استانا. 29 ناۋرىز. بۇگىن كانادادا تاعى ءبىر جولاۋشىلار ۇشاعى كەلەڭسىزدىككە تاپ بولدى. Air Canada اۋە كومپانياسىنا تيەسىلى ا320 ۇشاعى قونۋ كەزىندە ارنايى جولاقتىڭ جيەگىنە شىعىپ كەتكەن. سونىڭ سالدارىنان 25 ادام ءتۇرلى دەڭگەيدەگى دەنە جاراقاتتارىن الدى. بۇل تۋرالى ريا «نوۆوستي» حابارلادى.
اپاتتى جاعداي كانادانىڭ گاليفاكس قالاسىندا تىركەلدى. ۇشاقتىڭ جول جيەگىنە شىعىپ كەتۋىنە اۋا رايىنىڭ قولايسىزدىعى سەبەپ بولعان. ويتكەنى اۋە كولىگى قونعان كەزدە تولاسسىز قار جاۋىپ تۇرعان ەدى. سوعان بايلانىستى ۇشقىش ارنايى جولاقتىڭ شامدارىن ءجوندى كورمەگەن. ءتىپتى قونۋ كەزىندە ەلەكتر جەلىلەرىنە اقاۋ كەلتىرىپ, اۋەجاي ءبىر ساعات بويى جارىقسىز قالدى.
كەلەڭسىزدىك كەزىندە ۇشاقتا 132 جولاۋشى مەن 5 ەكيپاج مۇشەسى بولعان. جاراقات العان 25 ادام دەرەۋ جەرگىلىكتى اۋرۋحانالارعا جەتكىزىلدى.
ۇشاق تورونتو قالاسىنان ۇشىپ شىققانىن ايتا كەتەيىك.
ەلامان قوڭىر.
دەرەك, سۋرەت: ريا «نوۆوستي».