استانا. 29 ناۋرىز. «قازاتومونەركاسىپ» ۇاك» اكتسيونەرلىك قوعامىنىڭ باسقارما توراعاسى نۇرلان قاپپاروۆتى اقتىق ساپارعا شىعارىپ سالۋ ساتىندە ۇكىمەت باسشىسىنىڭ ءبىرىنشى ورىنباسارى باقىتجان ساعىنتاەۆ مارقۇمنىڭ رۋحى الدىندا كەشىرىم سۇرايتىنىن جەتكىزدى. بۇل تۋرالى nur.kz حابارلادى.
قارالى جيىندا باقىتجان ساعىنتاەۆ: «وسى تاياۋدا ءوزىمنىڭ ويلانباي جاساعان ارەكەتىم ءۇشىن نۇرلاننىڭ رۋحى الدىندا كەشىرىم سۇرايمىن. نۇرلان ەكولوگيا مينيسترلىگىنەن كەتىپ, «قازاتومونەركاسىپ» اق-تى باسقارىپ جۇرسە دە, «ەكسپو-2017» ديرەكتورلار كەڭەسىنىڭ توراعاسى بولاتىن. ول ەلباسىنىڭ قابىلداۋىنا دايىندالىپ ءجۇردى. ويتكەنى, قازاق ۇلتتىق پاۆيلونىنىڭ قۇرىلىمىنا جاۋاپتى ەدى. ءبىز پرەمەر-ءمينيستردىڭ الدىندا ارنايى روليكتى تاماشالادىق», – دەدى. الايدا, روليكتى كورىپ بولعان سوڭ ساعىنتاەۆ ءبىر ەسكەرتپەسىنىڭ بار ەكەندىگىن ايتقان.
«نۇرلان وسىعان بايلانىستى جوباسىن قايتا وڭدەيمىن دەگەنشە, 10 كۇن ۋاقىتى كەتتى. قازىر سول ايتقان ەسكەرتپەم ءۇشىن قاتتى وكىنەمىن. ەگەر ايتپاعانىمدا, ول ءوز يدەياسىمەن جانە دايىنداعان روليگىمەن ەلباسىنىڭ قابىلداۋىندا بولار ەدى. مۇمكىن, جوباسى ماقۇلدانىپ, ءبىز نۇرلاننىڭ جاساعان ەڭبەگىن كورەر مە ەدىك. مەن بۇل روليكتىڭ مەملەكەت باسشىسىنىڭ قاراۋىندا بولاتىنى جونىندە نۇرلاننىڭ رۋحى الدىندا ۋادە ەتەمىن. ويتكەنى, ول ءوزىنىڭ وسى جوباسىنا بار ىنتاسىمەن كىرىسكەن بولاتىن», – دەدى ساعىنتاەۆ.
ايتا كەتەيىك, مارقۇم الماتىداعى كەڭساي زيراتىنا جەرلەندى.
جولدىباي بازار.
دەرەك, سۋرەت: nur.kz.