استانا. 29 ناۋرىز. كەشە تۋندە فۋتبولدان 2016 جىلعى ەۋروپا چەمپيوناتىنا ىرىكتەۋ ءتۋرنيرى اياسىندا تاعى 9 ويىن ءوتتى. «ا» توبىندا سىنعا ءتۇسىپ جاتقان قازاقستاننىڭ ءوز الاڭىندا يسلانديادان ويسىراي ۇتىلعانى بەلگىلى. بۇل تۋرالى egemen.kz حابارلادى.
باس كوماندامىز ادەتتەگى جۇرىسىنەن جاڭىلماي, ءوزى گول سوقپاسا دا, قاقپاسىنا ءۇش دوپ جىبەردى. ءسويتىپ, كەزەكتى كومانداعا ءۇش ۇپاي سىيلادى. وسىلايشا, 320 مىڭ عانا حالقى بار, دوپ تەبۋگە جارايتىن قارا جەرىنەن توڭ بوپ قاتقان مۇزى باسىم ارال-مەملەكەتتىڭ ءوزى ابىرويىمىزدى ايرانداي توگىپ كەتتى.
ءبىز مۇز قۇرساۋىنداعى ۇلتاراقتاي ارالدان كەلگەن كوماندادان ءىرى ەسەپپەن جەڭىلىپ جۇرگەندە, بولگاريا الەمنىڭ 4 دۇركىن چەمپيوندارى يتاليانىڭ «ەكى اياعىن ءبىر ەتىككە تىقتى». جانكۇيەرلەر نازارىن اۋدارعان بۇل كەزدەسۋ تەڭ اياقتالدى. دەگەنمەن, يتاليا سول تەڭ ناتيجەگە زورعا قول جەتكىزدى. ءبىرىنشى بولىپ ەسەپ اشقانىمەن, از ۋاقىتتىڭ ىشىندە ەكى گول جىبەرىپ الدى. تەك سوڭعى ساتتە عانا تارازى باسىن تەڭەستىرۋگە مۇمكىندىك تاۋىپ, جەڭىلىستەن امان قالدى.
سونداي-اق, ءبىزدىڭ توپتاعى قالعان ەكى ويىن دا اسا تارتىستى ءارى قىزىقتى ءوتتى. توپ باسىندا كەلە جاتقان چەحيا ءوز الاڭىندا لاتۆيامەن تەڭ ويناعانىنا ريزا بولدى. لاتىشتار 90 مينۋت بويى چەحتاردى ابدەن ساستىردى. ءتىپتى ءۇش ۇپاي ولجالاۋعا تولىق مۇمكىندىكتەرى بولعان ەدى. دەگەنمەن, سوڭعى ساتتە عانا وسالدىق تانىتىپ الدى.
نيدەرلاندى مەن تۇركيا اراسىنداعى ويىندا دا تەڭ ناتيجە تىركەلدى. بۇل جۇپتا نيدەرلاندىنىڭ دەڭگەيى جوعارى ەكەنىنە ەشكىم ءشۇبا كەلتىرمەيدى. ايتسە دە, قىزعالداقتى ەلدىڭ وكىلدەرى تۇرىكتەرمەن تەڭ ويناعانىنا شۇكىرشىلىك ايتتى. ەگەر تورەشى قوسقان قوسىمشا ۋاقىت بولماسا, جاعداي مۇلدەم باسقاشا بولار ما ەدى؟!
ەندەشە, كەشە وتكەن ويىنداردىڭ ناتيجەلەرىنە نازار اۋدارايىق.
قازاقستان – يسلانديا 0:3 (0:2)
گولدار: ەيدۋر گۋدونسەن 20, بيركير بيارناسون 32, 90+1.
چەحيا – لاتۆيا 1:1 (0:1)
گولدار: ۆاتسلاۆ پيلارج 90 – الەكسەي ۆيشنياكوۆ (30).
يزرايل – ۋەلس 0:3 (0:1)
گولدار: اارون رەمسي 45+1, گارەت بەيل 50,77.
ازەربايجان – مالتا 2:0 (1:0)
گولدار: دجاۆيد گۋسەينوۆ 4, دميتري نازاروۆ 90+2.
حورۆاتيا – نورۆەگيا 5:1 (1:0)
گولدار: مارسەلو بروزوۆيچ 30, يۆان پەريشيچ 54, يۆيتسا وليچ 65, گوردون شيلدەنفەلد 87, دانيەل پرانيچ 90+4 – الەكساندەر تەتتي 81.
نيدەرلاندى – تۇركيا 1:1 (0:1)
گولدار: كلاس-يان حۋنتەلار 90+2 – بۋراك يىلماز 37.
اندوررا – بوسنيا جانە گەرتسەگوۆينا 0:3 (0:1)
گولدار: ەدين دجەكو 13, 49, 62.
بەلگيا – كيپر 5:0 (2:0)
گولدار: مارۋان فەللايني 21, 66, كريستيان بەنتەكە 35, ەدەن ازار 67, ميشي باتشۋاي 80.
بولگاريا – يتاليا 2:2 (2:1)
گولدار: يۆەلين پوپوۆ 11, يليان ميتسانسكي 17 – يوردان مينەۆ 4 (اۆتوگول), ەدەر 84.
ەلامان قوڭىر.
دەرەك: egemen.kz.
سۋرەت: parimatch.com.