋ وكرۋگى بويىنشا باستالدى. سايلاۋ ۋچاسكەلەرى تاشكەنت ۋاقىتىمەن 20:00 ساعاتتا جابىلدى.
مۇرات ايتقوجا.