استانا. 29 ناۋرىز. فۋتبولدان يسلانديا قۇراماسىنىڭ ارداگەر فۋتبولشىسى, كەشەگى ويىندا قازاقستان قاقپاسىنا سوعىلعان العاشقى گولدىڭ اۆتورى ەيدۋر گۋدونسەن ءبىزدىڭ كوماندانىڭ ويىنى تۋرالى پىكىرىن ءبىلدىردى. بۇل تۋرالى sports.kz حابارلادى.
قازاقستاندىق باق وكىلدەرىنە بەرگەن سۇحباتىندا ول ويىننان العان اسەرىمەن ءبولىسىپ: «اۋا رايىنىڭ سالقىندىعى جەڭىسكە جەتۋىمىزگە كەدەرگى بولا المادى. ەڭ باستىسى, ءبىز الدىمىزعا قويعان ماقساتتى ورىندادىق. مەنىڭ ۇلتتىق قۇراما ءۇشىن گول سوقپاعانىما ۇزاق ۋاقىت بولىپتى. قازاقستانمەن ويىندا سول داتاعا وزگەرىس ەنگىزگەنىم ءۇشىن قۋانىشتىمىن», – دەدى.
«قازاقستان ويىنشىلارى وتە ورەسكەل قاتەلىكتەر جىبەردى. ءتىپتى تەگىس جەردە ءسۇرىنىپ ءجۇر دەۋگە دە بولادى. باقىتىمىزعا وراي, سول قاتەلىكتەردى پايدامىزعا جاراتا الدىق. جاسىراتىنى جوق, ويىننىڭ الدىندا الاڭ يەلەرى ءبىرىنشى نومىرمەن وينايدى دەپ ويلادىق. بىراق, ءوز باسىم سونشالىقتى قىسىم بايقاي المادىم», – دەيدى كەزىندە «چەلسي» مەن «بارسەلونا» ساپىندا دوپ تەپكەن تاجىريبەلى ويىنشى.
ەكىنشى گولدىڭ ويىن تاعدىرىنا ايتارلىقتاي اسەر ەتكەنىن ايتقان گۋدونسەن: «ەسەپ ءبىزدىڭ پايدامىزعا 2:0 بولعاننان كەيىن قارسىلاستارىمىزعا قايتادان جينالۋعا ەش مۇمكىندىك بەرگەن جوقپىز. سوعان قاراماستان, بۇل ويىن وڭاي بولعان جوق. ال ءىرى ەسەپپەن جەڭىسكە جەتۋىمىز ءبىزدىڭ تولىق مۇمكىندىگىمىزدى كورسەتتى دەي المايمىن», – دەدى.
ايتا كەتەيىك, كەشە «استانا-ارەنا» ستاديونىندا يسلانديا ءبىزدىڭ قۇرامانى 3:0 ەسەبىمەن جەڭدى. ويىن فۋتبولدان 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا ءوتتى.
ەلامان قوڭىر.
دەرەك: sports.kz.
سۋرەت: kapital.kz.