استانا. 29 ناۋرىز. قىتايدا ازيا ەكونوميكالىق فورۋمى ءوتىپ جاتىر. ونىڭ باستى ماقساتى ازيا ينفراقۇرلىمدىق ينۆەستيتسيا بانكى جۇمىسىن باستاۋ بولىپ وتىر. بۇل تۋرالى Euronews حابارلادى.
بواو قالاسىندا باستالعان فورۋمدى قىتاي حالىق رەسپۋبليكاسىنىڭ توراعاسى سي تسزينپين اشىپ, بارلىق كونتيتەنتتەگى مەملەكەتتەردى «جىبەك جولىنىڭ ەكونوميكالىق بەلدەۋى» دەپ اتالاتىن جوبانى جۇزەگە اسىرۋعا اتسالىسۋعا شاقىردى. ونىڭ ايتۋىنشا, الەمنىڭ 60-تان استام ەلى مەن حالىقارالىق ۇيىمدارى قازىردىڭ وزىندە بۇل باستاماعا قوسىلۋعا ءوتىنىش بەرىپ قويعان.
كەشە باستالعان جيىن «جىبەك جولى جانە تەڭىز جىبەك جولى ەكونوميكالىق بەلدەۋى» قۇرىلىسى جونىندەگى جوبالار» مەن «ازيا ينفراقۇرىلىمدىق ينۆەستيتسيا بانكى» كەلەم دەۋشىلەردىڭ ءبارى ءۇشىن اشىق. ءبىز وسى جولدىڭ بويىندا ورنالاسقان ەلدەردى, سونداي-اق ازيانىڭ بارلىق ەلدەرىن وسىعان بەلسەنە قاتىسۋعا شاقىرامىز», - دەدى قىتاي باسشىسى.
ايتا كەتۋمىز كەرەك, قازاقستان ازيا ينفراقۇرىلىمدىق ينۆەستيتسيا بانكى قۇرىلتايشىلارىنىڭ بىرىنەن تابىلادى. بۇل ماسەلە 2014 جىلى قازان ايىندا بەيجىڭدە 22 ەلدىڭ وكىلدەرىنىڭ قاتىسۋىمەن شەشىلگەن ەدى.
ونىڭ نەگىزىن قالاۋعا قىتاي, رەسەي, ءۇندىستان, برازيليا, اۆستريا, ۇلىبريتانيا, گەرمانيا, فرانتسيا, يتاليا, شۆەيتساريا, ليۋكسەمبۋرگ, تۇركيا, قازاقستان, وزبەكستان, مالايزيا, اۆستراليا جانە كورەيا سياقتى 40-قا جۋىق ەل قاتىستى.
مۇرات ايتقوجا.