استانا. 29 ناۋرىز. بۇگىن, جەكسەنبى كۇنى وزبەكستاندا ەل پرەزيدەنتىنىڭ سايلاۋى بولىپ ءوتتى. قازىر بارلىق سايلاۋ ۋچاسكەلەرىندە داۋىس بەرۋ اياقتالدى. بۇل تۋرالى euronews حابارلادى.
«وزبەكستاندا جەكسەنبى كۇنى ەلدىڭ جاڭا تاريحىنداعى بەسىنشى پرەزيدەنت سايلاۋى بولىپ ءوتتى. وندا مۇنىڭ الدىنداعى سايلاۋلارداعى سياقتى, ءىس باسىنداعى مەملەكەت باسشىسى يسلام كاريموۆتىڭ جەڭىپ شىعاتىنىنا ەشكىم كۇماندانىپ وتىرعان جوق. ول رەسپۋبليكانى 1989 جىلدان باسقارىپ كەلەدى. سوڭعى رەت 2007 جىلى وتكەن سايلاۋدىڭ بارىسىندا, رەسمي مالىمەت بويىنشا, سايلاۋشىلاردىڭ 88 پايىزىنىڭ داۋىسىن العان بولاتىن», - دەلىنگەن حابارلامادا.
بۇگىندە جاسى 77-گە كەلىپ وتىرعان كاريموۆ سايلاۋالدى ناۋقان كەزىندە ەلدەگى جەمقورلىقپەن كۇرەستە قاجەتتى قادامداردى جاساپ, تۇرعىنداردىڭ ءال-اۋقاتىن كوتەرۋدى قامتاماسىز ەتەتىنىن مالىمدەگەن ەدى.
سايلاۋ بيۋللەتەندەرىنە ودان باسقا تاعى ءۇش ۇمىتكەر ەنگىزىلدى. ولار: اكمال سايدوۆ – «ميللي تيكلانيش» («ۇلتتىق جاڭعىرۋ») دەموكراتيالىق, حاتامجون كەتمونوۆ – حالىق-دەموكراتيالىق پارتياسى, ناريمون ۋماروۆ سوتسيال-دەموكراتيالىق «ادولات» («ادىلدىك») پارتياسى اتتارىنان داۋىسقا ءتۇستى.
سايلاۋ ۋچاسكەلەرىنە ءبىزدىڭ ەلىمىزدىڭ 20 ميلليون 798 مىڭ 52 ازاماتى تىركەلگەن.
پرەزيدەنتتىك سايلاۋدىڭ الدىن الا ناتيجەلەرى دۇيسەنبى كۇنى جاريالانادى. ورتالىق سايلاۋ كوميسسياسى وسىعان ۋادە بەرىپ وتىر.
مۇرات ايتقوجا.