استانا. 29 ناۋرىز. سەمەيدە اكەسىمەن بىرگە وزەن جاعاسىنا بارىپ, مۇزدىڭ ۇستىندە ويناپ جۇرگەن 5 جاسار قىز سۋعا باتىپ كەتتى. بۇل تۋرالى «7 ارنا» حابارلادى.
وسى وقىس وقيعادان كەيىن قۇتقارۋشىلار ەرتىستىڭ بويىن جاعالاعان بالىقشىلارعا جاپپاي ەسكەرتۋ جاساپ جاتىر. بىراق ولاردىڭ مۇز ۇستىندە بالىق اۋلاۋدى ساۋىرگە دەيىن جالعاستىراتىن ويلارى بار.
قازىر ەرتىستىڭ مۇزى ايتارلىقتاي جۇقارعان. قالىندىعى شامامەن 10 سم. ونىڭ ۇستىنە شىقپاق تۇگىلى, جاعاسىندا ءجۇرۋدىڭ ءوزى قاۋىپتى. بىراق, مۇندا كۇن سايىن جۇزدەگەن بالىقشى كەلىپ, ويىق ويادى ەكەن.
«2014 جىلى وسى ءساۋىر ايىننىڭ باسىندا بەسقاراعاي اۋىلىنىڭ گلۋحوۆكا اۋىلىندا ەكى بالىقشى باتىپ كەتتى. مۇنداي توتەنشە جاعدايلاردى بولدىرماس ءۇشىن بالىقشىلارمەن اڭگىمە وتكىزىپ جەنە ەسكەرتۋ جاساپ وسىنداي جۇمىستاردى اتقارىپ جاتىرمىز.
دەگەنمەن, ەرتىسكە كەلىپ بالىق اۋلاۋدى ەرمەك قىلاتىندار ازىرگە ەش نارسەدەن قاۋىپتەنبەيتىن سىڭايلى. ولاردىڭ ويىنشا, ساۋىرگە دەيىن بالىق اۋلاۋعا بولادى», - دەدى سەمەي قالالىق سۋدان قۇتقارۋ قىزمەتىنىڭ مامانى تاسبولات كوشكىنباەۆ.
ماماندار ەسكەرتۋدى جايدان جاي جاساپ وتىرعان جوق. 22 ناۋرىز كۇنى مۇز ۇستىنە شىققان 5 جاسار بالا سۋ تۇبىنە باتىپ كەتىپتى. اكەسى قۇتقارىپ ۇلگەرمەگەن. كىشكەنتاي قىزدىڭ دەنەسىن قۇتقارۋشىلار الىپ شىعادى. ماماندار بيىل ەرتىستىڭ ارناسى بۇرىلىپ بالىقشىلار وتىرعان اۋماققا قاۋىپ ءتوندىرىپ تۇرعانىن ايتىپ دابىل قاعۋدا. سوندىقتان الدىن الۋ شارالارىنا بالىقشىلاردىڭ باعىنۋى ءتيىس ەكەنىن ەسكەرتىپ وتىر.
مۇرات ايتقوجا.